ເພື່ອເປັນການສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ລະຫວ່າງ ສອງພັກ, ສອງລັດ ລາວ-ຈີນ ແລະ ການສ້າງຄູ່ຮ່ວມຊາຕາກຳລາວ-ຈີນ ໃຫ້ເລິກເຊິ່ງຕື່ມອີກກ້າວໜຶ່ງ, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງຂອງພັກ, ລັດ ໄດ້ຢ້ຽມຢາມ ສປ ຈີນ ຕາມການເຊື້ອເຊີນຂອງ ສູນກາງພັກ, ລັດຖະບານ ສປ ຈີນ.
ຄະນະຜູ້ແທນ ໄດ້ເດີນທາງເຖິງນະຄອນຄຸນໝິງ, ແຂວງຢຸນນານ, ສປ ຈີນ ໃນວັນທີ 15 ມິຖຸນາ 2023 ຢູ່ທີ່ສະໜາມບິນ, ຄະນະໄດ້ຖືກຕ້ອນຮັບໂດຍ ສະຫາຍ ຫຼິວ ຈ້ຽນຊາວ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ, ສະຫາຍ ຫວາງ ຢູໂປ່ ກຳມະການສູນກາງພັກ ເຈົ້າແຂວງ ແຂວງຢຸນນານ, ມີບັນດາການນຳຈາກສູນກາງ ແລະ ແຂວງຢຸນນານ ຂອງ ສປ ຈີນ.
ໃນໄລຍະການເຄື່ອນໄຫວ ຢ້ຽມຢາມ ຢູ່ແຂວງຢຸນນານ, ສະຫາຍ ທອງລຸນ ສີສຸລິ ໄດ້ພົບປະກັບສະຫາຍ ຫຼີຊີ ກໍາມະການປະຈໍາກົມການເມືອງສູນກາງພັກ ປະທານຄະນະກໍາມະການກວດກາລະບຽບວິໄນສູນກາງພັກກອມມູນິດຈີນ ທີ່ໄດ້ຕາງໜ້າໃຫ້ສູນກາງພັກກອມມູນິດຈີນ ຊຶ່ງສອງຝ່າຍຕ່າງກໍໄດ້ແຈ້ງໃຫ້ກັນຊາບ ກ່ຽວກັບສະພາບການທີ່ພົ້ນເດັ່ນພາຍໃນພັກ-ພາຍໃນປະເທດ ແລະ ການເຄື່ອນໄຫວຕ່າງປະເທດ ໂດຍສະເພາະ ແມ່ນໝາກຜົນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ປະຊາຊົນ ປະຕິວັດລາວ ແລະ ກອງປະຊຸມໃຫຍ່ຄັ້ງທີ XX ຂອງພັກກອມມູນິດຈີນ, ທີ່ທັງສອງຝ່າຍຍາດມາໄດ້ໃນໄລຍະຜ່ານມາ.
ສະຫາຍ ທອງລຸນ ສີສຸລິດ ໄດ້ຝາກຄຳຢື້ຢາມຖາມຂ່າວອັນອົບອຸ່ນ ໄປຍັງ ສະຫາຍ ສີ ຈິ້ນຜິງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ ປະທານປະເທດ ແຫ່ງ ສປ ຈີນ ເນື່ອງໃນໂອກາດວັນເກີດ ຄົບຮອບ 70 ປີ ແລະ ໄດ້ຕີລາຄາສູງ ຕໍ່ຜົນສຳເລັດອັນຍິ່ງໃຫຍ່ ໃນການສ້າງສາພັດທະນາປະເທດຊາດ ທີ່ພັກ, ລັດ ແລະ ປະຊາຊົນຈີນອ້າຍນ້ອງ ຍາດມາໄດ້ຕະຫຼອດໄລຍະຜ່ານມາ. ພ້ອມທັງສະແດງຄວາມເຊື່ອໝັ້ນຢ່າງໜັກແໜ້ນວ່າ: ພາຍໃຕ້ການນໍາພາອັນເຂັ້ມແຂງ ແລະ ສະຫຼາດສ່ອງໃສຂອງສູນກາງພັກກອມມູນິດຈີນ ທີ່ມີສະຫາຍ ສີ ຈິ້ນຜິງ ເປັນແກນກາງນັ້ນ, ປະຊາຊົນຈີນອ້າຍນ້ອງ ຈະສືບຕໍ່ຍາດໄດ້ບັນດາຜົນສໍາເລັດຢ່າງຮອບດ້ານ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XX ຂອງພັກ, ບັນລຸເປົ້າໝາຍໃນການຫັນເປັນທັນສະໄໝແບບຈີນ ເພື່ອຄໍ້າປະກັນຍຸດທະສາດການພັດທະນາດ້ວຍຄຸນນະພາບສູງຂອງຈີນ ແລະ ເປັນພື້ນຖານອັນໜັກແໜ້ນໃຫ້ແກ່ການບັນລຸເປົ້າໝາຍ ສ້າງປະເທດຈີນ ໃຫ້ກາຍເປັນປະເທດສັງຄົມນິຍົມທີ່ທັນສະໄໝເຂັ້ມແຂງ, ຈະເລີນຮຸ່ງເຮືອງ, ປະຊາທິປະໄຕ, ສີວິໄລ, ກົມກຽວປອງດອງ ແລະ ສວຍງາມ.
