ໃນວັນທີ 14 ມິຖຸນາ ນີ້ ທີ່ຫ້ອງວ່າການສໍານັກງານນາຍົກລັດຖະມົນຕີ (ຫສນຍ), ອົງຄະນະພັກ ຫສນຍ ໄດ້ຈັດກອງປະຊຸມເຜີຍແຜ່ເອກະສານຕ່າງໆຂອງພັກ ເພື່ອກະກຽມໃຫ້ແກ່ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ຫສນຍ ສະໄໝທີ V, ພາຍໃຕ້ການເປັນປະທານ ຂອງສະຫາຍ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະພັກ ລັດຖະມົນຕີ ຫົວໜ້າ ຫສນຍ; ມີສະຫາຍ ກຳມະການສູນກາງພັກ, ລັດຖະມົນຕີ ປະຈຳ ສນຍ, ບັນດາສະຫາຍຄະນະປະຈໍາພັກ, ຄະນະບໍລິຫານງານພັກ ຫສນຍ, ຄະນະພັກຮາກຖານ, ຄະນະໜ່ວຍພັກຮາກຖານ ແລະ ສະມາຊິກພັກສົມບູນ ທີ່ຂຶ້ນກັບອົງຄະນະພັກ ຫສນຍ ເຂົ້າຮ່ວມ.
ເອກະສານ ທີ່ນຳມາເຜີຍແຜ່ໃນຄັ້ງນີ້ ປະກອບມີ: ຄຳສັ່ງ ຂອງຄະນະເລຂາທິການສູນກາງພັກ ສະບັບເລກທີ 268/ຄລສພ, ລົງວັນທີ 20 ມັງກອນ 2023; ຄຳແນະນຳ ຂອງຄະນະຈັດຕັ້ງສູນກາງພັກ ສະບັບເລກທີ 25/ຄຈສພ, ລົງວັນທີ 24 ມັງກອນ 2023; ຄຳແນະນຳຂອງຄະນະກວດກາສູນກາງພັກ ສະບັບເລກທີ 74/ຄກສພ, ລົງວັນທີ 27 ມີນາ 2023; ແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 51/ຄຈສພ, ລົງວັນທີ 24 ມີນາ 2023; ມາດຖານຂອງພະນັກງານນຳພາຄຸ້ມຄອງ ສະບັບເລກທີ 030/ຄຈສພ, ລົງວັນທີ 3 ມັງກອນ 2018; ແລະ ກົດລະບຽບຂອງພັກ ສະໄໝ ທີ XI ທີ່ຕິດພັນກັບເນື້ອໃນກອງປະຊຸມຄົບຄະນະກາງສະໄໝເປັນຕົ້ນ: ມາດຕາ 1, 6, 29, ແລະ ຂໍ້ ກ, ຂ, ຄ ຂອງມາດຕາ 33).
ຈຸດປະສົງ ຂອງການເຜີຍແຜ່ເອກະສານໃນຄັ້ງນີ້ ເພື່ອເຮັດໃຫ້ສະມາຊິກພັກສົມບູນ ທີ່ຂຶ້ນກັບອົງຄະນະພັກ ຫສນຍ ໄດ້ຮັບຮູ້ ແລະ ເຂົ້າໃຈ ເປັນເອກະພາບ ກ່ຽວກັບຈຸດປະສົງ, ລະດັບຄາດໝາຍ, ຄວາມໝາຍຄວາມສຳຄັນ, ຂັ້ນຕອນ, ວິທີການ, ແຜນການ, ເນື້ອໃນ ແລະ ເນື້ອແທ້ ຂອງການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ ເວົ້າລວມ, ເວົ້າສະເພາະ ການດຳເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ສະໄໝທີ V ຂອງ ຫສນຍ ທີ່ຈະຈັດຂຶ້ນໃນຕໍ່ໜ້ານີ້ ໃຫ້ໄດ້ຮັບຜົນສຳເລັດ ຕາມຈຸດປະສົງ ແລະ ລະດັບຄາດໝາຍ ທີ່ກຳນົດໄວ້.
ໃນໂອກາດນີ້, ຜູ້ເຂົ້າຮ່ວມກອງປະຊຸມ ຍັງໄດ້ຮັບຟັງການປະກາດການຈັດຕັ້ງ ຈາກສະຫາຍ ນາງ ບຸນໜັກ ດາລາງາແກ້ວ ຄະນະພັກ ຫສນຍ ຫົວໜ້າກົມຈັດຕັ້ງ ແລະ ພະນັກງານ ຫສນຍ ໂດຍຜ່ານຂໍ້ຕົກລົງ ຂອງຫ້ອງວ່າການສູນກາງພັກ ກ່ຽວກັບການແຕ່ງຕັ້ງ 2 ສະຫາຍ ເປັນເລຂານຸການປະຈຳກົມການເມືອງສູນກາງພັກ.
