ພິທີເຊັນສັນຍາຮ່ວມມື ວ່າດ້ວຍການຮ່ວມມືໃນການອະນຸລັກ, ແລກປ່ຽນ, ຊຸກຍູ້ ແລະ ສົ່ງເສີມມໍລະດົກວັດທະນະທຳ ລະຫວ່າງກົມມໍລະດົກກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແລະ ສະ ມາຄົມແລກປ່ຽນມໍລະດົກວັດທະນະທຳ ສ ເກົາຫຼີ-ລາວ ແຫ່ງສາທາລະນະລັດເກົາຫຼີ ໄດ້ຈັດຂຶ້ນໃນວັນທີ 15 ມິຖຸນາ ຜ່ານມາ ທີ່ໂຮງແຮມແລນມາກ ນະຄອນຫຼວງວຽງຈັນ ໂດຍການເຂົ້າຮ່ວມເປັນສັກຂີພິຍານຂອງທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ, ມີຜູ້ຕາງໜ້າຈາກສະຖານທູດ ສ ເກົາຫຼີ, ຫົວໜ້າກົມ-ຮອງກົມ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ການລົງນາມຄັ້ງນີ້ມີ ທ່ານ ພະຂັນໄຊ ສີຄັນໄຊ ຫົວໜ້າກົມມໍລະດົກ ແລະ ທ່ານ ຮີ ສົບ ລີ ປະທານສະມາຄົມແລກປ່ຽນມໍລະດົກວັດທະນະທຳ ສ ເກົາຫຼີ – ລາວ ແຫ່ງສາທາລະນະລັດເກົາຫຼີ. ການລົງນາມດັ່ງກ່າວສືບເນື່ອງມາຈາກຈຸດລິເລີ່ມທີ່ທັງສອງຝ່າຍໄດ້ມີໂອກາດພົບປະກັນໃນປີ 2009 ທາງຄະນະກົມມໍລະດົກກະຊວງ ຖວທ ໄດ້ເດີນທາງໄປຮ່ວມກອງປະຊຸມ ແລະ ທັດສະນະສຶກສາແລກປ່ຽນວັດທະນະທໍາຢູ່ ສ ເກົາຫຼີ ຈາກຜົນສໍາເລັດຂອງກອງປະຊຸມດັ່ງກ່າວນັ້ນໄດ້ເຮັດໃຫ້ກົມມໍລະດົກ ແລະ ສະມາຄົມແລກປ່ຽນມໍລະດົກວັດທະນະທຳ ສ ເກົາຫຼີ-ລາວ ແຫ່ງສາທາລະນະລັດເກົາຫຼີ ໄດ້ມີການຮ່ວມມືກັນນັບຕັ້ງແຕ່ນັ້ນເປັນຕົ້ນມາ. ຈຸດປະສົງໃນການຮ່ວມມືເພື່ອເປັນການຊຸກຍູ້ສົ່ງເສີມ ແລະ ພັດທະນາວຽກງານຄຸ້ມຄອງອະນຸລັກ ປົກປັກຮັກສາມໍລະດົກວັດທະນະທໍາຂອງຊາດລາວໃຫ້ມີຄວາມເຂັ້ມແຂງຮ່ວມກັນ.
ຂ່າວ-ພາບ: ຍຸພິນທອງ+ບຸນອູ້ມ
