ກອງປະຊຸມຄະນະຊີ້ນໍາລະດັບຊາດ ເພື່ອຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ(ປພຍ) ປະຈໍາປີ 2023 ຈັດຂຶ້ນໃນວັນທີ 20 ມິຖຸນາ 2023 ຢູ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ຮອງປະທານ ແລະ ຜູ້ປະຈໍາການຄະນະຊີ້ນໍາລະດັບຊາດເພື່ອຈັດຕັ້ງປະຕິບັດ ປພຍ, ມີບັນດາລັດຖະມົນຕີ, ຮອງລັດຖະມົນຕີ, ຫົວໜ້າ ແລະ ຮອງຫົວໜ້າອົງການທຽບເທົ່າກະຊວງ, ຫົວໜ້າກົມ, ຮອງຫົວໜ້າກົມ ແລະ ຜູ້ຕາງໜ້າຈາກບັນດາກະຊວງ ແລະ ຂະແໜງການທີ່ກ່ຽວຂ້ອງອ້ອມຂ້າງສູນກາງ ເຂົ້າຮ່ວມ ໂດຍຮັບການສະໜັບສະໜູນຈາກ ອົງການ ອຸຍນີເຊບ ປະຈໍາ ສປປ ລາວ.
ການຈັດກອງປະຊຸມໃນຄັ້ງນີ້, ເພື່ອທົບທວນຄືນການຈັດຕັ້ງປະຕິບັດ ປພຍ ຢູ່ ສປປ ລາວ ໄລ ຍະ 2 ປີຜ່ານມາ ແລະ ວາງທິດທາງແຜນການໃນຕໍ່ໜ້າ. ໃນນັ້ນ, ໄດ້ມີການລາຍງານຄວາມຄືບໜ້າ, ອັນພົ້ນເດັ່ນ, ຂໍ້ຄົງຄ້າງ ແລະ ສິ່ງທ້າທາຍຕ່າງໆ ໃນການຈັດຕັ້ງປະຕິບັດ ປພຍ ທີ່ເປັນບູລິມະສິດ ຂອງ ສປປ ລາວ ຕາມທີ່ໄດ້ເຊື່ອມສານເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 ກໍຄື ແຜນພັດທະນາຂອງຂະແໜງການ ໂດຍສະເພາະໃນສະພາບການທີ່ຫລາຍປະເທດໃນທົ່ວໂລກ ກໍາລັງຟື້ນຟູຈາກຜົນກະທົບຂອງການລະບາດຂອງພະຍາດໂຄວິດ-19 ກໍຄື ວິກິດການທີ່ເກີດຂຶ້ນຈາກສະ ພາບການຜັນແປໃນພາກພື້ນ ແລະ ສາກົນ, ລວມທັງການປ່ຽນແປງດິນຟ້າອາກາດ. ພ້ອມນີ້, ກອງປະຊຸມຍັງໄດ້ຮັບຟັງການສະເໜີກ່ຽວກັບ ແຜນການຮ່າງບົດລາຍງານແຫ່ງຊາດ ແບບສະໝັກໃຈ ສະບັບ 3 ຂອງ ສປປ ລາວ ທີ່ຈະນຳໄປລາຍງານຕໍ່ອົງການສະຫະປະຊາຊາດໃນກາງປີ 2024, ພ້ອມທັງໄດ້ປຶກ ສາຫາລືກ່ຽວກັບການປັບປຸງກົນໄກ ແລະ ຂອດປະສານງານ ຂອງຄະນະຊີ້ນຳລະດັບຊາດ ກໍຄື ຄະນະຈຸດປະສານງານ ເພື່ອຈັດຕັ້ງປະຕິບັດ ປພຍ ໃຫ້ມີຄວາມສອດຄ່ອງ ແລະ ມີປະສິດທິພາບຍິ່ງຂຶ້ນ.