ສະຫາຍ ຫຼີຊີ ໄດ້ນຳເອົາຄຳຢື້ຢາມຖາມຂ່າວ ຂອງ ສະຫາຍ ສີ ຈິ້ນຜິງ ເຖິງ ສະຫາຍ ທອງລຸນ ສີສຸລິດ ສະແດງຄວາມຊົມເຊີຍ ຕໍ່ຜົນສຳເລັດຂອງກອງປະຊຸມຄົບຄະນະ ຄັ້ງທີ 6 ສະໄໝ XI ຂອງສູນກາງພັກ ປປ ລາວ ທີ່ຫາກໍສໍາເລັດບໍ່ດົນມານີ້ ແລະ ຕີລາຄາສູງ ຕໍ່ຜົນສຳເລັດໃນການສ້າງສາພັດທະນາປະເທດຊາດ ທີ່ພັກ, ລັດ ແລະ ປະຊາຊົນລາວ ຍາດມາໄດ້ ໃນໄລຍະຜ່ານມາ. ໄດ້ສະແດງຄວາມເຊື່ອໝັ້ນ ແລະ ໃຫ້ການສະໜັບບສະໜູນ ພາລະກິດສ້າງສາພັດທະນາຂອງ ສປປ ລາວໃນໄລຍະໃໝ່.
ໂອກາດດັ່ງກ່າວ, ສອງຝ່າຍ ໄດ້ຕີລາຄາສູງ ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ມີຜົນສຳເລັດຕົວຈິງ ກໍຄືການສ້າງຄູ່ຮ່ວມຊາຕາກຳ ລາວ-ຈີນ, ຈີນ-ລາວ ທີ່ທັງສອງຝ່າຍພ້ອມກັນຍາດມາໄດ້ ໃນໄລຍະຜ່ານມາ ໂດຍສະເພາະ ແມ່ນການເປີດນຳໃຊ້ເສັ້ນທາງລົດໄຟ ລາວ-ຈີນ ທີ່ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ. ໄດ້ຕີລາຄາສູງ ຕໍ່ຜົນສໍາເລັດຂອງການຢ້ຽມຢາມ ສປ ຈີນ ທາງລັດຖະກິດ ຂອງສະຫາຍ ທອງລຸນ ສີສຸລິດ ໃນທ້າຍປີ 2022 ຜ່ານມາ ກໍຄືຜົນສຳເລັດຂອງການຈັດຕັ້ງປະຕິບັດຖະແຫຼງການຮ່ວມ ທີ່ທັງສອງຝ່າຍ ໄດ້ຕົກລົງນຳກັນ. ໄດ້ພ້ອມກັນປຶກສາຫາລື ແລະ ເຫັນດີເປັນເອກະພາບນຳກັນກ່ຽວກັບ ທິດທາງແຜນການຕໍ່ໜ້າ ໃນການສຶບຕໍ່ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການສ້າງຄູ່ຮ່ວມຊາຕາກຳລາວ-ຈີນ ໃຫ້ນັບມື້ແຕກດອກອອກຜົນຍິ່ງໆຂຶ້ນ.
ສອງຝ່າຍ ຍັງໄດ້ແລກປ່ຽນທັດສະນະ ຕໍ່ກັບບັນຫາພາກພື້ນ ແລະ ສາກົນ ທີ່ທັງສອງຝ່າຍໃຫ້ຄວາມສົນໃຈ ພ້ອມທັງຢືນຢັນທີ່ຈະສືບຕໍ່ການປະສານສົບທົບ ແລະ ໃຫ້ການສະໜັບສະໜູນຊຶ່ງກັນ ແລະ ກັນ ຢ່າງສະນິດແໜ້ນ ໃນເວທີຫຼາຍຝ່າຍ. ຝ່າຍຈີນ ສະແດງຄວາມຂອບໃຈທີ່ຝ່າຍລາວ ໄດ້ໃຫ້ການສະໜັບສະໜູນ ແລະ ສົ່ງຄະນະຜູ້ແທນຂັ້ນສູງຂອງລາວ ເຂົ້າຮ່ວມບັນດາກອງປະຊຸມສາກົນ ທີ່ ສປ ຈີນ ເປັນເຈົ້າພາບ. ຝ່າຍລາວ ຕີລາຄາສູງ ຕໍ່ບົດບາດທີ່ຕັ້ງໜ້າຂອງ ສປ ຈີນ ໃນພາລະກິດເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອພັດທະນາໃນພາກພື້ນ ແລະ ສາກົນ ແລະ ພ້ອມທີ່ຈະສືບຕໍ່ໃຫ້ການສະໜັບສະໜູນ ແລະ ປະກອບສ່ວນເຂົ້າໃນການຮ່ວມມື ໃນຂອບບັນດາຂໍ້ລິເລີ່ມຕ່າງໆ ທີ່ສະເໜີອອກໂດຍຝ່າຍຈີນ.
ໃນຕອນບ່າຍຂອງວັນດຽວກັນ, ຄະນະຜູ້ແທນຂັ້ນສູງຂອງລາວ ຍັງໄດ້ໄປຢ້ຽມຢາມສູນຄົ້ນຄວ້າພຶກສາສາດ ນະຄອນຄຸນໝິງ, ໄດ້ທັດສະນະສຶກສາ ແລະ ແລກປ່ຽນບົດຮຽນ ກ່ຽວກັບວຽກງານກະສິກຳ ທີ່ທັນສະໄໝ ຂອງແຂວງຢຸນນານ. ໃນຕອນຄໍ່າ ສະຫາຍ ຫຼີ ຊີ ຍັງໄດ້ຈັດງານລ້ຽງເປັນກຽດ ໃຫ້ແກ່ ສະຫາຍ ທອງລຸນ ສີສຸລິດ ພ້ອມດ້ວຍຄະນະ.
ໂດຍ: ຄະນະພົວພັນຕ່າງປະເທດ
