ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ການນຳແຂວງໄຊສົມບູນ ນໍາໂດຍ ສະຫາຍ ພົຕ ວົງສອນ ອິນປານພິມ ຮອງເລຂາພັກແຂວງ ພ້ອມດ້ວຍຄະນະ ເຂົ້າພົບປະ ການນຳແຂວງບັກຢາງ ເພື່ອຢ້ຽມຢາມຖາມຂ່າວ ແລະ ແຈ້ງຈຸດປະສົງ ຂອງການມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງບັກຢາງ ໃນວັນທີ 26 ມິຖຸນາ 2023 ທີ່ແຂວງບັກຢາງ ໂດຍການຕ້ອນຮັບຂອງສະຫາຍ ເຢືອງ ວັນ ຖ່າຍ ກຳມະການສູນການພັກ, ເລຂາພັກແຂວງ, ຫົວໜ້າຄະນະຜູ້ແທນສະພາແຫ່ງຊາດ ປະຈຳແຂວງບັກຢາງ ພ້ອມດ້ວຍຄະນະ.
ສະຫາຍ ພົຕ ວົງສອນ ອິນປານພິມ ໄດ້ກ່າວວ່າ: ການມາຢ້ຽມຢາມ ແຂວງບັກຢາງ ຂອງຄະນະນຳ ແຂວງໄຊສົມບູນ ໃນຄັ້ງນີ້ ກໍເພື່ອແລກປ່ຽນບົດຮຽນທາງດ້ານວິຊາການ ກັບບັນດາພະແນກການທີ່ກ່ຽວຂ້ອງ ຂອງແຂວງບັກຢາງ ເປັນຕົ້ນແມ່ນ ແລກປ່ຽນບົດຮຽນທາງດ້ານວຽກກໍ່ສ້າງພັກ-ພະນັກງານ, ວຽກການຮ່ວມມືໃນຂົງເຂດການຄ້າ, ການລົງທຶນ ແລະ ວຽກການຮ່ວມມືໃນຂົງເຂດວັດທະນະທຳ, ກິລາ, ທອງທ່ຽວ ແລະ ຂໍ້ມູນຂ່າວສານ ທັງນີ້ກໍເພື່ອເປັນການສະຫລຸບສັງລວມຂໍ້ມູນ ແລະ ລາຍງານຕໍ່ການນໍາແຂວງບັກຢາງ ເພື່ອຮັບປະກັນໃຫ້ການຊຸກຍູ້ຊ່ວຍເຫລືອໃຫ້ຖືກຕ້ອງ ແລະ ສອດຄ່ອງຕາມສະພາບຄວາມເປັນຈິງ. ພ້ອມກັນນີ້, ກໍເພື່ອເປັນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ລາວ-ຫວຽດນາມ ກໍຄືຂໍ້ຕົກລົງ ວ່າດ້ວຍການຮ່ວມມື ລະຫວ່າງ ແຂວງໄຊສົມບູນ ກັບແຂວງບັກຢາງ ໃນການຮ່ວມມືພັດທະນາ, ຊຸກຍູ້ ແລະ ສະໜັບສະໜູນດ້ານເຕັກນິກວິຊາການຕ່າງໆ ໃຫ້ມີຄວາມເຂັ້ມແຂງ ແນໃສ່ພັດທະນາແຂວງໄຊສົມບູນ ໃຫ້ມີຄວາມກ້າວໜ້າຂຶ້ນຢ່າງບໍ່ຢຸດຢັ້ງ.
ໂອກາດດຽວກັນນີ້, ຄະນະດັ່ງກ່າວ ຍັງໄດ້ໄປຢ້ຽມຢາມ ບໍລິສັດຕັດຫຍິບ LLG ແລະ ບໍລິສັດເຊືອງຊ່າງຜະລິດເຈ້ຍ ຊຶ່ງເປັນເຂດອຸດສາຫະກຳທີ່ໂດດເດັ່ນຂອງແຂວງບັກຢາງ ແລະ ຍັງເປັນອຸດສາຫະກຳອັນດັບໜຶ່ງຂອງປະເທດຫວຽດນາມ ຕື່ມອີກ.
ຂ່າວ-ພາບ: ເຢັ້ງເຊີເຊ່ຍມົວ ຈົ່ງວ່າຊົວໂກ້
