ທາງລົດໄຟລາວ-ຈີນ ທັນສະໄໝເສັ້ນນີ້ໄດ້ສົ່ງເສີມການພັດທະນາເສດຖະກິດ-ສັງຄົມ ແລະ ອຳນວຍຄວາມສະດວກໃຫ້ຊິວິດການເປັນຢູ່ຂອງປະຊາຊົນສອງຊາດລາວ-ຈີນຢ່າງຫຼວງຫຼາຍ, ສາມາດເວົ້າໄດ້ວ່າທາງລົດໄຟລາວ-ຈີນ ເປັນໂຄງການສັນຍາລັກຂອງການຮ່ວມມື “ໜຶ່ງແລວໜຶ່ງເສັ້ນທາງ”.
ທ່ານ ນາງ ມາຊຽວນີ້ງ ຫົວໜ້າພະແນກຂ່າວຕ່າງປະເທດຂອງໜັງສືພິມປະຊາຊົນ ລາຍວັນຂອງຈີນ ໄດ້ໃຫ້ຮູ້ວ່າ: ປະເທດ ລາວ-ຈີນ ມີສາຍພູແມ່ນ້ຳຕິດຈອດກັນ ແລະ ເປັນບ້ານໃກ້ເຮືອນຄຽງຮັກແພງກັນແຕ່ໃດໆມາ. ໂດຍສະເພາະນັບແຕ່ເດືອນເມສາ ປີ 2019 ທີ່ໄດ້ເຊັນ “ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ, ຈີນ-ລາວ” ເປັນຕົ້ນມາການຮ່ວມມືຂົງເຂດຕ່າງໆລະຫວ່າງສອງຊາດໄດ້ມີຜົນສຳເລັດຢ່າງຫຼວງຫຼາຍ. ໃນການມາເຄື່ອນໄຫວຢູ່ ສປປ ລາວ ຄັ້ງນີ້ຂອງຂ້າພະເຈົ້າພ້ອມດ້ວຍຄະນະໄດ້ໃຊ້ບໍລິການລົດໄຟ ລາວ-ຈີນ ມາຮອດນະຄອນຫຼວງວຽງຈັນ ແລະ ຮູ້ສຶກວ່າຜູ້ນຳທັງສອງປະເທດ ຊຸກຍູ້ກໍ່ສ້າງ ແລະ ນຳໃຊ້ທາງລົດໄຟລາວ-ຈີນ ທັນສະໄໝເສັ້ນນີ້ໄດ້ສົ່ງເສີມການພັດທະນາເສດຖະກິດ-ສັງຄົມ ແລະ ອຳນວຍຄວາມສະດວກໃຫ້ຊິວິດການເປັນຢູ່ຂອງປະຊາຊົນສອງຊາດຢ່າງຫຼວງຫຼາຍ, ສາມາດເວົ້າໄດ້ວ່າທາງລົດໄຟລາວ-ຈີນເປັນໂຄງການສັນຍາລັກຂອງການຮ່ວມມື “ໜຶ່ງແລວໜຶ່ງເສັ້ນທາງ”.
ການຮ່ວມມືລະຫວ່າງສື່ມວນຊົນສອງປະເທດຈະສົ່ງເສີມ ເພີ່ມທະວີຄວາມເຂົ້າໃຈກັນ ແລະ ແລກປ່ຽນວັນທະນະທຳຊຶ່ງກັນ ແລະ ກັນ. ດັ່ງນັ້ນ, ກ່ຽວກັບຜົນສຳເລັດການຮ່ວມມືໃນການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ລະຫວ່າງໜັງສືພິມປະຊາຊົນຈີນ ກັບ ສື່ມວນຊົນ ສປປ ລາວ. ແມ່ນແທດເໝາະກັບສະພາບການທີ່ສຸດ, ອັນນີ້ກໍເປັນກິດຈະກໍາທີ່ສື່ມວນຊົນຂັ້ນສູນກາງລະຫວ່າງສອງປະເທດຮ່ວມມືກັນສຳພາດໃນການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ເປັນຄັ້ງທໍາອິດຊຶ່ງມີຄວາມໝາຍຄວາມສຳຄັນທີ່ສຸດ.
