The Times ລາຍງານວ່າ ສະໂມສອນພຣີເມຍລີກ ກໍາລັງພິຈາລະນາການນໍາກົດເພດານຄ່າຈ້າງມາໃຊ້ ດ້ວຍການກໍານົດໃຫ້ຂຶ້ນຢູ່ກັບລາຍໄດ້ດ້ານລິຂະສິດທິການຖ່າຍທອດສົດຂອງທີມທີ່ຈົບອັນດັບສຸດທ້າຍ.
ຂໍ້ສະເໜີດັ່ງກ່າວ ເປັນຄວາມພະຍາຍາມທີ່ຈະຮັກສາສົມດຸນຂອງລີກສູງສຸດປະເທດອັງກິດ ດ້ວຍການຄວບຄຸມເພດານຄ່າຈ້າງເຊິ່ງເປັນລາຍຈ່າຍໃຫຍ່ສຸດຂອງບັນດາທີມໃນພຣີເມຍລີກ.
ຂໍ້ສະເໜີນີ້ ຍັງຖືກເຫັນວ່າເປັນຕົວປ້ອງກັນບໍ່ໃຫ້ຊ່ອງຫວ່າງທາງດ້ານການເງິນລະຫວ່າງສະໂມສອນຊັ້ນແນວໜ້າ ແລະ ສະໂມສອນທີ່ເຫຼືອໃນພຣີເມຍລີກ ຫ່າງກັນເກີນໄປ.
ມີການເວົ້າເຖິງຄວາມກັງວົນໃນເລື່ອງຊ່ອງຫວ່າງຂອງສະໂມສອນຫົວແຖວກັບທີມທີ່ເຫຼືອ ເພາະແຊັມປຽນລີກ ຈະມອບລາຍໄດ້ໃຫ້ຫຼາຍຂຶ້ນ ເມື່ອມີການປັບປ່ຽນຮູບແບບໃນລະດູການ 2024/25.
ການແຂ່ງຂັນເຕະບານຊີງແຊັມສະໂມສອນໂລກ ກໍຈະເພີ່ມລາຍໄດ້ໃຫ້ກັບສະໂມສອນລະດັບສູງສຸດຂອງລີກດ້ວຍເຊັ່ນກັນ ຫາກທີມໃດໄດ້ໄປລົງແຂ່ງຂັນໃນປີ 2025
ລາຍງານຍັງຍົກຕົວຢ່າງວ່າ ຫາກມີການກໍາຈັດຄ່າຈ້າງໃນລະດູການ 2021-22 ກໍຈະຢູ່ທີ່ປະມານ 402,4 ລ້ານປອນ ຕົວເລກດັ່ງກ່າວ ເປັນການນໍາລາຍໄດ້ຂອງ ນໍຣິຊ ຊີຕີ ທີມອັນດັບສຸດທ້າຍຂອງຕາຕະລາງ ທີ່ຮັບລິຂະສິດໂທລະພາບໄປ 100,6 ລ້ານປອນມາຄູນ 4.
ຫາກການຈໍາກັດເພດານຄ່າຈ້າງເກີດຂື້ນ ກໍອາດຈະສົ່ງຜົນດີຕໍ່ທີມຍິ່ງໃຫຍ່ໃນເອີຣົບດ້ວຍເໝືອນກັນ ເພາະສະໂມສອນແບບ ປາຣີ ແຊງ-ແຊກແມງ ຫຼື ຣິວ ມາດຣິດ ຈະສະເໜີເງິນແຮງຈູງໃຈໃຫ້ນັກເຕະໄດ້ສູງກວ່າ.
ເມື່ອເດືອນມັງກອນ ລາຍງານຊີ້ໃຫ້ເຫັນວ່າ ຄ່າຈ້າງຂອງ PSG ໃນລະດູການ 2021-22 ນັ້ນສູງເຖິງ 645 ລ້ານປອນ ເຮັດໃຫ້ພວກເຂົາກາຍເປັນສະໂມສອນທີ່ຈ່າຍຄ່າຈ້າງນັກເຕະຫຼາຍທີ່ສຸດ.
ຄ່າຈ້າງຂອງ ຣິວ ມາດຣິດ ໃນລະດູການດັ່ງກ່າວ ກໍບັນລຸເຖິງ 458 ລ້ານປອນ ຫຼັງຈາກພວກເຂົາຈ່າຍເງິນໂບນັດຄວ້າແຊັມປຽນລີກ.
ລາຍງານລະບຸວ່າ ຂໍ້ສະເໜີກໍາຈັດຄ່າຈ້າງ ໄດ້ຮັບການຄັດຄ້ານຈາກບາງສະໂມສອນຊັ້ນແນວໜ້າ ໂດຍຈະມີການປຶກສາຫາລືຢູ່ໃນກອງປະຊຸມລີກໃນອາທິດນີ້.
ພຣີເມຍລີກ ກໍາລັງປັບປຸງກົດລະບຽບການເງິນຂອງຕົນໃຫ້ສອດຄ່ອງກັບກົດລະບຽບການເງິນໃໝ່ຂອງ UEFA ໂດຍລະດູການໜ້າ ສະໂມສອນບານເຕະເອີຣົບຈະໃຊ້ຈ່າຍເງິນໄດ້ບໍ່ເກີນ 90 ເປີເຊັນຂອງລາຍໄດ້ ແລະ ຈະຄອ່ຍໆຫຼຸດໄປເລື້ອຍຈົນເຫຼືອ 70 ເປີເຊັນໃນລະດູການ 2025-26.
