ສະຖານທູດອິນເດຍ ປະຈຳ ສປປ ລາວ ຮ່ວມກັບ ສະມາຄົມ Art of Living ປະຈຳ ສປປ ລາວ ຈັດກິດຈະກຳສະເຫລີມສະຫລອງວັນໂຍຄະສາກົນ ຄັ້ງທີ IX ໃນຫົວຂໍ້ ໂຍຄະເພື່ອມວນມະນຸດ “Yoga for Humanity” ໃນວັນທີ 17 ມິຖຸນາ 2023 ທີ່ເດີ່ນພະທາດຫລວງວຽງຈັນ ໂດຍການເຂົ້າຮ່ວມຂອງ ທ່ານ ອາມິດ ກູມາ ກຸບຕາ ( Amit Kumar Gupta) ອຸປະທູດ ອິນເດຍ ປະຈຳ ສປປ ລາວ, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ສຸທັມ ສາກົນນິຍົມ ປະທານ ສະມາຄົມມິດຕະພາບລາວ-ອິນເດຍ ພ້ອມດ້ວຍບັນດານັກການທູດ, ການນຳຜູ້ອາວຸໂສຈາກບັນດາກະຊວງ, ສື່ມວນຊົນ ແລະ ຊາວອິນເດຍທີ່ອາໄສຢູ່ ສປປ ລາວ ຫລາຍກວ່າ 1.000 ຄົນ ເຂົ້າຮ່ວມ.
ທ່ານ ອາມິດ ກູມາ ກຸບຕາ ໄດ້ກ່າວວ່າ: ສະມັດຊາໃຫຍ່ ອົງການສະຫະປະຊາຊາດ ໄດ້ຕົກລົງເອົາວັນທີ 21 ມິຖຸນາ ຂອງທຸກໆປີເປັນວັນໂຍຄະສາກົນ. ນັບແຕ່ປີ 2015 ເປັນຕົ້ນມາ ສະຖານທູດອິນເດຍ ແລະ ລັດຖະບານລາວ ໄດ້ມີການຮ່ວມມືກັນຈັດສະເຫລີມສະຫລອງວັນໂຍຄະສາກົນໃນທຸກໆປີ, ເຊິ່ງໂຍຄະ ເປັນຂອງຂວັນອັນລ້ຳຄ່າຂອງປະເພນີບູຮານຂອງອິນເດຍ ທີ່ມອບໃຫ້ແກ່ມະນຸດ. ການຫລິ້ນກິລາໂຍຄະແມ່ນເພື່ອຜົນປະໂຫຍດຂອງທຸກຄົນ ແລະ ມີຜົນດີຕໍ່ສຸຂະພາບ, ເປັນການສ້າງຄວາມສາມັກຄີ ແລະ ເຮັດໃຫ້ຈິດໃຈມີຄວາມສະຫງົບ. ການປະຕິບັດໂຍຄະແມ່ນວິທີ ທີ່ຈະນໍາພາໄປສູ່ການມີສຸຂະພາບທີ່ດີ, ຊຶ່ງການຝຶກຊ້ອມໂຍຄະໃນມື້ນີ້ ແມ່ນດຳເນີນໂດຍຄູສອນໂຍຄະ ຈາກສູນ Art of Living ທີ່ປະຈຳຢູ່ນະຄອນຫລວງວຽງຈັນ.
ທ່ານ ກິ່ງມະໂນ ພົມມະຫາໄຊ ໄດ້ກ່າວວ່າ: ການຈັດກິດຈະກຳສະເຫລີມສະຫລອງ ວັນໂຍຄະສາກົນ ປຽບເໝືອນບຸນມະໂຫລານອັນຍິ່ງໃຫຍ່ ຂອງ ວົງຄະນະ ຍາດສາກົນ ຊຶ່ງໄດ້ເລີ່ມສະເຫລີມສະຫລອງກັນມາ ຕັ້ງແຕ່ປີ 2016. ປັດຈຸບັນ ໃນທົ່ວໂລກມີຜູ້ຝຶກຫລິ້ນໂຍຄະ ຫລາຍກວ່າ 300 ລ້ານຄົນ ແລະ ມີທ່າອ່ຽງຈະເພີ່ມຂຶ້ນຢ່າງຕໍ່ເນື່່ອງ ເພາະເປັນທີ່ຮັບຮູ້ຢ່າງກວ້າງຂວາງນໍາກັນວ່າ: ກິລາໂຍຄະ ເປັນກິລາປະເພດໜຶ່ງ ທີ່ມວນຊົນ ທຸກເພດ-ໄວ, ທຸກຊັ້ນຄົນ ໃນສັງຄົມ ສາມາດເຂົ້າເຖິງໄດ້ງ່າຍ ແລະ ເປັນກິລາຍອດນິຍົມປະເພດໜຶ່ງ ໃນໂລກ ທີ່ສາມາດຝຶກຫລິ້ນຢູ່ເຮືອນໃຜລາວໄດ້ຢ່າງສະດວກສະບາຍ. ອີກດ້ານໜຶ່ງ, ໂຍຄະ ຍັງໃຫ້ຜົນປະໂຫຍດຫລາຍຢ່າງ ຕໍ່ຄົນເຮົາ ນອກຈາກ ຈະເປັນການອອກກໍາລັງກາຍໂດຍທົ່ວໄປແລ້ວ, ແຕ່ຍັງເປັນການຊ່ວຍເສີມສ້າງພະລັງຈິດ-ພະລັງກາຍຂອງຄົນເຮົາໃຫ້ມີຄວາມເຂັ້ມແຂງຂຶ້ນຕື່ມອີກດ້ວຍ. ນອກຈາກນັ້ນ, ການຝຶກຫລິ້ນໂຍຄະ ຍັງສາມາດຊ່ວຍບັນເທົາຄວາມຕຶງຄຽດ ແລະ ຄວາມກັງວົນ ໃຫ້ແກ່ ຄົນເຮົາໄດ້ອີກ. ສິ່ງສໍາຄັນທີ່ສຸດແມ່ນ ໂຍຄະ ໄດ້ ມີການປະກອບສ່ວນທີ່ສໍາຄັນ ເຂົ້າໃນການສົ່ງເສີມ ສັນຕິພາບ, ມິດຕະພາບ ແລະ ຄວາມຜາສຸກ ລະຫວ່າງ ບັນດາປະຊາຊາດ ຢູ່ໃນໂລກ ແລະ ຫວັງວ່າບັນດາທ່ານທີ່ເຂົ້າມາຮ່ວມງານ ໃນມື້ນີ້ ຈະເປັນກໍາລັງແຮງອີກແຮງໜຶ່ງ ໃນການຊ່ວຍໂຄສະນາເຜີຍແຜ່ ແລະ ຊູກຍູ້ສົ່ງເສີມ ການຝຶກຫລິ້ນ ແລະ ຄຸນປະ ໂຫຍດຂອງ ກິລາໂຍຄະ ອອກສູ່ສັງຄົມ ໃຫ້ນັບມື້ນັບກວ້າງຂວາງຂຶ້ນໄປເລື້ອຍໆ.
