6 ເດືອນທ້າຍປີນີ້ທະນາຄານແຫ່ງສປປ ລາວ (ທຫລ) ຈະສືບຕໍ່ດຳເນີນນະໂຍບາຍຄຸ້ມຄອງເງິນຕາໃນທິດທາງທີ່ຮັດກຸມຫຼາຍຂຶ້ນ ແນ່ໃສ່ຫຼຸດຜ່ອນຄວາມຕ້ອງການເງິນຕາຕ່າງປະເທດ, ພິຈາລະນາອອກພັນທະບັດ ທຫລ ເພື່ອຮັກສາຍອດພັນທະບັດ ທຫລ ໃຫ້ຢູ່ໃນລະດັບ 10.000 ຕື້ກີບ ເພື່ອຄວບຄຸມປະລິມານເງິນໃຫ້ຂະຫຍາຍຕົວຕາມທີ່ສະພາຮັບຮອງ ແລະ ບໍ່ສ້າງແຮງກົດດັນຕໍ່ອັດຕາເງິນເຟີ້.
ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 26 ມິຖຸນາຜ່ານມາວ່າ: ທຫລ ໄດ້ວາງທິດທາງແຜນການ 6 ເດືອນທ້າຍປີ 2023 ພາຍໃຕ້ການຊີ້ນຳຢ່າງໃກ້ຊິດຈາກລັດຖະບານ, ທຫລ ຈະສູ້ຊົນ ແລະ ດຳເນີນມາດຕະການດ້ານເງິນຕາຕ່າງໆດັ່ງລຸ່ມນີ້: ສືບຕໍ່ດຳເນີນນະໂຍບາຍເງິນຕາໃນທິດທາງທີ່ຮັດກຸມຫຼາຍຂຶ້ນ ແນ່ໃສ່ຫຼຸດຜ່ອນຄວາມຕ້ອງການເງິນຕາຕ່າງປະເທດໃນສັງຄົມລົງ ເພື່ອຊ່ວຍປະຄັບປະຄອງບໍ່ສ້າງແຮງກົດດັນເຮັດໃຫ້ເງິນກີບອ່ອນຄ່າ, ໃນນີ້, ທຫລ ຈະສືບຕໍ່ຮັກສາອັດຕາດອກເບ້ຍພື້ນຖານ ແລະ ອັດຕາສ່ວນເງິນແຮຝາກບັງຄັບໄວ້ໃນລະດັບເທົ່າເດີມ ແລະ ພິຈາລະນາປັບ ຖ້າເຫັນວ່າຈຳເປັນ. ພິຈາລະນາອອກພັນທະບັດ ທຫລ ເພື່ອຮັກສາຍອດພັນທະບັດ ທຫລ ໃຫ້ຢູ່ໃນລະດັບ 10.000 ຕື້ກີບ ເພື່ອຄວບຄຸມປະລິມານເງິນໃຫ້ຂະຫຍາຍຕົວຕາມທີ່ສະພາຮັບຮອງ ແລະ ບໍ່ສ້າງແຮງກົດດັນຕໍ່ອັດຕາເງິນເຟີ້. ສ້າງເງື່ອນໄຂສະພາບແວດລ້ອມໃຫ້ມີເງິນຕາຕ່າງປະເທດສະໜອງເຂົ້າລະບົບເສດຖະກິດໃຫ້ຫຼາຍຂຶ້ນ. ທົບທວນຄືນນະໂຍບາຍອັດຕາດອກເບ້ຍເງິນຝາກ ສຳລັບສະກຸນເງິນກີບ ແລະ ເງິນຕາຕ່າງ ປະເທດຂອງລະບົບທະນາຄານ ເພື່ອຫຼຸດຜ່ອນແຮງກະຕຸ້ນຄວາມຕ້ອງການເງິນຕາຕ່າງປະເທດທີ່ບໍ່ຈໍາເປັນ. ສ້າງຄວາມເຂັ້ມແຂງໃຫ້ແກ່ຄັງສຳຮອງເງິນຕາຕ່າງປະເທດ ໂດຍການດຳເນີນມາດຕະການຢ່າງມີຈຸດສຸມຫຼາຍຂຶ້ນ ດ້ວຍການປັບປຸງລະບົບການຄຸ້ມຄອງຜູ້ນຳເຂົ້າ-ສົ່ງອອກສິນຄ້າ ແລະ ບໍລິການ, ນັກລົງທຶນ. ພ້ອມທັງປັບປຸງໂຄງສ້າງຄັງສຳຮອງເງິນຕາຕ່າງປະເທດ ໃຫ້ແທດເໝາະກັບສະພາບການຄ້າ-ການລົງທຶນຂອງ ສປປ ລາວ. ສືບຕໍ່ດຳເນີນນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດ ແລະ ຈະຄົ້ນຄວ້າດັດປັບອັດຕາແລກປ່ຽນສໍາລັບທະນາຄານທຸລະກິດໃຫ້ມີການເຄື່ອນໄຫວຄ່ອງຕົວຂຶ້ນ ພ້ອມທັງດັດ ສົມເງິນຕາຕ່າງປະເທດໃຫ້ແກ່ການນໍາເຂົ້າສິນຄ້າບູລິມະສິດທີ່ຈໍາເປັນ.
