ນັບຕັ້ງແຕ່ຫຼັກສູດຊັ້ນປະຖົມສຶກສາແຫ່ງຊາດ ສະບັບປັບປຸງໃໝ່ ໄດ້ປະກາດນຳໃຊ້ນັບແຕ່ປີ 2019ກະຊວງສຶກສາທິການ ແລະ ກີລາ ແຫ່ງ ສປປ ລາວ ໂດຍຮ່ວມມືກັບລັດຖະບານອົດສະຕຣາລີ ໂດຍຜ່ານແຜນງານບີຄວາ ໄດ້ໃຫ້ການສະໜັບສະໜູນທາງດ້ານທຶນຮອນ ແລະ ວິຊາການ ເພີ່ມຕື່ມໃຫ້ແກ່ຫ້ອງການສຶກສາທິການ ແລະ ກີລາເມືອງເປົ້າໝາຍຂອງແຜນງານໃນ 28 ເມືອງ ຢູ່ໃນ 6 ແຂວງ ຄື: ແຂວງຜົ້ງສາລີ ຫຼວງນ້ຳທາ ຄຳມ່ວນ ສະຫວັນນະເຂດ ສາລະວັນ ແລະ ເຊກອງ.
ສົກຮຽນ 2022-2023 ເປັນປີທີ 4 ທີ່ກະຊວງ ສຶກສາທິການ ແລະ ກີລາ (ສສກ) ໂດຍການສະໜັບສະໜູນຈາກ ລັດຖະບານອົດສະຕຣາລີ ໄດ້ສະໜອງທຶນຊ່ວຍເຫຼືອເພີ່ມຕື່ມໃຫ້ແກ່ບັນດາເມືອງເປົ້າໝາຍ ເຊິ່ງມີມູນຄ່າທັງໝົດ 979 ລ້ານ ກວ່າກີບ ທຶນຊ່ວຍເຫຼືອດັ່ງກ່າວ ສາມາດຊ່ວຍໃຫ້ບັນດາເມືອງເປົ້າໝາຍດຳເນີນການລົງຊຸກຍູ້ຊ່ວຍເຫຼືອດ້ານການຈັດການຮຽນການສອນຢູ່ຫ້ອງຮຽນຂັ້ນ ປ4 ໄດ້ 4.246 ຄັ້ງ.
ທ່ານ ເກດ ພັນລັກ ຫົວໜ້າກົມສ້າງຄູ ໄດ້ລາຍງານໃຫ້ຊາບວ່າ: ຫ້ອງການສຶກສາ ແລະ ກີລາ ເມືອງ ສາມາດນຳໃຊ້ທຶນຊ່ວຍເຫຼືອດັ່ງກ່າວ ເພື່ອສະໜັບສະໜູນການຮຽນ-ການສອນ ແລະ ການລົງຕິດຕາມບັນ ດາໂຮງຮຽນ ແລະ ກຸ່ມໂຮງຮຽນ ຫ້ອງການສຶກສາ ແລະ ກີລາ ເມືອງ ໄດ້ຖືກແນະນຳເພື່ອໃຫ້ບູລິມະສິດລົງຕິດຕາມຊ່ວຍເຫຼືອບັນດາໂຮງຮຽນທີ່ຍັງບໍ່ທັນປະຕິບັດໄດ້ດີ ເຊິ່ງສ່ວນຫຼາຍຈະຢູ່ເຂດຊຸມຊົນຫ່າງໄກ ທີ່ມີອັດຕານັກຮຽນທີ່ເປັນນັກຮຽນທີ່ບໍ່ເວົ້າພາສາລາວເປັນພາສາຫຼັກໃນຄອບຄົວ ພ້ອມທັງສຸມໃສ່ການສະໜັບສະໜູນຄູໃນການປະຕິບັດຫຼັກສູດໃໝ່ ສິ່ງທ້າຍທາຍອີກຈຸດໜຶ່ງທີ່ຢູ່ເຂດເມືອງຫ່າງໄກແມ່ນຫ້ອງຮຽນສ່ວນຫຼາຍ ແມ່ນເປັນຫ້ອງຄວບ.
ໃນລະຫວ່າງສົກຮຽນ ຫ້ອງການສຶກສາ ແລະ ກີລາເມືອງ ໄດ້ຮັບການຕິດຕາມການຊ່ວຍເຫຼືອແບບທາງໄກເປັນປະຈຳຢ່າງໜ້ອຍ 2 ຄັ້ງ ເພື່ອເຫັນໄດ້ເຖິງການປ່ຽນແປງດ້ານການປະຕິບັດຂອງຄູ ແລະ ການພັດທະນາຄຸນນະພາບການສອນ ເຊິ່ງໄດ້ແນະນຳໃຫ້ຄູ ໄດ້ຮັບການຊ່ວຍເຫຼືອຢ່າງນ້ອຍທຸກໆ 2 ຄັ້ງຕໍ່ອາທິດ.
ໃນສົກຮຽນ 2023-2024 ລັດຖະບານອົດສະຕຣາລີ ໂດຍຜ່ານແຜນງານບີຄວາ ຈະສືບຕໍ່ໃຫ້ທຶນຊ່ວຍເຫຼືອບັນດາເມືອງເປົ້າໝາຍເຫຼົ່ານີ້ ເພື່ອສະໜັບສະໜູນການປະຕິບັດຫຼັກສູດຊັ້ນປະຖົມສະບັບປັບປຸງ ໃໝ່ຂັ້ນ ປ5 ທຶນດັ່ງກ່າວຈະໄດ້ມອບໃຫ້ຫ້ອງການສຶກສາທິການ ແລະ ກີລາເມືອງເປົ້າໝາຍ ເພື່ອນໍາໄປໃຊ້ໃນການພັດທະນາວິຊາຄູ ລວມທັງເຂດໃຫ້ບໍລິການຂອງທັງ 3 ວິທະຍາໄລຄູ ຄື: ວິທະຍາໄລຄູຫຼວງນໍ້າທາວິທະຍາໄລຄູຄັງໄຂ ແລະ ວິທະຍາໄລຄູສະຫວັນນະເຂດ.
