ພິທີມອບ – ຮັບໂທລະໂຄ່ງ 55 ຊຸດພ້ອມອຸປະກອນຄົບຊຸດໃຫ້ແກ່ແຂວງເຊກອງ ໄດ້ຈັດຂື້ນໃນຕອນເຊົ້າວັນທີ 20 ມິຖຸນາ 2023 ທີ່ພະແນກ ຖວທ ແຂວງເຊກອງ ຕາງໜ້າກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ມອບໂດຍ: ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ແລະ ຮັບໂດຍທ່ານ ບູ່ໄຊ ໄຊຍະເສນ ຫົວໜ້າະແນກ ຖວທ ແຂວງເຊກອງ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ໂພສີ ແກ້ວມະນີວົງ ຄະນະປະຈໍາພັກກະຊວງ ຮອງລັດຖະມົນຕີກະຊວງ ຖວທ, ຫົວໜ້າຄະນະປັບປຸງຂະຫຍາຍຕາໜ່າງໂທລະໂຄ່ງທົ່ວປະເທດ, ທ່ານ ຄໍາສອນ ກອນເຍິ ຄະນະປະຈໍາພັກແຂວງ ຮອງເຈົ້າແຂວງໆເຊກອງ ພ້ອມບັນດາ ທ່ານຄະນະນໍາຈາກກະຊວງແຂວງ ແລະ ຜູ້ຮັບຜິດຊອບວຽກງານເຕັກນິກ 4 ເມືອງພາຍໃນແຂວງເຊກອງເຂົ້າຮ່ວມ.
ໂທລະໂຄ່ງທີ່ນໍາມາມອບໃຫ້ແຂວງເຊກອງຄັ້ງນີ້ມີ 55 ຊຸດ ໃນຈໍານວນ 4 ເມືອງ 55 ບ້ານຄື: ເມືອງກະລຶມ 19 ບ້ານ, ເມືອງທ່ານແຕງ 7 ບ້ານ, ເມືອງດາກຈຶງ 14 ບ້ານ, ເມືອງລະມາມ 15 ບ້ານ ການມອບໂທລະໂຄ່ງໃຫ້ແຂວງເຊກອງ ກໍຄືບັນດາແຂວງໃນຂອບເຂດທົ່ວປະເທດ ແມ່ນເປັນການສືບຕໍ່ຜັນຂະຫຍາຍມະຕິ 11 ຂອງພັກໃນການພັດທະນາວຽກງານຖະແຫຼງຂ່າວສື່ມວນຊົນເພື່ອເຮັດໃຫ້ມວນຊົນສາມາດເຂົ້າເຖີງຂໍ້ມູນໄດ້ງ່າຍຂື້ນ ເພາະໂທລະໂຄ່ງປຽບເໝືອນຫໍກະຈາຍຂ່າວຂອງບ້ານ ເນື່ອງຈາກໂທລະໂຄ່ງແບບໃໝ່ນີ້ເປັນລະບົບທີ່ທັນສະໄໝມີເຄື່ອງຮັບສັນຍານຈາກວິທະຍຸແຫ່ງຊາດ ແລະ ຮັບສັນຍານຈາກດາວທຽມໄດ້.
ໃນການຈັດຕັ້ງປະຕິບັດໂຄງການປັບປຸງຂະຫຍາຍຕາໜ່າງໂທລະໂຄ່ງທົ່ວປະເທດໄລຍະ2 ເປັນໄລຍະທີ່ທົ່ວປະເທດສຸມໃສ່ການພັດທະນາບ້ານສາມສ້າງລະບົບໂທລະໂຄ່ງເປັນລະບົບສື່ສານທີ່ສາມາດເຮັດໜ້າທີ່ການກະຈາຍຂໍ້ມູນຂ່າວສານຕ່າງໆລວມທັງການໂຄສະນາແນວທາງນະໂຍບາຍຂອງພັກ ແລະ ລັດຖະບານໄດ້ດີທີ່ສຸດ.
ສະນັ້ນພັກແລະລັດຖະບານຈື່ງໄດ້ສືບຕໍ່ລົງທຶນໃສ່ການພັດທະນາປັບປຸງແລະຂະຫຍາຍຕາໜ່າງໂທລະໂຄ່ງນີ້ຕໍ່ໄປ,ເຊີ່ງມາຮອດປະຈຸບັນທົ່ວປະເທດມີລະບົບໂທລະໂຄ່ງນໍາໄຊ້ແລ້ວ 70% ສ່ວນແຂວງເຊກອງມີໂທລະໂຄ່ງໃຊ້ 156 ບ້ານແຕ່ກໍຍັງບໍ່ທັນພຽງພໍກັບຄວາມຕ້ອງການ. ພາຍຫຼັງທີ່ໄດ້ຮັບໂທລະໂຄ່ງ 55 ຊຸດ ຄັ້ງນີ້ກໍຈະສາມາດເຮັດໃຫ້ປະຊາຊົນບ້ານເປົ້າໝາຍໄດ້ຮັບຮູ້ຂໍ້ມູນຂ່າວສານຫຼາຍຂື້ນເພື່ອໃຫ້ເຂົາເຈົ້າໄດ້ມີການປັບປຸງຊີວິດການເປັນໃຫ້ດີຂື້ນ.
CG: ມອບໂທລະໂຄ່ງ 55 ຊຸດ ໃຫ້ແຂວງເຊກອງ