ໂອກາດນີ້, ທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ໄດ້ເນັ້ນໜັກເຖິງຄວາມສຳ ຄັນຂອງກອງປະຊຸມໃນປີ 2023 ເຊິ່ງເປັນໄລຍະກາງສະໄໝຂອງການຈັດຕັ້ງປະຕິບັດ ວາລະ 2030 ເພື່ອການພັດທະນາແບບຍືນຍົງ ນັບແຕ່ຖືກຮັບຮອງເອົາໃນທ້າຍປີ 2015 ເປັນຕົ້ນມາ ກໍຄື ຄວາມຈຳ ເປັນໃນການສືບຕໍ່ປຶກສາຫາລືຢ່າງລະອຽດ ເພື່ອຊອກຫາແນວທາງແກ້ໄຂສິ່ງທ້າທາຍຕ່າງໆ ທີ່ເປັນສິ່ງກີດຂວາງຕໍ່ການພັດທະນາ ເພື່ອຮັບປະກັນການຈັດຕັ້ງປະຕິບັດ ປພຍ ໃຫ້ໄດ້ຕາມຈຸດປະສົງ ລະດັບຄາດໝາຍ ກໍຄື ຕົວຊີ້ບອກ ປພຍ ຂອງປະເທດເຮົາ ເຊິ່ງຈະເປັນການປະກອບສ່ວນສຳຄັນໃນຄວາມພະ ຍາຍາມພັດທະນາປະເທດ ໃຫ້ຫລຸດພົ້ນອອກຈາກສະຖານະພາບດ້ອຍພັດທະນາ ພາຍໃນປີ 2026 ຕາມການຕົກລົງຂອງສະມັດຊາໃຫຍ່ ອົງການສະຫະປະຊາຊາດ ຢ່າງມີຄຸນນະພາບ, ໂລ່ງລ່ຽນ ແລະ ຍືນຍົງ ແນໃສ່ສ້າງຄວາມເຂັ້ມແຂງໃຫ້ແກ່ ສປປ ລາວ ດ້ານການຄ້າ-ການລົງທຶນ, ການພັດທະນາຊັບພະຍາກອນມະນຸດ, ການຮັບມືກັບໄພພິບັດທຳມະຊາດ ແລະ ການປ່ຽນແປງດິນຟ້າອາກາດ ໂດຍສຸມໃສ່ການພັດທະນາແບບຍືນຍົງ ຕາມທິດເຕີບໂຕສີຂຽວ, ສະອາດ ແລະ ການຫັນເປັນທັນສະໄໝໃນອະນາຄົດ. ພ້ອມນັ້ນ, ທ່ານຮອງນາຍົກລັດຖະມົນຕີ ຍັງໄດ້ຮຽກຮ້ອງໃຫ້ທຸກກະຊວງຂະແໜງການ ແລະ ພາກສ່ວນທີ່ກ່ຽວຂ້ອງ ຕ້ອງສືບຕໍ່ເພີ່ມທະວີຄວາມເປັນເຈົ້າການໃນການປະສານງານໃຫ້ມີຄວາມກົມກຽວກັນ ພ້ອມກັນຊຸກຍູ້ການຈັດຕັ້ງປະຕິບັດ ປພຍ, ມີການເກັບກໍາຂໍ້ມູນ, ມີການຕິດຕາມປະເມີນຜົນ ແລະ ລາຍງານຢ່າງຖືກຕ້ອງ ແລະ ເປັນປົກກະຕິໃນແຕ່ລະໄລຍະ, ພ້ອມທັງສືບຕໍ່ຄວາມພະຍາ ຍາມສ້າງຄວາມເຂົ້າໃຈຢ່າງກວ້າງຂວາງ ແລະ ສົ່ງເສີມການມີສ່ວນຮ່ວມຂອງ ທຸກພາກສ່ວນໃນສັງຄົມ ລວມທັງພາກລັດ ແລະ ເອກະຊົນ ທັງຢູ່ໃນຂັ້ນສູນກາງ ແລະ ທ້ອງຖິ່ນ ເພື່ອເຮັດໃຫ້ການພັດທະນາເສດຖະກິດ-ສັງຄົມຂອງພວກເຮົາ ມີຜົນສໍາເລັດຢ່າງເປັນຮູບປະທໍາ ນັບແຕ່ນີ້ຮອດປີ 2030.