ຜ່ານການຮັບຟັງການເຜີຍແຜ່ເອກະສານຕ່າງໆ ແລະ ປະກາດການຈັດຕັ້ງດັ່ງກ່າວ, ສະຫາຍປະທານກອງປະຊຸມ ໄດ້ໃຫ້ກຽດມີຄຳເຫັນສະຫຼຸບສັງລວມເນື້ອໃນສຳຄັນຂອງການດຳເນີນກອງປະຊຸມ ໃນຄັ້ງນີ້, ພ້ອມທັງ ໃຫ້ກຽດໂອ້ລົມ ແລະ ເນັ້ນໜັກຕໍ່ຜູ້ເຂົ້າຮ່ວມກອງປະຊຸມຄັ້ງນີ້ ໃຫ້ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ຄະນະພັກຮາກຖານແຕ່ລະຂັ້ນ ພາຍໃນ ຫສນຍ ສົມທົບກັບຄະນະຮັບຜິດຊອບ ຮີບຮ້ອນກະກຽມ ແລະ ດຳເນີນກອງປະຊຸມກາງສະໄໝໃນຂັ້ນຂອງຕົນ ໃຫ້ຖືກຕ້ອງ ແລະ ສອດຄ່ອງກັບລະບຽບການທີ່ກ່ຽວຂ້ອງ, ໃຫ້ສຳເລັດຕາມຈຸດປະສົງ ແລະ ລະດັບຄາດໝາຍທີ່ກຳນົດໄວ້ ໂດຍລົງເລິກຊອກໃຫ້ເຫັນດ້ານດີ, ສາເຫດດ້ານອ່ອນ ແລະ ມາດຕະການແກ້ໄຂ ໃຫ້ມີການຫັນປ່ຽນເກີດເປັນຮູບປະທຳຕົວຈິງ; ພ້ອມທັງຮຽກຮ້ອງສະມາຊິກພັກ ທຸກສະຫາຍ ຈົ່ງເຊີດຊູຈິດໃຈຟົດຟື້ນປະຕິວັດ ເຂົ້າໃນການດຳເນີນກອງປະຊຸມກາງສະໄໝ ໃນຂັ້ນຂອງຕົນ ໂດຍໃຫ້ຖືເປັນບັ້ນປັບປຸງການຈັດຕັ້ງ, ປັບປຸງຕົນເອງ ແລະ ປັບປຸງປົວແປງພັກ ເຮັດໃຫ້ການຈັດຕັ້ງ ແລະ ສະມາຊິກພັກ ໃນໄລຍະທ້າຍສະໄໝ ສືບຕໍ່ມີຄວາມປອດໃສ, ໜັກແໜ້ນ, ເຂັ້ມແຂງ ສົມກັບມະຫາຊົນມອບຄວາມຮັບຜິດຊອບ ແລະ ໃຫ້ຄວາມເຊື່ອໝັ້ນໄວ້ວາງໃຈ.
ສໍາລັບບັນດາສະຫາຍທີ່ໄດ້ຮັບການແຕ່ງຕັ້ງຄັ້ງນີ້, ສະຫາຍປະທານກອງປະຊຸມ ໄດ້ມີຄຳເຫັນເນັ້ນໜັກ ໃຫ້ເອົາໃຈໃສ່ສືບຕໍ່ຮັດແໜ້ນຄວາມສາມັກຄີ ຊ່ວຍເຫຼືອຊຶ່ງກັນ ແລະ ກັນ, ເຄົາລົບຕໍ່ກົດໝາຍ ແລະ ລະບຽບການຕ່າງໆຢ່າງເຂັ້ມງວດ ຮັບປະກັນເຮັດໃຫ້ການປະຕິບັດໜ້າທີ່ວຽກງານຂອງການນຳ ມີຜົນສຳເລັດ, ມີປະສິດທິພາບ ແລະ ປະສິດທິຜົນສູງ; ເອົາໃຈໃສ່ກັ່ນຕອງບັນດາເອກະສານເຂົ້າ-ອອກ ເພື່ອເຮັດໃຫ້ການຕົກລົງ ແລະ ຊີ້ນຳຂອງຂັ້ນເທິງ ຖືກຕ້ອງ, ພາວະວິໄສ ແລະ ແທດເໝາະກັບຕົວຈິງ; ເອົາໃຈໃສ່ການປະສານງານ ໃຫ້ມີຄວາມໂລ່ງລ່ຽນ, ຄ່ອງແຄ້ວ ແລະ ມີປະສິດທິຜົນ ບົນພື້ນຖານ ສອດຄ່ອງກັບລະບຽບການ ແລະ ກົນໄກການເຮັດວຽກ ຂອງລັດຖະບານ ຊຸດທີ XI ກໍຄື ລະບຽບການ ແລະ ກົນໄກການເຮັດວຽກ ຂອງ ຫສນຍ.
(ຂ່າວ-ພາບ: ກົມປະຊາສຳພັນ ຫສນຍ)
