ຂ່າວສານຊີອາໄອລາຍງານ ເມື່ອບໍ່ດົນມານີ້, ກອງປະຊຸມເວທີປຶກສາຫາລືສຳລັບຜູ້ນຳອຸດສາຫະກຳການຄ້າ APEC 2023 ໄດ້ຈັດຂຶ້ນຢູ່ນະຄອນຫຼວງປັກກິ່ງ ປະເທດຈີນ, ທ່ານ ຫວາງໂຊ້ເວີນ ຜູ້ແທນເຈລະຈາການຄ້າສາກົນທັງເປັນຮອງລັດຖະມົນຕີກະຊວງການຄ້າຈີນກ່າວຢືນຢັນວ່າ: ຈີນຈະສືບຕໍ່ເປີດປະຕູສູ່ພາຍນອກ ເພື່ອສະແຫວງຫາການພັດທະນາ, ຕັ້ງໜ້າຊຸກຍູ້ການເປີດປະຕູສູ່ພາຍນອກໃນລະດັບສູງ.
ທ່ານ ຫວາງໂຊ້ເວີນ ກ່າວຕື່ມວ່າ: ຈີນໄດ້ອະນຸມັດໃຫ້ທຶນຕ່າງປະເທດເຂົ້າເຖິງຂະແໜງການອຸດສາຫະກຳການຜະລິດໂດຍພື້ນຖານແລ້ວ ແລະ ກຳລັງເປີດຂະແໜງການບໍລິການຕໍ່ພາຍນອກຢ່າງຮອບດ້ານ ແລະ ເປັນລະບຽບຮຽບຮ້ອຍ, ໃນຕໍ່ໜ້າຈີນຈະຫຼຸດຜ່ອນມາດຕະການຄຸ້ມຄອງພິເສດວ່າດ້ວຍການເຂົ້າເຖິງຕະຫຼາດຈີນສຳລັບທຶນຕ່າງປະເທດໃນບັນຊີດ້ານລົບນັ້ນຢ່າງສົມເຫດສົມຜົນ ແລະ ວາງມາດຕະການຄຸ້ມຄອງພິເສດ ວ່າດ້ວຍການຄ້າການບໍລິການຂ້າມຊາດເຂົ້າເຖິງເຂດທົດລອງການຄ້າເສລີ ແລະ ຂອບເຂດທົ່ວປະເທດ. ທ່ານ ຫວາງໂຊ້ເວີນ ຍັງກ່າວຕື່ມວ່າ: ຈີນຈະອອກແຮງດຶງດູດທຶນຕ່າງປະເທດ, ຍິນດີຕ້ອນຮັບວິສາຫະກິດຕ່າງປະເທດມາລົງທຶນ ແລະ ພັດທະນາທຸລະກິດຢູ່ຈີນ.
