ຂ່າວຕ່າງປະເທດລາຍງານ ເມື່ອວັນທີ 15 ມິຖຸນາ ຜ່ານມາ, ນັກການເມືອງລະດັບສູງຂອງປະເທດຝຣັ່ງໄດ້ເປີດເຜີຍບົດລາຍງານໂດຍລະບຸວ່າ: ພວກເຂົາໄດ້ຄາດຄະເນວ່າ ທົ່ວໂລກຈະເລີ່ມອອກກົດລະບຽບ ເພື່ອກຳກັບເບິ່ງແຍງເຕັກໂນໂລຊີປັນຍາປະດິດ (AI) ພາຍໃນທ້າຍປີນີ້.
ບົດລາຍງານດັ່ງກ່າວມີຂຶ້ນຂະນະທີ່ AI ກໍາລັງເປັນທີ່ໜ້າສົນໃຈຢ່າງຫຼວງຫຼາຍ ຊຶ່ງເປັນຜົນມາຈາກການເຕີບໂຕຢ່າງວ່ອງໄວຂອງແຊັດບອດ (ChatGPT) ແລະ ຍັງຄົງເຕີບໂຕຢ່າງຕໍ່ເນື່ອງ ໃນຂະນະທີ່ລັດຖະບານທົ່ວໂລກກຳລັງປຶກສາຫາລືກັນວ່າ ຄວນຈະຄວບຄຸມເຕັກໂນໂລຊີນີ້ໄດ້ແນວໃດ. ເຖິງຢ່າງໃດກໍຕາມ, ຂະນະນີ້ຍັງບໍ່ມີມະຕິຈາກໜ່ວຍງານກຳກັບເບິ່ງແຍງທົ່ວໂລກວ່າ ຄວນຈະຄວບຄຸມ ແລະ ຈັດການ AI ແນວໃດ ທາງດ້ານສະຫະພາບເອີຣົບ (EU) ກໍໃຊ້ແນວທາງທີ່ແຕກຕ່າງກັນໃນການກຳນົດ ກົດລະບຽບກ່ຽວກັບເຕັກໂນໂລຊີນີ້ ໂດຍຖ້າຫາກມີຂອບການກຳກັບເບິ່ງແຍງໃນລະດັບໂລກຈະຖືວ່າເປັນຄວາມກ້າວໜ້າທີ່ສຳຄັນຫຼາຍ. ຝຣັ່ງຫວັງວ່າ ປະເທດຕົນເອງຈະເປັນສູນກາງການພັດທະນາ AI ຂອງເອີຣົບ ເຖິງແມ່ນວ່າ EU ຈະເປັນຜູ້ຊຸກຍູ້ດ້ານກົດລະບຽບເປັນຄັ້ງທຳອິດກໍຕາມ ໂດຍທ່ານ ເອັມມານູແອວ ມາຄຣົງ ປະທານາທິບໍດີຝຣັ່ງພ້ອມກັບທ່ານ ບຣູໂນ ເລີແມ ລັດຖະມົນຕີກະຊວງການເງິນຝຣັ່ງ ແລະ ທ່ານ ຊອງ-ໂນແອວ ບາໂຣ ລັດຖະມົນຕີກະຊວງດີຈີຕອນ ຕ່າງກໍສະແດງຄວາມຄິດເຫັນພາຍໃນກອງປະຊຸມວີວາເທັກ (VivaTech) ວ່າຕ້ອງໃຫ້ມີກົດລະບຽບລະດັບໂລກໃນດ້ານ AI.
ທ່ານ ເອັມມານູແອວ ມາຄຣົງ ກ່າວວ່າ: ຈາກມຸມມອງຂອງທ່ານ ທ່ານຄິດວ່າພວກເຮົາຈຳເປັນຕ້ອງມີກົດລະບຽບ ແລະ ທ່ານຄິດວ່າ ພວກເຮົາຕ້ອງການກົດລະບຽບລະດັບໂລກ. ທາງດ້ານທ່ານ ຊອງ-ໂນແອວ ບາໂຣ ກ່າວວ່າ: ໃນໄລຍະທ້າຍປີນີ້ ຫຼັກການສຳຄັນບາງປະການທີ່ພວກເຮົາຕ້ອງການ ເພື່ອຄວບຄຸມ AI ໃນກຸ່ມປະເທດຈີ7 (G7) ແລະ ຫຼາຍໆປະເທດທີ່ມີແນວຄວາມຄິດດຽວກັນຈະເລີ່ມປະກົດຂຶ້ນ. ທັງນີ້, ກຸ່ມ G7 ໄດ້ຕົກລົງຮ່ວມກັນໃນປີນີ້ ເພື່ອຈັດຕັ້ງຄະນະເຮັດວຽກເພື່ອພິຈາລະນາບັນຫາທີ່ອາດຈະເກີດຂຶ້ນຈາກ AI.
