ໃນໄລຍະ 2 ປີເຄິ່ງທ້າຍສະໄໝ ແຂວງວຽງຈັນ ຈະສູ້ຊົນເຮັດໃຫ້ເສດຖະກິດຂະຫຍາຍຕົວ 4,6%, ໃນຂະນະດຽວກັນຈະສູ້ຊົນເກັບລາຍຮັບເຂົ້າງົບປະມານໃຫ້ໄດ້ອີກ 600 ຕື້ກີບ, ລວມ 5 ປີໃຫ້ໄດ້ 1.257,75 ຕື້ກີບ (ບໍ່ລວມພູດສູນກາງ), ຄາດວ່າຈະເກີນແຜນ 33,74% ຂອງແຜນ (ແຜນການ 940,44 ຕື້ກີບ) ໃນນັ້ນຈະສູ້ຊົນລະດົມທຶນຕາມຄວາມຕ້ອງການຂອງການລົງທຶນ ໃຫ້ໄດ້ຕື່ມອີກ 5.978,20 ຕື້ກີບ, ເທົ່າກັບ 60,36% ຂອງແຜນ 5 ປີ (ແຜນ 9.905 ຕື້ກວ່າກີບ).
ທ່ານ ດາວເຮືອງ ນັນທາວົງ ຄະນະປະຈຳພັກແຂວງ ຮອງເຈົ້າແຂວງວຽງຈັນ ໄດ້ລາຍງານຕໍ່ກອງປະຊຸມ ສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມກາງສະໄໝ ແລະ ທິດທາງຈຸດສຸມ 2 ປີເຄິ່ງທ້າຍສະໄໝ ຂອງແຂວງວຽງຈັນ ໃຫ້ຮູ້ວ່າ: ສຳລັບແຜນພັດທະນາເສດຖະກິດ-ສັງຄົມ 2 ປີ ເຄິ່ງ (2023-2025) ໄດ້ກໍານົດທິດທາງການພັດທະນາເສດຖະກິດ-ສັງຄົມ ໂດຍອີງໃສ່ການຜັນຂະຫຍາຍແຜນ 5 ປີ ຄັ້ງທີ VI (2021-2025) ຂອງແຂວງວຽງຈັນ ຊຶ່ງຈະສຸມໃສ່ປະຕິບັດບັນດາຄາດໝາຍ ແລະ ແຜນວຽກຈຸດສຸມ ຕາມຄວາມອາດສາມາດ, ທ່າແຮງ ໂດຍຈະສືບຕໍ່ພັດທະນາເສດຖະກິດ-ສັງຄົມຂອງແຂວງ ໂດຍສະເພາະການປະຕິບັດຄາດໝາຍ, ເປົ້າໝາຍ, ຕົວຊີ້ບອກ ໃຫ້ບັນລຸເງື່ອນໄຂຫຼຸດພົ້ນອອກຈາກຄວາມທຸກຍາກຢ່າງໜັກແໜ້ນ, ປະຊາຊົນມີຄວາມສຸກ, ມີຊີວິດການເປັນຢູ່ທີ່ດີຂຶ້ນ ແລະ ມິີຄວາມເຂັ້ມແຂງເພິ່ງຕົນເອງໄດ້. ໃນນັ້ນການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃຫ້ມີຜົນສຳເລັດ, ສືບຕໍ່ສົ່ງເສີມການສ້າງພື້ນຖານການຜະລິດ ແລະ ການບໍລິການ ທີ່ເປັນປາຍແຫຼມຕາມແລວເສດຖະກິດ 443 ຂອງແຂວງໃຫ້ມີຄວາມເຂັ້ມແຂງເປັນຮູບປະທຳເທື່ອລະກ້າວ ແລະ ຫັນໄປສູ່ການຄຸ້ມຄອງລັດ ແລະ ຄຸ້ມຄອງສັງຄົມດ້ວຍລະບຽບກົດໝາຍໃຫ້ໜັກແໜ້ນກວ່າເກົ່າ, ສືບຕໍ່ຮັກສາສະຖຽນລະພາບທາງການເມືອງທີ່ໜັກແໜ້ນ, ສັງຄົມມີຄວາມສະຫງົບປອດໄພ, ສະຫງົບສຸກ ແລະ ມີຄວາມສາມະຄີປອງດອງ, ຄຸ້ມຄອງການລົງທຶນຂອງລັດ ແລະ ເອກະຊົນໃຫ້ໜັກແໜ້ນ, ຮັບປະກັນເກັບລາຍຮັບງົບປະມານແຫ່ງລັດໃຫ້ຄົບຖ້ວນ-ຄຸ້ມຄອງລາຍຈ່າຍຢ່າງຮັດກຸມ, ສ້າງເງື່ອນໄຂເອື້ອອຳນວຍໃຫ້ທຸລະກິດຄອບຄົວ, ທຸລະກິດຂະໜາດນ້ອຍ, ຂະໜາດກາງ (SMEs) ສາມາດເຂົ້າເຖິງແຫຼ່ງທຶນ ເພື່ອການຜະລິດ ແລະ ບໍລິການ ຕາມແລວທາງລົດໄຟລາວ-ຈີນ ໃຫ້ຫຼາຍຂຶ້ນ, ເອົາໃຈໃສ່ປົກປັກຮັກສາສິ່ງແວດລ້ອມ ແລະ ຄຸ້ມຄອງນໍາໃຊ້ຊັບພະຍາກອນທໍາມະຊາດຢ່າງສົມເຫດສົມຜົນ, ປະຢັດ ແລະ ມີປະສິດທິຜົນສູງສຸດ. ຄ່ຽງຄູ່ກັບພັດທະນາຊັບພະຍາກອນມະນຸດໃຫ້ມີຄຸນນະພາບດີຂຶ້ນຕື່ມ, ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກ ຕິດພັນກັບວຽກງານກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ແລະ ວຽກງານ 3 ສ້າງໃຫ້ແຂງແຮງ ແລະ ເຂົ້າສູ່ລວງເລິກຂຶ້ນຕື່ມ ໂດຍການສ້າງເປັນແຜນລຶບລ້າງຄວາມທຸກຍາກຂອງແຂວງໃຫ້ເປັນຮູບປະທຳເທື່ອລະກ້າວ.
