ກອງປະຊຸມຄົບຄະນະບໍລິຫານງານພັກ ກາງສະໄໝຂອງອົງຄະນະພັກ ຄະນະຈັດຕັ້ງສູນກາງພັກ (ຄຈສພ) ສະໄໝທີ IX ໄດ້ເປີດຂຶ້ນຢ່າງເປັນທາງການໃນວັນທີ 27 ມິຖຸນານີ້ ໂດຍມີສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ເລຂາທິການສູນກາງພັກ ເລຂາຄະນະພັກ ຫົວໜ້າຄະນະຈັດຕັ້ງສູນກາງພັກ ໃຫ້ກຽດເປັນປະທານ, ມີສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ ຮອງເລຂາຄະນະພັກ ຮອງຫົວໜ້າຄະນະຈັດຕັ້ງສູນກາງພັກ, ມີສະຫາຍ ວິໄລວັນ ບຸດດາຄຳ ກໍາມະການສຳຮອງສູນກາງພັກ ຮອງປະທານກວດກາສູນກາງພັກ, ມີຮອງເລຂາຄະນະພັກ, ຄະນະປະຈໍາພັກ, ກໍາມະການຄະນະພັກ, ເລຂາ-ຮອງເລຂາໜ່ວຍພັກ, ກຳມະການໜ່ວຍພັກ, ຮອງຫົວໜ້າກົມພາຍໃນຄະນະຈັດຕັ້ງສູນກາງພັກເຂົ້າຮ່ວມຈຳນວນ 32 ສະຫາຍ ຍິງ 8 ສະຫາຍ.
ໃນວາລະດໍາເນີນກອງປະຊຸມທີ່ມີຄວາມສໍາຄັນນີ້ ສະຫາຍ ນາງ ບຸດສະດີ ທະນະເມືອງ ມີຄໍາເຫັນກ່າວເປີດກອງປະຊຸມວ່າ: ກອງປະຊຸມຄົບຄະນະກາງສະໄໝຄັ້ງນີ້ ແມ່ນມີຄວາມສຳຄັນເປັນຢ່າງຍິ່ງ ໃນການດຳເນີນຊີວິດການເມືອງພາຍໃນອົງຄະນະພັກ ຄະນະຈັດຕັ້ງສູນກາງພັກ. ດັ່ງນັ້ນ, ກອງປະຊຸມຄົບຄະນະກາງສະໄໝຄັ້ງນີ້ໄດ້ພ້ອມກັນສຸມໃສ່ຄົ້ນຄວ້າ, ທົບທວນຕີລາຄາຄືນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ ໂດຍຕິດພັນກັບສອງວາລະແຫ່ງຊາດ, ມະຕິກອງປະຊຸມຈັດຕັ້ງທົ່ວປະເທດ ຄັ້ງທີ XI ແລະ ມະຕິກອງປະຊຸມໃຫຍ່ສະມາຊິກພັກ ຄັ້ງທີ IX ແຜນພັດທະນາວຽກງານກໍ່ສ້າງພັກ-ພະນັກງານ ແລະ ວຽກງານກົງຈັກການຈັດຕັ້ງຂອງຄະນະພັກ ຄະນະຈັດຕັ້ງສູນກາງພັກ ໃຫ້ເລິກເຊິ່ງ ພາວະວິໄສ ເຫັນໄດ້ດ້ານດີ-ຜົນສໍາເລັດ, ດ້ານອ່ອນ-ຂໍ້ຄົງຄ້າງ, ສາເຫດ ແລະ ບົດຮຽນໃນການນຳພາປະຕິບັດໜ້າທີ່ການເມືອງໃນໄລຍະ 1 ປີກວ່າ; ຄົ້ນຄວ້າປະກອບຄວາມເຫັນຕໍ່ການສະຫຼຸບຕີລາຄາ, ທິດທາງແຜນການ ແລະ ແຜນພັດທະນາວຽກງານກໍ່ສ້າງພັກ-ພະນັກງານ, ກົງຈັກການຈັດຕັ້ງໃນທ້າຍສະໄໝຕໍ່ໜ້າ ແລະ ພ້ອມນັ້ນບັນດາສະຫາຍ ທີ່ເຂົ້າຮ່ວມກອງປະຊຸມຍັງໄດ້ທາບທາມຄວາມເຫັນໄວ້ວາງໃຈຕໍ່ການນຳພາລວມ ຂອງຄະນະບໍລິຫານງານພັກ ແລະ ບຸກຄົນໃນຄະນະບໍລິຫານງານພັກກາງສະໄໝ ຂອງອົງຄະນະພັກ ຄະນະຈັດຕັ້ງສູນກາງພັກ ເພື່ອສືບຕໍ່ເສີມຂະຫຍາຍດ້ານຕັ້ງໜ້າ, ປັບປຸງແກ້ໄຂດ້ານອ່ອນ-ຄົງຄ້າງໃນການນຳພາລວມ ແລະ ບຸກຄົນໃນຄະນະບໍລິຫານງານພັກ ຄະນະຈັດຕັ້ງສູນກາງພັກໃນຕໍ່ໜ້າໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ແລະ ດຳເນີນກອງປະຊຸມຄັ້ງນີ້ໃຫ້ມີຜົນສຳເລັດຕາມຄາດໝາຍທີ່ວາງໄວ້.
