ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ປັດຈຸບັນ, ການຕົກກ້າຂອງຊາວກະສິກອນ ໃນທົ່ວແຂວງຄຳມ່ວນ ປະຕິບັດໄດ້ 4.070 ໂຕນ ເທົ່າກັບ 75,50% ຂອງແຜນການ. ໃນຂະນະທີ່ ຊາວກະສິກອນສ່ວນໜຶ່ງ ໃນເຂດທີ່ມີເງື່ອນໄຂປູກເຂົ້າໄດ້ໃນເນື້ອທີ່ 23.792 ເຮັກຕາ ເທົ່າກັບ 26,48% ຂອງເນື້ອທີ່ແຜນການທັງໝົດໃນທົ່ວແຂວງ ໃນນີ້, ນາຫວ່ານປະຕິບັດໄດ້ 20.634 ເຮັກຕາ, ນາປັກດໍາປະຕິບັດໄດ້ 3.158 ເຮັກຕາ. ສ່ວນເນື້ອທີ່ນາ ເພື່ອຜະລິດເປັນສະບຽງອາຫານ ປະຕິບັດໄດ້ 15.965 ເຮັກຕາ, ເນື້ອທີ່ຜະລິດເຂົ້າເປັນສິນຄ້າປະຕິບັດໄດ້ 7.831 ເຮັກຕາ.
ຂະແໜງປູກຝັງ, ພະແນກກະສິກໍາ ແລະ ປ່າໄມ້ແຂວງຄໍາມ່ວນ ໃຫ້ຮູ້ວ່າ: ແຂວງຄຳມ່ວນ ວາງແຜນຜະລິດເຂົ້ານາປີ ໃນປີ 2023 ທັງໝົດ 89.848 ເຮັກຕາ ໃນນີ້, ແຜນການປູກເຂົ້າເພື່ອເປັນສະບຽງອາຫານ 61.356 ເຮັກຕາ, ແຜນການປູກເຂົ້າເພື່ອເປັນສິນຄ້າ 28.492 ເຮັກຕາ, ແຕ່ເມື່ອທຽບໃສ່ເນື້ອທີ່ແຜນການປີ 2022 ເຫັນວ່າເນື້ອທີ່ຜະລິດເຂົ້ານາປີຫລຸດລົງ 388 ເຮັກຕາ ເນື່ອງຈາກເນື້ອທີ່ນາ ທີ່ຢູ່ພື້ນທີ່ຕໍ່າຖືກນໍ້າຖ້ວມ ເຮັດໃຫ້ຊາວກະສິກອນຈຳນວນໜຶ່ງ ຫັນໄປເຮັດນາແຊງທົດແທນນາປີ ແລະ ຫັນເນື້ອທີ່ນາໄປເປັນດິນປຸກສ້າງ ແລະ ອື່ນໆ.
ຂໍ້ມູນຍັງໃຫ້ຮູ້ຕື່ມວ່າ: ດ້ານການຜະລິດພືດລະດູຝົນປີ 2023 ທົ່ວແຂວງ ມີເນື້ອທີ່ແຜນການ 12.745 ເຮັກຕາ, ຄາດຄະເນຜົນຜະລິດ 200.564 ໂຕນ, ທຽບໃສ່ເນື້ອທີ່ແຜນການປີ 2022 ເນື້ອທີ່ເພີ່ມຂຶ້ນ 6.425 ເຮັກຕາ ໃນນີ້, ແຜນການປູກພືດ ເພື່ອເປັນສະບຽງອາຫານ 2.461 ເຮັກຕາ, ຄາດຄະເນຜົນຜະລິດ 26.496 ໂຕນ, ແຜນການປູກພືດເພື່ອເປັນສິນຄ້າ 10.284 ເຮັກຕາ, ຄາດຄະເນຜົນຜະລິດ 174.068 ໂຕນ. ມາຮອດປັດຈຸບັນການປູກພືດລວມໃນທົ່ວແຂວງ ປະຕິບັດໄດ້ 9.292 ເຮັກຕາ ໃນນີ້, ປູກພືດເພື່ອເປັນສະບຽງອາຫານ ປະຕິບັດໄດ້ 1.428 ເຮັກຕາ ແລະ ປູກພືດເພື່ອເປັນສິນຄ້າປະຕິບັດໄດ້ 7.863 ເຮັກຕາ.
ຂ່າວ-ພາບ: ແດງສະຫວັດ ແສນພານິດ
