ການອະນຸລັກ-ປົກປັກຮັກສາ, ພັດທະນາ ຜະລິດຕະພັນຫວາຍ ແມ່ນໜຶ່ງວຽກງານທີ່ລັດຖະບານໃຫ້ຄວາມເອົາໃຈໃສ່ ສົ່ງເສີມປະຊາຊົນ ມີວຽກເຮັດງານທໍາ, ມີລາຍຮັບເຂົ້າຄອບຄົວ ເຮັດໃຫ້ຊີວິດການເປັນຢູ່ນັບມື້ດີຂຶ້ນ, ດັ່ງກຸ່ມຫັດຖະກຳຫວາຍບ້ານທ່າແວ້ງ ເມືອງຄຳເກີດ ແຂວງບໍລິຄຳໄຊ, ທີ່ນຳໃຊ້ຫວາຍມາຈັກສານເປັນຜະລິດຕະພັນ ສ້າງລາຍຮັບໃຫ້ສະມາຊິກ.
ທ່ານ ນາງ ຕູ່ລີ ລາດສົມບັດ ຜູ້ຊ່ວຍການຕະຫຼາດ ກຸ່ມຜະລິດບ້ານທ່າແວ້ງ ເມືອງຄໍາເກີດ ແຂວງບໍລິຄໍາໄຊ ເປີດເຜີຍວ່າ: ແຕ່ກ່ອນ ການຜະລິດເຮັດເປັນພຽງກຸ່ມນ້ອຍໆ, ແຕ່ພາຍຫຼັງໂຄງການ ການຜະລິດ ແລະ ເກັບກູ້ຫວາຍ ແລະ ໄມ້ປ່ອງແບບຍືນຍົງ ເຂົ້າໄປຊ່ວຍ ໂດຍເອົາຄູຝຶກໄປຝຶກອົບຮົມໃຫ້ ເປັນຕົ້ນແມ່ນການສອນອອກແບບລວດລາຍຕ່າງໆ ຈຸດປະສົງເພື່ອໃຫ້ສິນຄ້າອອກມາມີຫຼາຍສີສັນທີ່ສວຍງາມ ເປັນທີ່ປະຈັກຕາຂອງລູກຄ້າ, ມາເຖິງປັດຈຸບັນ ກຸ່ມດັ່ງກ່າວ ໄດ້ຂະຫຍາຍອອກເປັນວົງກວ້າງ ເພື່ອຕອບສະໜອງກັບຄວາມຕ້ອງການຂອງຜູ້ຊົມໃຊ້ ໂດຍລວບລວມເອົາຜະລິດຕະພັນມາໂຮມໄວ້ບ່ອນດຽວກັນ ຈຶ່ງພົວພັນກັບແມ່ຄ້າ ຊຶ່ງເປັນຕົວແທນໃຫ້ກັບກຸ່ມຜະລິດໂດຍກົງ, ສິນຄ້າມີທັງຕາມລາຍການທີ່ສັ່ງມາ ແລະ ຜະລິດຫຼາຍໆສະສົມໄວ້ຂາຍ, ສະເພາະກຸ່ມຫວາຍຂອງບ້ານທ່າແວ້ງ ປະກອບມີຈໍານວນ 43 ຄອບຄົວ ທີ່ເປັນສະມາຊິກ. ສິນຄ້າລາຄາຕໍ່າສຸດ 35 ພັນກີບ, ລາຄາ 5 ແສນກີບ ແມ່ນໂຄງຂອງກະເປົາ, ສ່ວນລາຄາສູງແມ່ນຕາມຮູບແບບ-ຂະໜາດຂອງກະເປົາລາຄາ 1 ລ້ານກີບ ຫາ 2 ລ້ານກີບ, ລາຍຮັບຂອງຄອບຄົວສະເລ່ຍ ຕໍ່າສຸດ 8 ແສນກີບ, ສູງສຸດ 3 ລ້ານກີບ ຫາ 4 