ຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ສະໄໝທີ I ຂຶ້ນໃນວັນທີ 13 ກໍລະກົດ ນີ້ ທີ່ຫ້ອງປະຊຸມຂອງສະຖາບັນດັ່ງກ່າວ ໃຫ້ກຽດເຂົ້າຮ່ວມ ແລະ ເປັນປະທານ ຂອງ ສະຫາຍ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ, ສະຫາຍ ສອນທະນູ ທໍາມະວົງ ເລຂາຄະນະພັກ ປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຄະນະພັກ ສວສສຊ ແລະ ພາກສ່ວນກ່ຽວຂ້ອງເຂົ້າຮ່ວມ.
ເນື້ອໃນຕົ້ນຕໍຂອງການດໍາເນີນກອງປະຊຸມດັ່ງກ່າວ ມີ 3 ວາລະຄື: 1) ເພື່ອສະຫຼຸບຕີລາຄາການຈັດຕັ້ງປະຕິບັດມະຕິ ກອງປະຊຸມໃຫຍ່ສະມາຊິກພັກ ຄັ້ງທີ I ຂອງອົງຄະນະພັກຕົນ, ແຜນພັດທະນາການຄົ້ນຄວ້າວິທະຍາສາດເສດຖະກິດ ແລະ ສັງຄົມ ຂອງສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃນໄລຍະເຄິ່ງສະໄໝຜ່ານມາ ຕິດພັນກັບການຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ແລະ ການຈັດຕັ້ງປະຕິບັດ 2 ວາລະແຫ່ງຊາດ ຢ່າງຮອບດ້ານ, ຖືກຕ້ອງ, ພາວະວິໄສ, ນັບທັງດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນທີ່ຖອດຖອນໄດ້ ພ້ອມທັງ, ກຳນົດ ວິທີການສືບຕໍ່ຈັດຕັ້ງປະຕິບັດບັນດາຄາດໝາຍສູ້ຊົນແຕ່ລະດ້ານ ຂອງອົງຄະນະພັກສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໃນຕໍ່ໜ້າ ໃຫ້ແທດກັບຄວາມສາມາດບົ່ມຊ້ອນ, ກຳລັງແຮງທີ່ມີ ແລະ ສາມາດປະຕິບັດໄດ້; 2) ດຳເນີນການທາບທາມ ຢັ່ງຫາງສຽງຄວາມເຊື່ອໝັ້ນໄວ້ວາງໃຈ ຕໍ່ການນຳພາລວມ ແລະ ບຸກຄົນໃນຄະນະບໍລິຫານງານພັກ ກາງສະໄໝຜ່ານມາ ເພື່ອເປັນຂໍ້ມູນພື້ນຖານສໍາຄັນ ໃນການເບິ່ງບັນຫາຂອງການຈັດຕັ້ງ ກໍຄືໃຫ້ແຕ່ລະສະຫາຍຄະນະບໍລິຫານງານພັກ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດມີບ່ອນອີງ ເພື່ອປັບປຸງກໍ່ສ້າງຕົນເອງ; ແລະ 3) ເພື່ອສຳຫຼວດການນຳພາລວມຂອງຄະນະບໍລິຫານງານພັກ ແລະ ບຸກຄົນໃນຄະນະບໍລິຫານງານພັກ ໃນໄລຍະເຄິ່ງສະໄໝທີ່ຜ່ານມາ.
ຈາກນັ້ນ, ສະຫາຍ ຄຳພັນ ເຜີຍຍະວົງ ກໍໄດ້ໃຫ້ກຽດໂອ້ລົມ ແລະ ມີຄວາມເຫັນຊີ້ນຳ ຊຶ່ງ ສະຫາຍໄດ້ ຍົກໃຫ້ເຫັນ ເຖິງຄວາມໝາຍສໍາຄັນ ແລະ ຄວາມຈໍາເປັນຂອງການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ແຕ່ລະຂັ້ນ ແລະ ໃຫ້ທິດຊີ້ນໍາໃນການຈັດຕັ້ງປະຕິບັດວຽກງານໃນທ້າຍໄໝ ແຕ່ນີ້ຫາປີ 2025.
(ຂ່າວ: ສວສສຊ, ພາບ: ແສງຈັນ)
