ຕາມຂ່າວຈາກວິທະຍຸສາກົນ ແຫ່ງ ສປ ຈີນ ການເຈລະຈາຮອບທີ 3 ກ່ຽວກັບເຂດການຄ້າເສລີຈີນ-ອາຊຽນ ສະບັບ 3.0 ໄດ້ຈັດຂຶ້ນຢູ່ນະຄອນຄຸນມີງ, ແຂວງຢູນນານຈີນ ໃນລະຫວ່າງ ວັນທີ 24-27 ມິຖຸນານີ້ ໂດຍມີເຈົ້າໜ້າທີ່ປະມານ 370 ຄົນ ທີ່ມາຈາກພາກສ່ວນທີ່ກ່ຽວຂ້ອງ ຂອງ ສປ ຈີນ, 10 ປະເທດສະມາຊິກອາຊຽນ ແລະ ກອງເລຂາອາຊຽນເຂົ້າຮ່ວມ. ຈາກນັ້ນ ທ່ານ ຫວາງໂຊ້ເວີນ, ຜູ້ຕາງໜ້າການເຈລະຈາການຄ້າສາກົນກະຊວງການຄ້າຈີນ, ທັງເປັນຮອງລັດຖະມົນຕີກະຊວງການຄ້າຈີນ ໄດ້ກ່າວວ່າ: ການສ້າງເຂດການຄ້າເສລີຈີນ-ອາຊຽນ ສະບັບ 3.0 ຈະຍົກສູງລະດັບສາຍພົວພັນຄູ່ຮ່ວມຍຸດທະສາດຮອບດ້ານ ສປ ຈີນ-ອາຊຽນ ຢ່າງຮອບດ້ານ ໂດຍຜ່ານການເພີ່ມທະວີການຮ່ວມມືດ້ານເສດຖະກິດດີຈີຕອນ, ເສດຖະກິດສີຂຽວ, ຕ່ອງໂສ້ການສະໜອງ ແລະ ຕ່ອງໂສ້ການຜະລິດ ລະຫວ່າງ ສອງຝ່າຍ, ຊຸກຍູ້ໃຫ້ສາຍພົວພັນເສດຖະກິດການຄ້າ ລະຫວ່າງ ສອງຝ່າຍພັດທະນາດ້ວຍຄຸນນະພາບສູງ, ກະຕຸ້ນຂະບວນການເສດຖະກິດພາກພື້ນເຊື່ອມໂຍງເຂົ້າເປັນອັນໜຶ່ງອັນດຽວກັນ. ຂະນະທີ່ ສປ ຈີນ ຍິນດີສຸມຄວາມພະຍາຍາມ ຮ່ວມກັບບັນດາປະເທດສະມາຊິກອາຊຽນ, ສ້າງສົນທິສັນຍາແບບກວມລວມ, ທັນສະໄໝ, ຮອບດ້ານ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