ກອງປະຊຸມຄັ້ງນີ້, ໄດ້ດຳເນີນໄປດ້ວຍຜົນສຳເລັດຢ່າງຈົບງາມ ແລະ ດ້ວຍຄວາມຮັບຜິດຊອບສູງຂອງຜູ້ແທນເຂົ້າຮ່ວມກອງປະຊຸມ ທີ່ໄດ້ມີການແລກປ່ຽນຄໍາຄິດຄໍາເຫັນກ່ຽວກັບ ການຈັດຕັ້ງປະຕິບັດ ປພຍ ຂອງຂະແໜງການຕົນເອງ ຢ່າງຕັ້ງໜ້າ ແລະ ກົງໄປກົງມາ, ພ້ອມທັງໄດ້ຮັບຮອງເອົາທິດທາງແຜນການ ສຳລັບການຈັດຕັ້ງປະຕິບັດ ປພຍ ໃນຕໍ່ໜ້າ ກໍຄື ການກະກຽມເຂົ້າຮ່ວມກອງປະຊຸມສຸດຍອດ ກ່ຽວກັບ ປພຍ (SDG Summit) ຂອງອົງການ ສປຊ ໃນເດືອນກັນຍາ 2023 ທີ່ ນິວຢອກ, ສ ອາເມລິກາ ແລະ ການຮ່າງບົດລາຍງານແຫ່ງຊາດແບບສະໝັກໃຈ ສະບັບທີ 3 ຂອງ ສປປ ລາວ ທີ່ຈະມີການນໍາສະເໜີຢູ່ກອງປະຊຸມ ເວທີການເມືອງລະດັບສູງ ສປຊ ໃນກາງປີ 2024.
ຄະນະຊີ້ນໍາລະດັບຊາດ ເພື່ອຈັດຕັ້ງປະຕິບັດເປົ້າໝາຍການພັດທະນາແບບຍຶນຍົງ ຢູ່ ສປປ ລາວ ໄດ້ຮັບການສ້າງຕັ້ງຂຶ້ນໃນປີ 2017 ພາຍໃຕ້ການເປັນປະທານຂອງທ່ານນາຍົກລັດຖະມົນຕີ ເຊິ່ງມີຈຸດ ປະສົງ ເພື່ອຊີ້ນໍາການຈັດຕັ້ງປະຕິບັດ ປພຍ ໃນລະດັບປະເທດ ເຊິ່ງແມ່ນວາລະການພັດທະນາຂອງອົງການ ສປຊ ທີ່ປະເທດສະມາຊິກ 193 ປະເທດ, ລວມທັງ ສປປ ລາວ ໄດ້ຮັບຮອງເອົາ ເພື່ອຈັດຕັ້ງປະຕິບັດໃນໄລຍະ 15 ປີ (2015-2030), ເປົ້າໝາຍການພັດທະນາແບບຍືນຍົງ ມີ 17 ເປົ້າໝາຍ ເຊິ່ງກວມເອົາຂົງເຂດການພັດທະນາເສດຖະກິດ-ສັງຄົມ, ການປົກປັກຮັກສາສິ່ງແວດລ້ອມ ແລະ ການເປັນຄູ່ຮ່ວມສາກົນເພື່ອການພັດທະນາແບບຍືນຍົງ.
ສະເພາະຢູ່ ສປປ ລາວ, ລັດຖະບານ ໄດ້ຮັບຮອງເອົາ 1 ເປົ້າໝາຍແຫ່ງຊາດ ຄື: ຊີວິດທີ່ປອດໄພຈາກລະເບີດທີ່ບໍ່ທັນແຕກ ເປັນເປົ້າໝາຍທີ 18 ເພື່ອຈັດຕັ້ງປະຕິບັດ ຢູ່ ສປປ ລາວ.
ຂ່າວ: ວຽງສະຫວັນ
