ສຳນັກຂ່າວ Ihlas ຂອງຕວັກກີ ວັນທີ26 ມິຖຸນານີ້ ທ່ານ ອັບດຸລກາດີຣ ອູຣາໂລກລູ ລັດຖະມົນຕີວ່າການກະຊວງ ຄົມມະນາຄົມ ແລະ ໂຄງສ້າງພື້ນຖານຂອງຕວັກກີ ໄດ້ຍົກໃຫ້ເຫັນເຖິງປະລິມານການຂົນສົ່ງທັນຍາພືດໄປຕະຫລາດໂລກ ຜ່ານລະບຽບຂົນສົ່ງທັນຍາພືດໃນທະເລດຳເພີ່ມຂຶ້ນຫລາຍກວ່າ 32 ລ້ານໂຕນ ນັບຕັ້ງແຕ່ເດືອນສິງຫາ ປີ 2022 ໂດຍທັນຍາພືດສ່ວນໃຫຍ່ຖືກຂົນສົ່ງສູ່ ສປ ຈີນ, ແອັດສະປາຍ, ຕວັກກີ ແລະ ອີຕາລີ. ຂະນະທີ່ການຂົນສົ່ງທັນຍາພືດໄປກຸ່ມປະເທດອາຟຣິກາ ເພີ່ມຂຶ້ນ 2 ເທົ່າ ໃນໄລຍະ 6 ເດືອນຜ່ານມາ ກວມເອົາ 12% ຂອງປະລິມານທັນຍາພືດທັງໝົດ ໂດຍກຳປັ່ນບັນທຸກ ທັນຍາພືດ 290ລຳ ຈາກທັງໝົດ 987 ລຳ ເປັນກຳປັ່ນສັນຊາດຕວັກກີ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