ທ່ານ ບຸນເຫຼືອ ສິນໄຊວໍຣະວົງ ກ່າວໃຫ້ຮູ້ອີກວ່າ: ສຳລັບການຄຸ້ມຄອງເງິນຕາຕ່າງປະເທດ ແມ່ນສືບຕໍ່ໃຫ້ສຳເລັດບັນດານິຕິກຳລຸ່ມກົດໝາຍຄຸ້ມຄອງເງິນຕາຕ່າງປະເທດ ໂດຍເລັ່ງການຈັດຕັ້ງຜັນຂະຫຍາຍຄຳສັ່ງຂອງນາຍົກລັດຖະມົນຕີ ວ່າດ້ວຍການ ຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດໃຫ້ເຂົ້າສູ່ການຈັດຕັ້ງປະຕິບັດໂດຍໄວ ພ້ອມທັງຈະເລັ່ງດຳເນີນການອອກຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດກ່ຽວກັບການນໍາເຂົ້າ-ສົ່ງອອກສິນຄ້າ ແລະ ການບໍລິການ, ຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດ ຕິດພັນກັບການລົງທຶນໂດຍກົງລະຫວ່າງປະເທດ, ຂໍ້ຕົກລົງວ່າດ້ວຍການຄຸ້ມຄອງເງິນຕາຕ່າງປະເທດຢູ່ເຂດເສດຖະກິດພິເສດດອກງິ້ວຄຳ ແລະ ບໍ່ເຕັນແດນງາມ. ສືບຕໍ່ລົງເລິກເຮັດວຽກ ແລະ ເຈລະຈາກັບບັນດາບໍລິສັດສົ່ງອອກໃນແຕ່ລະຂະແໜງການຈຸດສຸມ ແນໃສ່ບໍລິສັດທີ່ມີມູນຄ່າສົ່ງອອກສູງ ແຕ່ນຳລາຍຮັບເງິນຕາເຂົ້າມາສປປ ລາວຍັງຕ່ຳ. ພ້ອມທັງສົມ ທົບກັບກະຊວງການເງິນໄລ່ລຽງມູນຄ່າການນຳລາຍຮັບຕົວຈິງຈາກການສົ່ງອອກສິນຄ້າເຂົ້າມາ ແລະ ຊຸກຍູ້ໃຫ້ບໍລິສັດຫັນມາໃຊ້ບັນຊີວິສາຫະກິດ ເພື່ອຮອງຮັບການຊຳລະຄ່າສິນຄ້າສົ່ງອອກ, ຫຼີກລ່ຽງການນໍາໃຊ້ບັນຊີບຸກຄົນ. ສົມທົບກັບກະຊວງອຸດສາຫະກໍາ ແລະ ການຄ້າ ຈັດຕັ້ງປະຕິບັດການຂຶ້ນທະບຽນຜູ້ນຳເຂົ້າ-ສົ່ງອອກສິນຄ້າ ໂດຍສະເພາະການກຳນົດລະຫັດຜູ້ນຳເຂົ້າ-ສົ່ງອອກ, ສ່ວນການຂຶ້ນທະບຽນຫົວໜ່ວຍສົ່ງອອກ-ນຳເຂົ້າການບໍລິການນຳ ທຫລ ແລະ ການສ້າງຖານຂໍ້ມູນການລົງທະບຽນໃຫ້ເຊື່ອມຈອດລະຫວ່າງກັນ. ສ້າງຖານເກັບກຳຂໍ້ມູນຜູ້ນຳເຂົ້າ-ສົ່ງອອກລາຍໃຫຍ່ທີ່ມີມູນຄ່າທຸລະກິດ 10 ລ້ານໂດລາຕໍ່ປີຂຶ້ນໄປ ທີ່ຈະປະ ກອບມີຂໍ້ມູນລາຍລະອຽດການດໍາເນີນທຸລະກິດ, ການຊຳລະ ແລະ ຮັບຊຳລະກັບຕ່າງປະເທດໃຫ້ໄດ້ຢ່າງໜ້ອຍ 100 ບໍລິສັດ ຂະໜາດໃຫຍ່ ທີ່ກວມເອົາມູນຄ່າການສົ່ງອອກຫຼາຍກວ່າ 70% ຂອງການສົ່ງອອກທັງໝົດ. ສືບຕໍ່ສົມທົບກັບບັນດາຂະແໜງ ການກ່ຽວຂ້ອງ (ຂະແໜງການເງິນ, ອຸດສາຫະກຳ ແລະ ການຄ້າ) ເພື່ອຄົ້ນຄວ້າເຊື່ອມຖານຂໍ້ມູນການນຳເຂົ້າ-ສົ່ງອອກ ທີ່ແຕ່ລະຂະແໜງການຄຸ້ມຄອງນັບຕັ້ງແຕ່ຂັ້ນຕອນການຂຶ້ນທະບຽນຜູ້ນຳເຂົ້າ-ສົ່ງອອກ, ການອະນຸຍາດສົ່ງອອກ-ນຳເຂົ້າຂອງແຕ່ລະຂະ ແໜງການຕໍ່ກັບສິນຄ້າຄວບຄຸມ, ການແຈ້ງພາສີສົ່ງອອກ-ນຳເຂົ້າຂອງແຕ່ລະຂະແໜງການ ຕໍ່ກັບສິນຄ້າຄວບຄຸມ, ການແຈ້ງພາສີສົ່ງອອກ-ນຳເຂົ້າດ້ວຍລະບົບຄຸ້ມຄອງພາສີ (ASYCUDA & Lao Natioanal Single Window) ຊຶ່ງລະບົບດັ່ງກ່າວຈະເຊື່ອມກັບຖານຂໍ້ມູນຂອງບັນດາທະນາຄານທຸລະກິດຜ່ານຖານຂໍ້ມູນຂອງ ທຫລ. ຊຸກຍູ້ທະນາຄານທຸລະກິດ (ທທກ) ຂະ ຫຍາຍໜ່ວຍບໍລິການແລກປ່ຽນເງິນຕາຂອງຕົນໃຫ້ຫຼາຍຂຶ້ນຢູ່ຕາມສະຖານທີ່ໂຮງແຮມ, ສະໜາມບິນສາກົນ, ດ່ານຊາຍແດນ, ທ່າບົກ ແລະ ສະຖານທີ່ອື່ນໆຕາມການກໍານົດຂອງ ທຫລ, ຕິດຕາມກວດກາການໃຫ້ບໍລິການແລກປ່ຽນເງິນຕາຕ່າງປະເທດ ຜ່ານເຄື່ອງມືອີເລັກໂທຣນິກ ໂດຍທະນາຄານທຸລະກິດ. ສືບຕໍ່ປະສານສົມທົບເຈົ້າໜ້າທີ່ຕຳຫຼວດເສດຖະກິດ (ປກສ) ລົງກວດກາເປົ້າໝາຍບຸກຄົນ, ນິຕິບຸກຄົນທີ່ສ້າງຄວາມປັ່ນປ່ວນອັດຕາແລກປ່ຽນໃຫ້ເງິນກີບອ່ອນຄ່າເພື່ອເກງກໍາໄລ, ການໃຫ້ບໍລິການໂອນຊໍາລະຂ້າມແດນທີ່ບໍ່ໄດ້ຮັບອະນຸຍາດ ແລະ ດຳເນີນມາດຕະການຢ່າງເຂັ້ມງວດ ຕໍ່ຜູ້ທີ່ເຄື່ອນໄຫວແລກປ່ຽນເງິນຕາຜິດກົດໝາຍ ພ້ອມທັງສົມທົບກັບບັນດາຂະແໜງການອອກແຈ້ງການປະກາດຕິດລາຄາສິນຄ້າ ແລະ ບໍລິການເປັນເງິນກີບ.
