ວັນທີ 16 ມິຖຸນາ ນີ້ ທີ່ຫ້ອງວ່າການແຂວງຄຳມ່ວນ, ທ່ານ ວັນໄຊ ພອງສະຫວັນ ເຈົ້າ ແຂວງຄຳມ່ວນ ໄດ້ຕ້ອນຮັບການເຂົ້າພົບປະຂອງຕາງໜ້າຜູ້ໃຫ້ທຶນໂຄງການພັດທະນາຕົວເມືອງ ຕາມແລວ ທາງອະນຸພາກພື້ນ ແມ່ນໍ້າຂອງ 4 (GMS4) ໂດຍມີທ່ານ ກຽວ ຕູ (Mr. Kyaw thu) ຜູ້ຕາງໜ້າ ຈາກທະນາຄານ ADB ໃນນາມຜູ້ໃຫ້ທຶນ, ມີຄະນະຜູ້ປະສານງານໂຄງການ ແລະ ພາກສ່ວນທີ່ ກ່ຽວຂ້ອງເຂົ້າຮ່ວມ.
ທ່ານ ກຽວ ຕູ ໄດ້ແຈ້ງຈຸດປະສົງໃນການມາເຄື່ອນໄຫວຢູ່ແຂວງຄຳມ່ວນໃນຄັ້ງນີ້ ກໍເພື່ອຕິດຕາມ ຄວາມຄືບໜ້າຂອງການຈັດຕັ້ງປະຕິບັດໂຄງການພັດທະນາຕົວເມືອງທ່າແຂກ (GMS4) ປະກອບມີ 5 ໂຄງການຍ່ອຍຄື: ການກໍ່ສ້າງຮ່ອງລະບາຍນໍ້າໃນຕົວເມືອງ ຊຶ່ງມີຄວາມຄືບໜ້າແລ້ວ 43,29%, ກໍ່ສ້າງອ່າງບຳບັດນໍ້າເປື້ອນແບບບໍ່ລວມສູນ ຂະໜາດນ້ອຍ ຄືບໜ້າ 20,37%, ປັບປຸງສະໜາມກຳ ຈັດຂີ້ເຫຍື້ອແບບສຸຂະອະນາໄມ ຄືບໜ້າ 50,43%, ກໍ່ສ້າງປ້ອງກັນຕາຝັ່ງເຈື່ອນຕາມແຄມແມ່ນໍ້າຂອງ ແມ່ນໄດ້ສຳເລັດການສຳຫຼວດເກັບກຳຂໍ້ມູນຊັບສິນທີ່ຖືກຜົນກະທົບ.
ປັດຈຸບັນແມ່ນກຳລັງກະກຽມວຽກງານການຈັດຊື້-ຈັດຈ້າງ ແລະ ແກ້ໄຂບັນຫາຜົນກະທົບ ແລະ ປັບປຸງຟື້ນຟູບູລະນະໃຈກາງຕົວເມືອງເກົ່າ ແລະ ອະນຸລັກມໍລະດົກຂອງຕົວເມືອງ ເພື່ອເປັນສູນກາງການ ທ່ອງທ່ຽວ, ສົ່ງເສີມການທ່ອງທ່ຽວແບບຍືນຍົງ ແມ່ນໄດ້ສຳເລັດການສຳຫຼວດອອກແບບເບື້ອງຕົ້ນ ແລະ ກຳລັງດຳເນີນການອອກແບບລະອຽດ ຊຶ່ງໂຄງການດັ່ງກ່າວແມ່ນມີໄລຍະເວລາ 5 ປີ (2019-2023) ແລະ ໄດ້ມີການຕໍ່ອາຍຸໃນການຈັດຕັ້ງປະຕິບັດຮອດວັນທີ 30 ມິຖຸນາ 2026 ລວມມີມູນຄ່າໂຄງການ ທັງໝົດ 54,06 ລ້ານໂດລາ.
ທ່ານເຈົ້າແຂວງຄຳມ່ວນ ໄດ້ມີຄຳເຫັນສະເໜີມາຍັງຜູ້ໃຫ້ທຶນສືບຕໍ່ຕິດຕາມ ແລະ ຊຸກຍູ້ ບັນດາກິດຈະກຳຕ່າງໆ ໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນສູງ ແລະ ສຳເລັດຕາມຄາດໝາຍ ທີ່ວາງໄວ້ ພ້ອມທັງເອົາໃຈໃສ່ໃຫ້ຄວາມສຳຄັນຕໍ່ວຽກງານໂຄສະນາປະຊາສຳພັນໃຫ້ພໍ່ແມ່ປະຊາຊົນທີ່ນອນ ຢູ່ໃນຂອບເຂດໂຄງການໄດ້ຮັບຮູ້, ເຂົ້າໃຈຕໍ່ກັບຈຸດປະສົງ ແລະ ເປົ້າໝາຍຂອງໂຄງການ ແນໃສ່ເຮັດໃຫ້ ເຂົາເຈົ້າໄດ້ປະກອບສ່ວນ ແລະ ມີສ່ວນຮ່ວມໃນການປົກປັກຮັກສາ ພາຍຫຼັງໂຄງການກໍ່ສ້າງສຳເລັດ ພ້ອມນີ້ຍັງສະເໜີມາຍັງທະນາຄານ ADB ຊ່ວຍຄົ້ນຄວ້າຊອກຫາແຫຼ່ງທຶນ ເພື່ອກໍ່ສ້າງຂົວຂ້າມຫ້ວຍຊີມັງ ໃນຈຸດເຊື່ອມຕໍ່ໄປຫາທາດເມືອງເກົ່າ ເພື່ອໃຫ້ພໍ່ແມ່ປະຊາຊົນໃນເຂດດັ່ງກ່າວສາມາດທຽວໄປ-ມາ ໄດ້ສະ ດວກຂຶ້ນ.
ຂ່າວ-ພາບ: ກອງຄຳ
