ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ລໍຣິດ ປາເລັນຕີນີ ຜູ້ອຳນວຍການ ອົງການກອງທຶນອະນຸລັກທຳມະຊາດໂລກ ປະຈຳ ສປປ ລາວ ຫຼື (WWF-Laos) ໃນວັນທີ 15 ມີຖຸນາ 2023 ນີ້ ທີ່ຫ້ອງວ່າການແຂວງ ຈຳປາສັກ.
ໂອກາດນີ້, ທ່ານເຈົ້າແຂວງຈຳປາສັກ ໄດ້ສະແດງການຕ້ອນຮັບ ທ່ານຜູ້ອຳນວຍການ ອົງການກອງທຶນອະນຸລັກທຳມະຊາດໂລກປະຈຳລາວ ແລະ ຄະນະ ຊຶ່ງເປັນການປະກອບສ່ວນໃນການປັບປຸງການຄຸ້ມຄອງບໍລິຫານ ແລະ ການຮັບປະກັນຄວາມຍືນຍົງຂອງການປະມົງຄຽງຄູ່ໄປກັບການພັດທະນາ ວິຖີການດຳລົງຊີວິດແມ່ນມີຄວາມສໍາຄັນຕໍ່ການພັດທະນາຂອງ ສປປ ລາວ, ໂດຍສະເພາະແມ່ນແຂວງຈຳປາສັກ ຜ່ານການສ້າງຕັ້ງ ແນວທາງການຄຸ້ມຄອງບໍລິຫານການປະມົງແບບມີສ່ວນຮ່ວມ, ສະໜັບສະໜູນການປັບປຸງຊີວິດການເປັນຢູ່ ແລະ ຄວາມເປັນຢູ່ຂອງທ້ອງຖິ່ນ, ການປູກຈິດສຳນຶກຕໍ່ການຮັບຮູ້ດ້ານລະບຽບການ, ຕິດຕາມກວດກາປະລິມານປາ ແລະ ຄວາມຫຼາກຫຼາຍທາງຊີວະນາໆພັນທາງນ້ໍາລະຫວ່າງບັນດາໜ່ວຍງານທ້ອງຖິ່ນ ແລະ ຊຸມຊົນຕ່າງໆ. ພ້ອມກັນນັ້ນ ທ່ານເຈົ້າແຂວງຈຳປາສັກ ໄດ້ຍົກໃຫ້ຮູ້ ກ່ຽວກັບຈຸດພິເສດ, ທ່າແຮງ ທີ່ເອື້ອອຳນວຍທາງດ້ານທຸລະກິດ ທີ່ມີຄວາມຍືນຍົງ ຢູ່ແຂວງຈຳປາສັກ ນຳອີກ.
ທ່ານ ລໍຣິດ ປາເລັນຕີນີ ໄດ້ກ່າວຈຸດປະສົງ ໃນການເຂົ້າພົບປະວ່າ: ແມ່ນເພື່ອລາຍງານຜົນການຈັດຕັ້ງກອງປະຊຸມ Asia-Pacific PIA Shareholders Meeting ທີ່ໄດ້ຈັດຂຶ້ນທີ່ ແຂວງຈຳປາສັກ ໃນເດືອນກຸມພາ ຜ່ານມາ, ພ້ອມນັ້ນ ກໍເພື່ອປຶກສາຫາລື ແລະ ຂໍທິດຊີ້ນຳຈາກທ່ານເຈົ້າແຂວງ ຈຳປາສັກ ກ່ຽວກັບວຽກງານຂອງ ອົງການກອງທຶນອະນຸລັກທຳມະຊາດໂລກ ປະຈຳລາວ ຫຼື WWF-Laos ໃນການສຶກສາໂອກາດດ້ານທຸລະກິດ ທີ່ ມີຄວາມຍືນຍົງໃນແຂວງຈຳປາສັກ.
ຂ່າວ: ທັດຊະນະ, ພາບ: ພູທິບສະຫວັນ
