ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ຍີ່ປຸ່ນ ໄດ້ເພີ່ມຮ່າງກົດໝາຍໃໝ່ ໂດຍອາຍຸຄວາມຍິນຍອມໃນຍີ່ປຸ່ນໄດ້ເພີ່ມຈາກເດີມ 13 ປີ ເປັນ 16 ປີ ຫຼັງຈາກສະມາຊິກສະພານິຕິບັນຍັດຂອງປະເທດຜ່ານການປະຕິຮູບໃນກົດໝາຍອາດຊະຍາກຳທາງເພດ.
ຮ່າງກົດໝາຍໃໝ່ ຊຶ່ງລະບຸເຖິງຂໍ້ກຳນົດຂອງການດຳເນີນຄະດີການຂົ່ມຂືນ ແລະ ກຳນົດໃຫ້ການແອບເບິ່ງເປັນຄວາມຜິດທາງອາຍາ ຜ່ານສະພາສູງຂອງຍີ່ປຸ່ນດ້ວຍມະຕິທີ່ເປັນເອກະສັນ. ອາຍຸຄວາມຍິນຍອມ ຫຼື ເກນອາຍຸທີ່ມີສິດຕັດສິນໃຈ ແລະ ຍິນຍອມເລື່ອງຕ່າງໆດ້ວຍຕົນເອງຢູ່ທີ່ 16 ປີ ໃນອັງກິດ, 15 ປີໃນຝຣັ່ງ ແລະ 14 ປີໃນເຢຍລະມັນ ແລະ ຈີນ. ອີກຢ່າງໜຶ່ງ, ຍີ່ປຸ່ນກັບມີອາຍຸຄວາມຍິນຍອມພຽງແຕ່ 13 ປີ ແລະ ບໍ່ເຄີຍປ່ຽນແປງມາຕັ້ງແຕ່ປີ 1907 ຈົນເຖິງປັດຈຸບັນ. ເຖິງແມ່ນວ່າຍີ່ປຸ່ນ, ຈະແກ້ໄຂປະມວນກົດໝາຍອາຍາກ່ຽວກັບຄວາມຜິດທາງເພດຄັ້ງຫຼ້າສຸດ ໃນປີ 2017 ຊຶ່ງເປັນຄັ້ງທຳອິດໃນຮອບຫຼາຍກວ່າ 100 ປີ ແຕ່ນັກປຸກລະດົມຫຼາຍທ່ານກ່າວວ່າ: ການປະຕິຮູບຂ້າງເທິງຍັງບໍ່ພຽງພໍ ອີກທັງໃນປີ 2019 ການພົ້ນຜິດໃນຄະດີຂົ່ມຂືນຫຼາຍຄະດີຍັງສ້າງຄວາມບໍ່ພໍໃຈໃຫ້ກັບຄົນຍີ່ປຸ່ນ ແລະ ສົ່ງຜົນໃຫ້ເກີດການຊຸມນຸມທົ່ວປະເທດ. ພາຍໃຕ້ກົດໝາຍສະບັບທີ່ຜ່ານມາ, ໄອຍະການຕ້ອງພິສູດໃຫ້ໄດ້ວ່າ ຜູ້ທີ່ໄດ້ຮັບຄວາມເສຍຫາຍ ເນື່ອງຈາກຄວາມຮຸນແຮງ ແລະ ການຂົ່ມຂູ່ ຊຶ່ງນັກວິເຄາະວິຈານຈຳນວນຫຼາຍກ່າວຕອບໂຕວ່າ: ຂໍ້ກຳນົດຂ້າງເທິງເປັນການກ່າວໂທດວ່າ ຜູ້ທີ່ຕົກເປັນເຫຍື່ອບໍ່ຂັດຂືນຕໍ່ຕ້ານ ເພື່ອເອົາໂຕລອດ. ອີກຢ່າງໜຶ່ງ, ກົດໝາຍສະບັບໃໝ່ລະບຸວ່າ ຄູ່ຮັກໄວໜຸ່ມທີ່ມີອາຍຸຫ່າງກັນບໍ່ເກີນ 5 ປີ ຈະໄດ້ຮັບການຍົກເວັ້ນຈາກການຖືກດຳເນີນຄະດີ ຖ້າຫາກທັງສອງຄົນມີອາຍຸຫຼາຍກວ່າ 13 ປີ ລວມເຖິງມີລາຍການຕົວຢ່າງສຳລັບການດຳເນີນຄະດີຂົ່ມຂື່ນຕ່າງໆ ບໍ່ວ່າຈະເປັນການທີ່ຜູ້ເສຍຫາຍຢູ່ພາຍໃຕ້ອິດທິພົນຂອງສິ່ງມຶນເມົາ ຫຼື ຢາເສບຕິດ, ການຖືກເຮັດໃຫ້ຢ້ານກົວ ແລະ ຜູ້ເຮັດຜິດທີ່ໃຊ້ປະໂຫຍດຈາກສະຖານະທາງສັງຄົມ.
ນອກຈາກນີ້, ກະຊວງຍຸຕິທຳຍີ່ປຸ່ນກ່າວຕື່ມວ່າ: ກົດໝາຍດັ່ງກ່າວຍັງລະບຸເຖິງ ຄວາມຜິດຖານຂໍນັດພົບ ຊຶ່ງກຳນົດວ່າ ຜູ້ໃດທີ່ໃຊ້ການຂົ່ມຂູ່, ການຫາສິ່ງທີ່ມາດຶງດູດໃຈ ຫຼື ເງິນ ເພື່ອບີບບັງຄັບໃຫ້ຜູ້ທີ່ມີອາຍຸຕ່ຳກວ່າ 16 ປີໃຫ້ມາພົບປະເພື່ອຈຸດປະສົງທາງເພດຈະໄດ້ຮັບໂທດຕິດຄຸກສູງເຖິງ 1 ປີ ຫຼື ປັບໃໝເປັນເງິນ 500.000 ເຢນ.
