ຕາມຂ່າວຈາກວິທະຍຸສາກົນຫວຽດນາມ, ເວທີປາໄສເສດຖະກິດສາກົນ St.Peters burg (SPIEF) ຄັ້ງທີ 26 ໄດ້ຈັດຂຶ້ນຢູ່ນະຄອນ St.Petersburg ເມື່ອບໍ່ດົນມານີ້ພາຍໃຕ້ຫົວຂໍ້ SPIEF 2023 ແມ່ນ “ພັດທະນາຢ່າງມີອະທິປະໄຕ-ພື້ນຖານ ຂອງໂລກທີ່ຍຸຕິທຳ. ຄວາມມານະພະຍາຍາມລວມເພື່ອຜົນປະໂຫຍດຂອງລຸ້ນຕ່າງໆ ໃນອະນາຄົດ”. ໂດຍມີຜູ້ເຂົ້າຮ່ວມປະມານ 17.000 ຄົນ ມາຈາກ 130 ປະເທດທົ່ວໂລກ ເພື່ອປຶກສາຫາລື ກ່ຽວກັບບັນດາທ່າອ່ຽງ ແລະ ແງ່ຫວັງຕົ້ນຕໍ, ບັນດາການປ່ຽນແປງທີ່ມີລັກສະນະເປັນລະບົບ ສຳລັບພື້ນຖານເສດຖະກິດທົ່ວໂລກ. ບັນດາຫົວຂໍ້ໃນລາຍການດຳເນີນທຸລະກິດຕົ້ນຕໍຂອງ SPIEF 2023, ລວມມີການຊອກຫາບັນດາກາລະໂອກາດຮ່ວມມືໃໝ່, ສ້າງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ຫລຸດຜ່ອນຄວາມບໍ່ສະເໝີພາບ ລະຫວ່າງບົດບາດຍິງ-ຊາຍ ແລະ ຄວາມທຸກຍາກ. ນອກນີ້ຍັງປຶກສາຫາລື ກ່ຽວກັບການປ່ຽນແປງທີ່ພວມເກີດຂຶ້ນໃນພື້ນຖານເສດຖະກິດຣັດເຊຍ ຫລັງຈາກຣັດເຊຍ ພວມຜະເຊີນໜ້າກັບຫລາຍ ມາດຕະການຂວ້ຳບາດຂອງຝ່າຍຕາເວັນຕົກ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