ເປົ້າໝາຍ ແລະ ໜ້າທີ່ຂອງການສຳພາດຄັ້ງນີ້ ແມ່ນເພື່ອຖ່າຍທອດຄວາມສວຍງາມຂອງ ສປປ ລາວ ໃຫ້ປະຊາຊົນຈີນໃຫ້ຮັບຮູ້, ເຜີຍແຜ່ເລື່ອງລາວຄວາມເປັນຈິງຂອງ ສປ ຈີນ ໃຫ້ປະຊາຊົນລາວ ໄດ້ເຂົ້າໃຈ, ຮ່ວມກັນເລົ່າເລື່ອງຕ່າງຝ່າຍຕ່າງໄດ້ຜົນປະໂຫຍດ ຈາກການຮ່ວມມື ລາວ-ຈີນ. ໃນໄລຍະມໍ່ໆມານີ້, ໜັງສືພິມປະຊາຊົນຈີນ ໄດ້ໃຫ້ຄວາມສຳຄັນຕໍ່ຂ່າວສານຕ່າງໆຂອງ ສປປ ລາວ, ສະເພາະໃນປີທີ່ຜ່ານມາໄດ້ອອກຂ່າວເປັນຈຳນວນ 120 ກວ່າຄັ້ງ, ເປັນຕົ້ນແມ່ນໂຮງຮຽນມິດຕະພາບປະຖົມ ໜອງປີງ, ເຂດຫຼຸດຜ່ອນອາຍກາກບອນຕໍ່າຢູ່ເຂດພັດທະນາກວມລວມໄຊເຊດຖາ, ລົດໄຟຜູ້ໂດຍສານສາກົນລາວ-ຈີນຄັ້ງປະຖົມມະລືກ, ໝາກໄມ້ສົດຈາກບັນດາປະເທດອາຊຽນ ຜ່ານທາງລົດໄຟລາວ-ຈີນ, ຄູ່ເຈົ້າບ່າວເຈົ້າສາວຖ່າຍຮູບແຕ່ງງານທີ່ສະຖານີລົດໄຟ ແລະ ອື່ນໆ.
ສື່ມວນຊົນສອງປະເທດລາວ-ຈີນ ໄດ້ຮ່ວມມືກັນສຳພາດກ່ຽວກັບ ເຂດພັດທະນາກວມລວມໄຊເຊດຖາແມ່ນເຂດການຄ້າລະດັບຊາດຂອງ ສປ ຈີນ ທີ່ລົງທຶນ ຢູ່ ສປປ ລາວ. ເພື່ອຂຽນຂ່າວໃຫ້ມີຊີວິດຊີວາກ່ຽວກັບການຮ່ວມມືລະຫວ່າງທັງສອງປະເທດແບບຕ່າງຝ່າຍຕ່າງໄດ້ຜົນປະໂຫຍດ ແລະ ການດໍາລົງຊີວິດຂອງປະຊາຊົນມີຄວາມຜາສຸກ; ເພີ່ມທະວີຄວາມແໜ້ນແຟ້ນການຮ່ວມມືລະຫວ່າງໜັງສືພິມປະຊາຊົນ ສປ ຈີນ ກັບ ສື່ມວນຊົນ ສປປ ລາວ ໃຫ້ດີຂຶ້ນຕື່ມ. ໃຫ້ພວກເຮົາຈັບມືກັນປະກອບສ່ວນເຂົ້າໃນມິດຕະພາບ, ທຳຄວາມເຂົ້າໃຈກັນ ແລະ ພັດທະນາສາຍພົວພັນລະຫວ່າງປະຊາຊົນ ລາວ-ຈີນ ໃຫ້ຫຼາຍຂຶ້ນກວ່າເກົ່າ.
ໂດຍ: ບຸນຕອມ