ສຸມໃສ່ລະດົມທຶນຈາກແຫຼ່ງທຶນຕ່າງໆເພື່ອເຮັດໃຫ້ເສດຖະກິດຂະຫຍາຍຕົວໃຫ້ບັນລຸ 4,6%, ຮອດປີ 2025 ເສດຖະກິດຂະຫຍາຍຕົວ 5%, ລວມຍອດຜະລິດຕະພັນພາຍ (GDP) ໃນປີ 2025 ໃຫ້ໄດ້ 11.466 ຕື້ກີບ, ສະເລ່ຍຕໍ່ຫົວ 23,52 ລ້ານກີບ/ປີ ຫຼື ເທົ່າກັບ 1.519 ໂດລາ, ໃນນັ້ນຂົງເຂດກະສິກຳ-ປ່າໄມ້ ຂະຫຍາຍຕົວ 4% ກວມເອົາ 33,76% ຂອງ (GDP) ມີມູນຄ່າ 3.360 ຕື້ກີບ, ຂົງເຂດອຸດສາຫະກຳ ຂະຫຍາຍຕົວ 5,7% ກວມເອົາ 36,75% ຂອງ (GDP) ມີມູນຄ່າ 1.417 ຕື້ກີບ, ຂົງເຂດການບໍລິການຂະຫຍາຍຕົວ 5% ກວມເອົາ 27,32% ຂອງ (GDP) ມີມູນຄ່າ 2.718 ຕື້ກີບ, ພາສີອາກອນຜະລິດຕະພັນ ແລະ ຂາເຂົ້າສຸດທິຂະຫຍາຍຕົວ 0,9% ກວມເອົາ 2,15% ຂອງ (GDP) ເທົ່າກັບມູນຄ່າ 213 ຕື້ກີບ.
ໃນຂະນະດຽວກັນຈະສູ້ຊົນເກັບລາຍຮັບເຂົ້າງົບປະມານໃຫ້ໄດ້ອີກ 600 ຕື້ກີບ, ລວມ 5 ປີໃຫ້ໄດ້ 1.257,75 ຕື້ກີບ (ບໍ່ລວມພູດສູນກາງ), ຄາດວ່າຈະເກີນແຜນ 33,74% ຂອງແຜນ (ແຜນການ 940, 44 ຕື້ກີບ), ກວມເອົາ 10,98% ຂອງ GDP ແລະ ຄຸ້ມຄອງລາຍຈ່າຍໃຫ້ໄດ້ອີກ 1.686,15 ຕື້ກີບ, ຮອດປີ 2025 ໃຫ້ໄດ້ 3.198,27 ຕື້ກີບ, ເທົ່າກັບ 100% ຂອງແຜນການ, ງົບປະມານຈະຂາດດຸນອີກ 1.330,17 ຕື້ກີບ, ລວມ 5 ປີ ຂາດດຸນ 2.257,82 ຕື້ກີບ, ສູ້ຊົນລະດົມທຶນຕາມຄວາມຕ້ອງການລົງທຶນຂອງແຂວງ ໃນໄລຍະ 2 ປີເຄິ່ງ (2023-2025) ໃຫ້ໄດ້ຕື່ມອີກ 5.978, 20 ຕື້ກີບ, ເທົ່າກັບ 60,36% ຂອງແຜນ 5 ປີ (ແຜນ 9.905 ຕື້ກວ່າກີບ), ໃນນີ້ ທຶນຈາກງົບປະມານຂອງລັດ ຄາດວ່າຈະໄດ້ຮັບງົບປະມານຈາກສູນກາງ 375,78 ຕື້ກີບ, ກວມເອົາ 53,84% ຂອງທຶນທັງໝົດ, ໂດຍຈະສຸມໃສ່ໂຄງການສືບຕໍ່ ທີ່ບໍ່ທັນສໍາເລັດໃຫ້ສໍາເລັດ, ແກ້ໄຂໜີ້ສິນຜ່ານມາ ແລະ ສົມທົບທຶນກັບໂຄງການຊ່ວຍເຫຼືອຈາກຕ່າງປະເທດ, ທຶນຊ່ວຍເຫຼືອທາງການເພື່ອການພັດທະນາ (ODA) ຄາດວ່າຈະໄດ້ຮັບການຊ່ວຍເຫຼືອຕື່ມອີກມູນຄ່າ 603,12 ຕື້ກີບ, ກວມເອົາ 72,06% ຂອງທຶນທັງໝົດ; ການລົງທຶນຂອງເອກະຊົນພາຍໃນ ແລະ ຕ່າງປະເທດ ຄາດວ່າຈະມີການລົງທຶນມູນຄ່າ 4.999,30 ຕື້ກີບ, ກວມເອົາ 59, 73% ຂອງທຶນທັງໝົດ.
ໂດຍ: ສຳນານ ພົມພັກດີ
