ສະມາຄົມມິດຕະພາບລາວ-ສ ເກົາຫລີ ຮ່ວມກັບອົງການແລກປ່ຽນວັດທະນະທໍາສາກົນ ສ ເກົາຫລີ ໄດ້ຈັດງານສະແດງວັດທະນະທຳພື້ນເມືອງ ສ ເກົາຫລີ ແລະ ການສະແດງຮ່ວມຂອງນັກສະແດງຈາກວິທະຍາໄລສິລະປະແຫ່ງຊາດ ທີ່ຫໍວັດທະນະທຳແຫ່ງຊາດ, ນະຄອນຫລວງວຽງຈັນ. ໃຫ້ກຽດຕາງໜ້າໂດຍແມ່ນ ທ່ານ ນາງ ບົວໄຂ ເພັງພະຈັນ ຫົວໜ້າກົມສິລະປະ ແລະ ວັດທະນະທໍາ, ກະຊວງຖະ ແຫລງຂ່າວ, ວັດທະນະທຳ ແລະທ່ອງທ່ຽວ; ທ່ານ ຄຳສວຍ ແກ້ວດາລາວົງ ປະທານສະມາຄົມມິດຕະ ພາບ ລາວ-ສ ເກົາຫລີ, ທ່ານ Yang PyungSoo ປະທານອົງການແລກປ່ຽນວັດທະນະທຳສາກົນ ສ ເກົາຫລີ, ທ່ານ ຈອງ ຢອງ ຊູ (Jung Yung-soo) ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສ ເກົາຫລີ ປະຈຳ ສປປ ລາວ, ພ້ອມຫົວໜ້າຄະນະ-ນັກສະແດງສິລະປະພື້ນເມືອງ ສ ເກົາຫລີ ແລະ ຊາວນະຄອນຫລວງວຽງຈັນ ເຂົ້າຮ່ວມ.
ການສະແດງສິລະປະວັດທະນະທຳພື້ນເມືອງ ສ ເກົາຫລີ ຄັ້ງນີ້ ປະກອບດ້ວຍກອງສິລະປະການສະແດງກົກຊອງ ຮັນອູຣິຊິວເບີ, ກອງສະແດງສິລະປະດາມຢາງ, ກອງສະແດງສິລະປະພື້ນເມືອງເກົາຫລີ, ກອງສິລະປະກວາງຈູ, ກອງສະແດງສິລະປະກວາງຈຸບິດໂກທຶນຮັນອຸຣິຢອນເຮ, ກອງສິລະປະດົນຕີຢາງຈຸ, ກອງສິລະປະໂກຢາງ, ກອງສິລະປະກອນຟ້ອນແດກູ ຈອງຮອງສຸກ, ກອງສິລະປະດົນຕີແດກູຢອງ ທີ່ໄດ້ນໍາເອົາອາລົມຈິດ, ຄວາມເບີກບານມ່ວນຊື່ນ ທີ່ສ່ອງແສງໃຫ້ເຫັນວິຖີຊີວິດ ແລະວັດທະນະທໍາ ອັນສວຍສົດງົດງາມຂອງຊາວເກົາຫລີ ມາສູ່ປະຊາຊົນລາວ ເພື່ອເປັນການຮັດແໜ້ນຄວາມສາມັກຄີ ທັງເປັນການ ແລກປ່ຽນການສະແດງສີລະປະວັນນະຄະດີ, ວັດທະນະທຳ ສ້າງຄວາມເຂົ້າໃຈເຊິ່ງກັນ ແລະ ກັນ ລະຫວ່າງປະຊາຊົນສອງຊາດ, ທັງເປັນການສະເຫລີມສະຫລອງ ວັນສ້າງຕັ້ງການພົວພັນການທູດ ລະຫວ່າງ ສປປ ລາວ ແລະ ສ ເກົາຫລີ ຄົບຮອບ 28 ປີ (25/10/1995-25/10/2023) ທີ່ຈະມາເຖິງໃນນີ້.
