ໂຮງຮຽນສິລະປະແຫ່ງຊາດ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດພິທີເປີດປ້າຍເປັນວິທະຍາໄລສິລະປະແຫ່ງຊາດຢ່າງເປັນທາງການ ຂຶ້ນໃນວັນທີ 16 ມິຖຸນາ ນີ້ ທີ່ໂຮງຮຽນດັ່ງກ່າວ ໂດຍການເປັນກຽດເຂົ້າຮ່ວມຂອງ ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ, ມີທ່ານ ນາງ ສີສຸກ ວົງວິຈິດ ຮອງລັດຖະມົນຕີກະຊວງສຶກສາທິການ ແລະ ກິລາ (ສສກ), ມີຮອງລັດຖະມົນຕີ, ອະດີດຮອງລັດຖະມົນຕີກະຊວງ ຖວທ, ມີຜູ້ອຳນວຍການ, ຄູ-ອາຈານ, ນັກຮຽນ-ນັກສຶກສາ ພ້ອມດ້ວຍແຂກຖືກເຊີນທີ່ກ່ຽວຂ້ອງເຂົ້າຮ່ວມ. ທ່ານ ວຽງພອນ ສຸຂະວົງ ຜູ້ອຳນວຍການວິທະຍາໄລສິລະປະແຫ່ງຊາດ ກ່າວວ່າ: ຕະຫຼອດໄລຍະແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງວິທະຍາໄລສິລະປະແຫ່ງຊາດໄດ້ສໍາເລັດການບໍາລຸງ, ກໍ່ສ້າງບຸກຄະລາກອນທາງດ້ານສິລະປະການສະແດງມາຮອດປັດຈຸບັນແມ່ນຮຸ່ນທີ 34, ໄດ້ຫຼາຍກວ່າ 2.000 ຄົນ, ໄດ້ຮັບໃຊ້ວຽກງານຢູ່ບັນດາຂົງເຂດວຽກງານຕ່າງໆເປັນຕົ້ນແມ່ນ: ໃນຂົງເຂດກອງສະແດງຕ່າງໆທັງສູນກາງ, ທ້ອງຖິ່ນ, ຂົງເຂດການຄົ້ນຄວ້າ, ວິໄຈດ້ານທິດສະດີ, ປະດິດແຕ່ງການສະແດງສິລະປະ-ດົນຕີ ແລະ ອື່ນໆ. ປັດຈຸບັນມີຄູ-ອາຈານລວມທັງນັກຮຽນ-ນັກສຶກສາໄດ້ມີຜົນສໍາເລັດຫຼາຍດ້ານຢູ່ພາຍໃນໂຮງຮຽນແຫ່ງນີ້ເປັນຕົ້ນແມ່ນໄດ້ຮັບນາມມະຍົດສິລະປິນແຫ່ງຊາດ-ສິລະປິນດີເດັ່ນ, ນາມມະຍົດວິຊາການສາຂາຕ່າງໆ ແລະ ສາມາດຍາດໄດ້ຫຼຽນລາງວັນໃນການແຂ່ງຂັນສິລະປະ-ດົນຕີໃນລະດັບຕ່າງໆຢູ່ທັງພາຍໃນປະເທດ ແລະ ຕ່າງປະເທດດ້ວຍຜົນງານ ແລະ ໝາກຜົນທີ່ໂຮງຮຽນຍາດມາໄດ້ໃນຕະຫຼອດໄລຍະທີ່ຜ່ານມາ, ຍ້ອນມີພັກນໍາພາ-ຊີ້ນໍາ, ລັດຄຸ້ມຄອງຢ່າງສັກສິດ. ສະນັ້ນ, ພັກ ແລະ ລັດຈຶ່ງໄດ້ມອບຫຼຽນໄຊແຮງງານຊັ້ນ I, ຊັ້ນ II ແລະ ຊັ້ນ III ປະເພດຕ່າງໆໃຫ້ໃນໄລຍະຜ່ານມາ.
ຕະຫຼອດໄລຍະໃນການປັບປຸງ, ສ້າງຫຼັກສູດ ແລະ ການຍົກລະດັບໂຮງຮຽນຂຶ້ນເປັນສະຖາບັນສິລະປະການສະແດງແຫ່ງຊາດໃນເບື້ອງຕົ້ນແມ່ນໄດ້ລິເລີ່ມມາແຕ່ເຂົ້າສົກຮຽນໃໝ່ 1 ກັນຍາ 2020 ຕໍ່ມາກໍໄດ້ສະເໜີຍົກລະດັບຂຶ້ນເປັນວິທະຍາໄລສິລະປະແຫ່ງຊາດໃຫ້ສອດຄ່ອງກັບລະບົບ, ລະດັບຫຼັກສູດການຮຽນ-ການສອນຂອງຄູ-ອາຈານທີ່ມີຢູ່ໃນປັດຈຸບັນ. ມາຮອດວັນທີ 7 ທັນວາ 2022 ໄດ້ມີຂໍ້ຕົກລົງວ່າດ້ວຍການຍົກຖານະຈາກໂຮງຮຽນສິລະປະແຫ່ງຊາດຂຶ້ນເປັນວິທະຍາໄລສິລະປະແຫ່ງຊາດ ໄດ້ຖືກຮັບຮອງຢ່າງເປັນທາງການສະບັບເລກທີ 1152/ຖວທ ແລະ ຜ່ານມາມໍ່ໆນີ້ໄດ້ມີຂໍ້ຕົກລົງຂອງລັດຖະມົນຕີກະຊວງ ຖວທ ວ່າດ້ວຍການຈັດຕັ້ງ ແລະ ເຄື່ອນໄຫວຂອງວິທະຍາໄລສິລະປະແຫ່ງຊາດຕາມຂໍ້ຕົກລົງສະບັບເລກທີ 305/ຖວທ, ລົງວັນທີ 12 ເມສາ 2023 ໄດ້ຖືກຮັບຮອງມີຊື່ພາສາລາວວ່າ: ວິທະຍາໄລສິລະປະແຫ່ງຊາດ, ພາສາອັງກິດວ່າ: National College of Arts, ປະກອບມີ 5 ຂະແໜງ, ມີ 4 ພາກວິຊາຄື: ພາກວິຊາດົນຕີຕາເວັນຕົກ, ພາກວິຊາດົນຕີພື້ນເມືອງ, ພາກວິຊາຟ້ອນ ແລະ ພາກວິຊາຮ້ອງ ແລະ ຂັບລຳ ແລະ 2 ສະພາຄື: ສະພາທີ່ປຶກສາ ແລະ ສະພາວິຊາການຂອງວິທະຍາໄລສິລະປະແຫ່ງຊາດ. ໃນພິທີທ່ານນາງ ສວນສະຫວັນ ວິຍະເກດ ຍັງໄດ້ໃຫ້ກຽດໂອ້ລົມ, ຮ່ວມຕັດແຖບຜ້າ, ລັ່ນຄ້ອງ 9 ບາດ ເພື່ອເປັນສິລິມຸງຄຸນໃນການເປີດປ້າຍຄັ້ງນີ້.
ຂ່າວ-ພາບ: ວັນເພັງ