ລ້ານກີບ, ລາຍຮັບຂອງສະມາຊິກ ແມ່ນອິງຕາມຄວາມອາດສາມາດ ໃນການຜະລິດຫຼາຍແມ່ນໄດ້ເງິນຫຼາຍ, ຜະລິດໜ້ອຍແມ່ນໄດ້ເງິນໜ້ອຍ, ວັດຖຸດິບສ່ວນໃຫຍ່ ແມ່ນຊື້ຢູ່ທົ່ວໄປຂອບເຂດຂອງເມືອງຄໍາເກີດ, ຫວາຍທີ່ປະຊາຊົນປູກເອົາເອງ, ຫວາຍທຳມະຊາດ (ຕາມປ່າ), ຫວາຍດັ່ງກ່າວ ຕ້ອງມີອາຍຸ 7 ປີຂຶ້ນໄປ ໂດຍເບິ່ງຕາມເນື້ອ ແລະ ຄວາມຍາວຂອງຫວາຍ ຄື: ຖ້າຫາກວ່າ ຫວາຍທໍາມະຊາດ ຄວາມຍາວ ຫຼາຍກວ່າ 10 ແມັດຂຶ້ນໄປ ຈຶ່ງຈະນໍາໃຊ້ໄດ້. ອາຊີບດັ່ງກ່າວ ແມ່ນອາຊີບສໍາຮອງ, ສ່ວນອາຊີບຕົ້ນຕໍ ແມ່ນເຮັດນາ-ສວນ, ຜະລິດຕະພັນ ປະກອບມີ: ໜ່ວຍກະຕ່າ, ໂຄງກະເປົາ ແລະ ກະເປົາສໍາເລັດຮູບ. ຂໍ້ສະດວກໃນການຜະລິດ ຜູ້ຜະລິດແມ່ນມີສີມືທີ່ດີ ມີຄວາມປານີດ, ເຮັດຢູ່ເຮືອນຂອງໃຜລາວ, ເຮັດເວລາໃດກໍໄດ້, ສ່ວນຂໍ້ຫຍຸ້ງຍາກ ວັດຖຸດິບຂ້ອນຂ້າງຫາຍາກ.
ທ່ານ ນາງ ຕູ່ລີ ລາດສົມບັດ ກ່າວຕື່ມວ່າ: ໃນຕໍ່ໜ້າ ກະກຽມສານກະຕ່າໃຫ້ມີຄວາມແໜ້ນໜາຕື່ມ ພ້ອມທັງຮັບປະກັນດ້ານປະລິມານ ແລະ ຄຸນນະພາບ, ມີຄວາມສວຍງາມ, ເມື່ອລູກຄ້ານໍາໃຊ້ ແມ່ນໃຫ້ກຸ້ມຄ່າກັບເງິນ ພ້ອມທັງມີແຜນປູກຫວາຍທົດແທນ, ພ້ອມທັງ ຝາກເຖິງລູກຄ້າ ຖ້າຫາກວ່າ ມີຄວາມສົນໃຈຜະລິດຕະພັນ ກໍຕິດຕໍ່ໄດ້ທີ່ກຸ່ມຫັດຖະກໍາຫວາຍບ້ານທ່າແວ້ງ ເມືອງຄໍາເກີດ ແຂວງບໍລິຄໍາໄຊ. ເພາະວ່າ ກຸ່ມດັ່ງກ່າວຍັງບໍ່ທັນມີໜ້າຮ້ານຈໍາໜ່າຍຜະລິດຕະພັນເທື່ອ, ແຕ່ຜະລິດຕະພັນ ແມ່ນໄດ້ຮັບການຕອບຮັບຈາກລູກຄ້າໄດ້ດີພໍສົມຄວນ, ປັດຈຸບັນຜະລິດຕະພັນຂອງກຸ່ມ ຂາຍພາຍໃນປະເທດເທົ່ານັ້ນ ຍັງບໍ່ທັນໄດ້ສົ່ງອອກຂາຍຕ່າງປະເທດ.
ໂດຍ: ແສງຈັນ
