ປະທານ ໄກສອນ ພົມວິຫານ ຮຽກຮ້ອງໃຫ້ພັກເຮົາເອົາໃຈໃສ່ນໍາພາ-ຊີ້ນຳ ວຽກງານສື່ມວນຊົນໃຫ້ກາຍເປັນເຄື່ອງມືອັນແຂງແຮງໃນການຮັບໃຊ້ວຽກງານໂຄສະນາແນວທາງຂອງພັກ ຊຶ່ງວຽກງານໂຄສະນາຂົນຂວາຍມະຫາຊົນຂອງພັກ ເປັນວຽກງານໜຶ່ງທີ່ສຳຄັນໃນພາລະກິດປົກປັກຮັກສາ ແລະ ສ້າງສາປະເທດຊາດ ແລະ ຕ້ອງຖືເອົາວຽກງານສື່ມວນຊົນ ເປັນປັດໄຈສຶກສາອົບຮົມພະນັກງານ, ທະຫານ, ຕຳຫຼວດ ແລະ ປະຊາຊົນທົ່ວໄປ, ປະທານ ໄກສອນ ພົມວິຫານ ໄດ້ຊີ້ແຈງວ່າ: ” ພັກເຮົາຕ້ອງຖືວິທະຍຸກະຈາຍສຽງ, ໜັງສືພິມເປັນເຄື່ອງມືອັນແຂງແຮງໃນການຮັບໃຊ້ວຽກງານໂຄສະນາແນວທາງຂອງພັກ, ຕໍ່ສູ້ຕ້ານສັດຕູ, ສຶກສາອົບຮົມປະຊາຊົນ”.
ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຂຶ້ນສະເໜີເອກະສານໃນຫົວຂໍ້: ແນວຄິດ ໄກສອນ ພົມວິຫານ ກ່ຽວກັບການນຳພາຊີ້ນຳຂອງພັກຕໍ່ວຽກງານສື່ມວນຊົນ ຕໍ່ກອງປະຊຸມສຳມະນາວິທະຍາສາດພາຍໃຕ້ຫົວຂໍ້” ແນວຄິດ ໄກສອນ ພົມວິຫານ ກ່ຽວກັບວຽກງານຖະແຫຼງຂ່າວ” ຈັດຂຶ້ນເມື່ອບໍ່ດົນມານີ້ ເພື່ອສືບຕໍ່ເສີມຂະຫຍາຍແນວຄິດ ໄກສອນ ພົມວິຫານ ກ່ຽວກັບການນຳພາ-ຊີ້ນຳຂອງພັກຕໍ່ວຽກງານສື່ມວນຊົນໃນໄລຍະໃໝ່ນັ້ນ, ພັກເຮົາສືບຕໍ່ຢືນຢັນທັດສະນະຂອງຕົນກ່ຽວກັບບົດບາດຂອງສື່ມວນຊົນຕໍ່ພາລະກິດປົກປັກຮັກສາ ສ້າງສາພັດທະນາປະເທດຊາດຄື: ເປັນອາວຸດແນວຄິດທີ່ແຫຼມຄົມຂອງພັກ ແລະ ລັດ; ເປັນເວທີຂອງມະຫາຊົນ, ເປັນສາຍໃຍຜູກພັນມະຫາຊົນກັບພັກ; ເປັນພາຫະນະສຳຄັນໂຄສະນາການພັດທະນາເສດຖະກິດ-ສັງຄົມ, ກໍ່ສ້າງພັກ ແລະ ລະບົບການເມືອງ, ເປັນເວທີເພື່ອປະຊາຊົນເຂົ້າຮ່ວມວຽກງານຄຸ້ມຄອງສັງຄົມ. ພັກເຮົາສືບຕໍ່ວາງແຜນນະໂຍບາຍພັດທະນາຢ່າງແຂງແຮງ ໄປພ້ອມກັບການຄຸ້ມຄອງລະບົບສື່ມວນຊົນໃຫ້ດີ: ດ້ານເນື້ອໃນວຽກງານສື່ມວນຊົນ, ວຽກງານພະນັກງານ, ກົນໄກການເງິນ ແລະ ສ້າງສະພາບແວດລ້ອມທີ່ສະດວກໃຫ້ແກ່ການພັດທະນາບັນດາອົງການສື່ມວນຊົນຕາມຍຸກສະໄໝ, ເສີມຂະຫຍາຍບົດຮຽນພຶດຕິກໍາແຫ່ງການໝູນໃຊ້ແນວຄິດ ໄກສອນ ພົມວິຫານ ກ່ຽວກັບການນໍາພາ-ຊີ້ນຳຂອງພັກຕໍ່ສື່ມວນຊົນລາວທີ່ຜ່ານມາ, ພັກເອົາໃຈໃສ່ເພີ່ມທະວີການນຳພາ-ຊີ້ນຳວຽກງານສື່ມວນຊົນໃນສະພາບການໃໝ່. ກ່ອນອື່ນໝົດ, ຕ້ອງຢຶດໝັ້ນການນຳພາຂອງພັກຕໍ່ສື່ມວນຊົນຢ່າງມີຫຼັກການ, ມີຂອດການນຳພາຢ່າງຄົບຊຸດຄື: ກຳນົດທິດທາງພັດທະນາ, ກຳນົດເນື້ອໃນ ແລະ ຮູບການ; ເອົາໃຈໃສ່ວຽກການຕິດຕາມ, ກວດກາ ຊຶ່ງມີບົດບາດຕັດສິນຜົນສໍາເລັດຂອງການນຳພາຂອງພັກ. ເພີ່ມທະວີການນຳພາຂອງພັກຕໍ່ວຽກງານສື່ມວນຊົນລາວໃນສະພາບການໃໝ່, ຄຽງຄູ່ກັນນັ້ນ, ການພັດທະນາເຕັກໂນໂລຊີຂໍ້ມູນ-ຂ່າວສານໄດ້ມີການຂະຫຍາຍຕົວຢ່າງໄວວາ ແລະ ສົ່ງຜົນກະທົບທັງດ້ານດີ ແລະ ດ້ານຫຍໍ້ທໍ້ຕໍ່ສັງຄົມ; ບັນດາກຸ່ມຄົນບໍ່ດີ, ອິດທິກຳລັງປໍລະປັກ, ປະຕິການໄດ້ນໍາໃຊ້ພາຫະນະສື່ສານແບບໃໝ່ໂຄສະນາ ເພື່ອທຳລາຍຄວາມສັດທາຂອງປະຊາຊົນ ຕໍ່ການນຳພາຂອງພັກ-ລັດ ແລະ ລະບອບໃໝ່ດ້ວຍຮູບການສ້າງຂ່າວປອມ ແລະ ບິດເບືອນໃສ່ຮ້າຍປ້າຍສີໃນສະພາບເງື່ອນໄຂວຽກງານປ່ຽນແປງໃໝ່ ຕ້ອງໄດ້ເພີ່ມທະວີການນຳພາຂອງພັກ, ການຄຸ້ມຄອງຂອງລັດຕໍ່ສື່ມວນຊົນລາວ ເປັນຄວາມຮຽກຮ້ອງຕ້ອງການພາວະວິໄສ, ຮີບດ່ວນ, ມີຄວາມໝາຍຄວາມສໍາຄັນທີ່ສຸດ.
ທ່ານກ່າວໃຫ້ຮູ້ອີກວ່າ: ບາງບັນຫາທີ່ຕ້ອງເອົາໃຈໃສ່ໃນການປ່ຽນແປງໃໝ່ ແລະ ເພີ່ມທະວີການນຳພາຂອງພັກ, ການຄຸ້ມຄອງຂອງລັດຕ້ອງໄປຕາມ 4 ລັກສະນະຂອງສື່ມວນຊົນຄື: ຕ້ອງມີລັກສະນະຕົວຈິງ, ສຶກສາອົບຮົມ, ແນະນຳ ແລະ ລັກສະນະຕໍ່ສູ້. ແນວຄິດ ໄກສອນ ພົມວິຫານ ກ່ຽວກັບການນຳພາ-ຊີ້ນຳຂອງພັກຕໍ່ວຽກງານສື່ມວນຊົນ ຊຶ່ງຕະຫຼອດໄລຍະແຫ່ງການປະຕິວັດປົດປ່ອຍຊາດ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດທີ່ຜ່ານມາໄດ້ເປັນທວນໄຟເຍືອງທາງອັນໃສແຈ້ງໃຫ້ແກ່ການເຄື່ອນໄຫວນຳພາ, ບູລະນະແນວທາງນະໂຍບາຍ ຂອງພັກ. ເວົ້າລວມ, ການນຳພາ-ຊີ້ນຳດ້ວຍການກຳນົດທິດພັດທະນາ, ກຳນົດເນື້ອໃນ ແລະ ຮູບການວຽກງານສື່ມວນຊົນ; ກໍ່ສ້າງບຳລຸງຖັນແຖວພະນັກງານນໍາພາ, ຄຸ້ມຄອງ ແລະ ວິຊາການຜູ້ເຮັດວຽກງານດັ່ງກ່າວ ແລະ ອື່ນໆ ອັນໄດ້ນໍາເອົາຜົນສຳເລັດອັນໃຫຍ່ຫຼວງໃນການນຳພາ-ຊີ້ນຳຂອງພັກ, ການຄຸ້ມຄອງຂອງລັດກໍຄືການເຄື່ອນໄຫວວຽກງານສື່ມວນຊົນໃນຜ່ານມາ.
ທ່ານກ່າວເນັ້ນໃຫ້ຮູ້ຕື່ມອີກວ່າ: ການນຳພາຂອງພັກຕໍ່ວຽກງານສື່ມວນຊົນໃນຕໍ່ໜ້າ ບໍ່ພຽງແຕ່ເປັນເງື່ອນໄຂ ເປັນກຳລັງແຮງຊຸກດັນທີ່ສຳຄັນ ເພື່ອເຮັດໃຫ້ວຽກງານການເມືອງແນວຄິດໃຫ້ດີ, ສ້າງຄວາມສາມັກຄີປອງດອງໃນສັງຄົມ, ປະກອບສ່ວນເຂົ້າໃນໄຊຊະນະຂອງການປະຕິບັດໜ້າທີ່ການເມືອງຂອງພັກ ແລະ ຂອງປະເທດຊາດ, ຮັບປະກັນສິດທິພາບໃນການປະດິດສ້າງຂອງສື່ມວນຊົນ, ຊ່ວຍສື່ມວນຊົນເຮັດສຳເລັດດ້ວຍຄວາມຮັບຜິດຊອບອັນໜັກໜ່ວງ, ພາລະກຳອັນສູງສົ່ງຂອງຕົນຕໍ່ປະເທດຊາດ ແລະ ປະຊາຊົນ.