ໂອກາດດັ່ງກ່າວ, ທ່ານ ຄຳສວຍ ແກ້ວດາລາວົງ ໄດ້ມີຄໍາເຫັນວ່າ: ຄະນະຂອງອົງການແລກປ່ຽນການສະແດງສິລະປະວັດທະນະທໍາ ສາກົນ ສ ເກົາຫລີ ໄດ້ເຄີຍນຳພາຄະນະມາສະແດງຢູ່ສປປ ລາວ ແລ້ວຄັ້ງໜຶ່ງໃນປີ 2017 ເພື່ອເປັນການສະເຫລີມສະຫລອງວັນສ້າງຕັ້ງການພົວພັນການທູດ ລະຫວ່າງ ສປປ ລາວ ແລະ ສ ເກົາຫລີ ຄົບຮອບ 22 ປີ ຢ່າງມີຜົນສໍາເລັດອັນຈົບງາມ ເຊື່ອໝັ້ນວ່າ: ໃນປີ 2025 ຊຶ່ງເປັນການສະເຫລີມສະຫລອງ ວັນສ້າງຕັ້ງສາຍພົວພັນການທູດ ລະຫວ່າງສອງປະເທດພວກເຮົາ ຄົບຮອບ 28 ປີ, ຄະນະສີລະປະດັ່ງກ່າວຈະສືບຕໍ່ມາສະແດງໃຫ້ພີ່ນ້ອງປະຊາຊົນລາວບັນດາເຜົ່າ ໄດ້ຮັບຊົມ, ຮຽນຮູ້ ແລະເຂົ້າໃຈສິລະປະ, ວັດທະນະທໍາອັນໂດດເດັ່ນ, ເປັນເອກະລັກສະເພາະ ແລະ ມີຊື່ສຽງໂດ່ງດັງທົ່ວໂລກນັ້ນ ມາສະແດງອີກໃນຕໍ່ໜ້າ.
ທ່ານທູດ ຈອງ ຢອງ ຊູ ໄດ້ກ່າວວ່າ: ສ ເກົາຫລີ ແລະ ສປປ ລາວ ຫາກໍ່ສ້າງຕັ້ງສາຍພົວພັນການທູດນໍາກັນ ໃນປີ 1995, ແຕ່ວ່າ ສອງປະເທດພວກເຮົາ ສາມາດບັນລຸການຮ່ວມມືໃນຫລາຍຂົງເຂດ ກາຍມາເປັນຄູ່ຮ່ວມພັດທະນາ ທີ່ສໍາຄັນໄດ້ໃນມື້ນີ້. ສໍາລັບການຮ່ວມມືຂອງສອງປະເທດ ທາງດ້ານການຄ້າ ແລະ ການຮ່ວມມື ເພື່ອການພັດທະນາ ຖືວ່າ ສ ເກົາຫລີ ນອນໃນລະຫວ່າງອັນດັບທີ 2 ຫາອັນດັບທີ 5 ຊຶ່ງເຫັນໄດ້ວ່າການພົວພັນຮ່ວມມື ຂອງສອງປະເທດ ໄດ້ຮັບການຟື້ນຟູຄືນໃຫມ່ຢ່າງໄວວາ ພາຍຫລັງການສິ້ນສຸດຂອງການລະບາດພະຍາດໂຄວິດ. ສະເພາະໃນ 4 ເດືອນຕົ້ນປີ 2023 ນີ້ ກໍມີນັກທ່ອງທ່ຽວ ສ ເກົາຫລີ ມາທ່ຽວສປປ ລາວ ຫລາຍກວ່າ 5 ໝື່ນຄົນ ແລະ ກໍມີແຮງງານລາວຈໍານວນຫລາຍ ໄດ້ໄປເຮັດວຽກຢູ່ສ ເກົາຫລີ ໃນຂະແຫນງກະສິກໍາ ແລະໂຮງຈັກໂຮງງານ ຊຶ່ງທ່ານທູດຫວັງວ່າ ການແລກປ່ຽນຢ້ຽມ ຢາມ ເຊິ່ງກັນ ແລະ ກັນ ລະຫວ່າງປະຊາຊົນສອງຊາດ ຈະປະກອບສ່ວນອັນສໍາຄັນ ເຂົ້າໃນການເສີມຂະ ຫຍາຍການຮ່ວມມືຂອງສອງປະເທດ ໃຫ້ມີບາດກ້າວພົ້ນເດັ່ນຂຶ້ນຕື່ມ.
ຂ່າວ: ຣັດສະໝີ ດວງສັດຈະ