ໃນກອງປະຊຸມຍັງໄດ້ຮັບຟັງການເຜີຍແຜ່-ເຊື່ອມຊຶມເອກະສານຄໍາສັ່ງ 268 ຂອງຄະນະເລຂາທິ ການສູນກາງພັກ ມາດຕະຖານ, ໜ້າທີ່ຂອງຄະນະບໍລິຫານງານພັກ, ຂອງຄະນະພັກກະຊວງ-ອົງການ ແລະ ຂໍ້ຫ້າມສໍາລັບສະມາຊິກພັກ ແລະ ດໍາເນີນການປ່ອນບັດທາບທາມຄວາມໄວ້ວາງໃຈຕໍ່ຄະນະພັກໃນການນໍາພາ-ຊີ້ນໍາ ອັນລວມ ແລະ ສະເພາະບຸກຄົນໃນຄະນະພັກ. ຈາກນັ້ນ, ກອງປະຊຸມໄດ້ຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກພັກຄັ້ງທີີ IX ອົງຄະນະພັກ ຄະນະຈັດຕັ້ງສູນກາງພັກ ແລະ ຮ່າງບົດສະຫຼຸບການຈັດຕັ້ງປະຕິບັດ ແຜນພັດທະນາວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງ ແລະ ທິດທາງແຜນການສູ້ຊົນໃນຕໍ່ໜ້າ. ພ້ອມດຽວກັນນີ້, ຜູ້ເຂົ້າຮ່ວມກອງປະຊຸມຍັງໄດ້ປະກອບຄວາມເຫັນຕໍ່ 2 ເອກະສານດັ່ງກ່າວ ຕາມການເຈາະຈີ້ມຂອງປະທານກອງປະຊຸມ ແລະ ຕອນທ້າຍກອງປະຊຸມຈະໄດ້ຮັບຟັງຄຳເຫັນໂອ້ລົມຂອງ ສະຫາຍ ນາງ ສີໃສ ລືເດດມູນສອນ ຊຶ່ງຈະເປັນເຂັມຊີ້ທິດເຍືອງທາງໃຫ້ຄະນະບໍລິຫານງານພັກ ຄະນະຈັດຕັ້ງສູນກາງພັກ ເພື່ອເພີ່ມທະວີຄວາມຮັບຜິດຊອບຕໍ່ກັບການພັດທະນາວຽກງານກໍ່ສ້າງພັກ, ວຽກງານພະນັກງານ ແລະ ກົງຈັກການຈັດຕັ້ງໃຫ້ມີຄວາມກ້າວໜ້າຢ່າງບໍ່ຢຸດຢັ້ງ, ກອງປະຊຸມຄັ້ງນີ້ ດໍາເນີນເປັນເວລາສອງວັນ 27-28 ມິຖຸນາ 2023.
(ຂ່າວ: ນາງ ຄຳສະຫວັນ ພົມມະວົງ; ພາບ: ແສງອາລຸນ ຈັນທາທອນ)
