ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 18 ມິຖຸນາ ຜ່ານມາ, ຢູ່ນະຄອນໂຮ່ຈິມິນ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ປະກາດເລີ່ມລົງມືກໍ່ສ້າງໂຄງການເສັ້ນທາງອ້ອມເລກ 3 ນະຄອນໂຮ່ຈິມິນ, ໂຄງການລົງທຶນກໍ່ສ້າງທາງດ່ວນ ບຽນຮວ່າ – ຫວຸງເຕົ່າ ແລະ ໂຄງການລົງທຶນກໍ່ສ້າງທາງດ່ວນແຄ໋ງຮວ່າ – ບວນມາທວດ. ພິທີວາງສີລາລືກ ໄດ້ເຊື່ອມຕໍ່ທາງອອນລາຍ ເຖິງ 2 ຈຸດຖ່າຍທອດສົດຄື: ແຂວງບາເຣ້ຍ – ວັງເຕົ່າ ແລະ ແຂວງດັກລັກ.
ຂ່າວລະບຸວ່າ: ນີ້ແມ່ນ 3 ໂຄງການຈຸດສຸມຂອງຂະແໜງຄົມມະນາຄົມຂົນສົ່ງ ຊຶ່ງລວມຄວາມຍາວ 3 ເສັ້ນທາງແມ່ນ 247 ກິໂລແມັດ; ຈຳນວນເງິນລົງທຶນຂອງ 3 ໂຄງການແມ່ນຫຼາຍກວ່າ 115 ພັນຕື້ດົງ (ເກືອບ 5 ຕື້ໂດລາ).
ທ່ານ ຟ້າມມິງຈິງ ກ່າວຄຳເຫັນໃນພິທີວ່າ: ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກ ໄດ້ສືບຕໍ່ກຳນົດການກໍ່ສ້າງລະບົບພື້ນຖານໂຄງລ່າງທີ່ຄົບຊຸດເປັນໜຶ່ງໃນສາມບາດກ້າວບຸກທະລຸຍຸດທະສາດ. ທ່ານໃຫ້ຮູ້ວ່າ: ໃນໄລຍະປີ 2000 – 2021, ທົ່ວປະເທດໄດ້ລົງທຶນເຂົ້າໃນການກໍ່ສ້າງເສັ້ນທາງດ່ວນ ລວມຄວາມຍາວ 1.160 ກິໂລແມັດເທົ່ານັ້ນ. ຂະນະທີ່ມະຕິກອງປະຊຸມໃຫຍ່ຄັ້ງທີ XIII ຂອງພັກໄດ້ວາງຄາດໝາຍຮອດປີ 2030, ທົ່ວປະເທດສູ້ຊົນໃຫ້ມີທາງດ່ວນທັງໝົດປະມານ 5.000 ກິໂລແມັດ. ດັ່ງນັ້ນ, ໃນໄລຍະປີ 2021 – 2030, ຕ້ອງລົງທຶນກໍ່ສ້າງເສັ້ນທາງດ່ວນເພີ່ມຕື່ມເກືອບ 4 ເທົ່າ ເມື່ອທຽບໃສ່ຄວາມຍາວຂອງທາງດ່ວນທີ່ໄດ້ກໍ່ສ້າງໃນໄລຍະ 20 ປີຜ່ານມາ.
ໂຄງການເສັ້ນທາງອ້ອມເລກ 3 ມີຄວາມຍາວ ທັງໝົດເກືອບ 80 ກິໂລແມັດ ແລ່ນຜ່ານນະຄອນ ໂຮ່ຈິມິນ, ແຂວງດົ່ງນາຍ, ແຂວງບິ່ງເຢືອງ ແລະ ແຂວງລອງອານ. ຄາດວ່າຈະກໍ່ສ້າງສຳເລັດໂດຍພື້ນຖານໃນປີ 2025 ແລະ ເລີ່ມນຳໃຊ້ເປັນທາງການໃນປີ 2026. ໂຄງການທາງດ່ວນ ບຽນຮວ່າ – ຫວຸງເຕົ່າ ໄລຍະ 1 ມີຄວາມຍາວກວ່າ 50 ກິໂລແມັດ. ຄາດວ່າ, ພາຍຫຼັງກໍ່ສ້າງທາງດ່ວນສາຍນີ້ສຳເລັດແລ້ວ, ຈະໃຊ້ເວລາເດີນທາງຈາກ ນະຄອນໂຮ່ຈິມິນ ຫາ ແຂວງບາເຣ້ຍ-ວຸງເຕົ່າ ຈະໃຊ້ເວລາພຽງແຕ່ 70 ນາທີເທົ່ານັ້ນ ແທນທີ່ 150 ນາທີຄືໃນປັດຈຸບັນ. ໂຄງການທາງດ່ວນ ແຄ໋ງຮ່ວາ-ບວນມາທວດ ມີຄວາມຍາວເກືອບ 120 ກິໂລແມັດ. ຕາມແຜນການແລ້ວ, ຮອດປີ 2025, ໂຄງການຈະກໍ່ສ້າງບາງຕອນຂອງເສັ້ນທາງໃຫ້ສຳເລັດໂດຍພື້ນຖານ ແລະ ສຳເລັດການກໍ່ສ້າງທົ່ວເສັ້ນທາງໃນປີ 2026 ແລະ ນຳໂຄງການທັງໝົດເຂົ້ານຳໃຊ້ຢ່າງເປັນທາງການໃນປີ 2027.
