ໂຄງການເຂດພັດທະນາກວມລວມໄຊເຊດຖາ ເປັນໂຄງການທີ່ສໍາຄັນຂອງສອງລັດຖະບານ ລາວ-ຈີນ-ຈີນ-ລາວ, ເປັນໂຄງການທີ່ເປັນສັນຍາລັກແຫ່ງມິດຕະພາບ ລະຫວ່າງສອງປະເທດ ລາວ-ຈີນ ໂດຍໄດ້ຮັບການ ເອົາໃຈໃສ່ ແລະ ໃຫ້ການສະໜັບສະໜູນ ຈາກລັດຖະບານສອງຊາດ ແລະ ເປັນໂຄງການໜຶ່ງທີ່ຖືເອົາການປົກປັກ ຮັກສາສິ່ງແວດລ້ອມ ແລະ ເຂດສີຂຽວເປັນຫລັກ. ມາຮອດປັດຈຸບັນ ເຂດພັດທະນາ ດັ່ງກ່າວ, ໄດ້ມີການລົງທຶນໄປ ແລ້ວ 1,3 ຕື້ໂດລາສະຫະລັດ. ໃນນີ້, ລົງທຶນໃນໂຄງລ່າງພື້ນຖານປະມານ 600 ລ້ານໂດລາສະຫະລັດ, ມູນຄ່າລົງ ທຶນຂອງວິສາຫະກິດ ທີ່ລົງທຶນຢູ່ໃນເຂດລົງທຶນປະມານ 700 ລ້ານໂດລາສະຫະລັດ ເປັນໂຄງ ການທີ່ໄດ້ຖືກນໍາເຂົ້າ ໃນການລິເລີ່ມ “ໂຄງການໝຶ່ງແລວ ໝຶ່ງເສັ້ນທາງ” ທີ່ໄວທີ່ສຸດຂອງຈີນ.
ທ່ານ ຊົງ ຈູນ ຜູ້ອຳນວຍການບໍລິສັດຮ່ວມທຶນ ລາວ-ຈີນ ໄດ້ໃຫ້ຮູ້ ເມື່ອບໍ່ດົນນີ້ວ່າ: ເຂດພັດທະນາກວມ ລວມໄຊເຊດຖາ ແມ່ນໂຄງການທີ່ລັດຖະບານ ຂອງສອງປະເທດ ລາວ-ຈີນ ຕົກລົງເຫັນດີຮ່ວມມືກັນ ເຊິ່ງແມ່ນເຂດ ຮ່ວມມືການຄ້າຕ່າງປະເທດ ແຫ່ງດຽວຂອງຈີນໃນລາວ, ເປັນເຂດເສດຖະກິດພິເສດຂອງລາວ ແລະ ເປັນໂຄງ ການທີ່ໄດ້ຖືກນໍາເຂົ້າໃນການລິເລີ່ມ “ໂຄງການໝຶ່ງແລວ ໝຶ່ງເສັ້ນທາງ” ທີ່ໄວທີ່ສຸດຂອງຈີນ, ເຊິ່ງໄດ້ຮັບການສະໜັບ ສະໜູນ ແລະ ເອົາໃຈໃສ່ຢ່າງສູງຈາກສອງລັດຖະບານ ລາວ-ຈີນ. ມາຮອດປັດຈຸບັນ ເຂດພັດທະນາກວມລວມ ໄຊເຊດຖາ ໄດ້ສໍາເລັດການພັດທະນາໄລຍະທີໜຶ່ງ ກໍຄື ສໍາເລັດການກໍ່ສ້າງໂຄງລ່າງພື້ນຖານ ເປັນຕົ້ນ ຖະໜົນຫົນທາງ, ນໍ້າປະປາ, ໄຟຟ້າ, ການສື່ສານ, ຫ້ອງການພາສີ ແລະ ສິ່ງອໍານວຍຄວາມສະດວກອື່ນໆ. ປັດຈຸບັນ ເຂດພັດທະນາ ກໍາລັງສຸມໃສ່ກໍ່ສ້າງເຂດການຄ້າ, ການທ່ອງທ່ຽວ ແລະ ເຂດຕົວເມືອງໃໝ່ ນະຄອນຫລວງວຽງຈັນ ຂອງໄລຍະທີສອງ ເພື່ອເປັນການປັບປຸງສິ່ງອໍານວຍຄວາມສະດວກຂອງໂຄງລ່າງພື້ນຖານ.
ທ່ານ ຊົງ ຈູນ ຍັງໃຫ້ຮູ້ອີກວ່າ: ປັດຈຸບັນ, ເຂດພັດທະນາກວມລວມໄຊເຊດຖາ ນະຄອນຫລວງວຽງຈັນ ມີຫົວໜ່ວຍວິສາຫະກິດທີ່ໄດ້ເຊັນສັນຍາທັງໝົດ 126 ບໍລິສັດ. ໃນນີ້, ມີ 62 ບໍລິສັດ ໄດ້ເລີ່ມທໍາການຜະລິດແລ້ວ ແລະ ອີກ 64 ບໍລິສັດແມ່ນຢູ່ໃນຂັ້ນຕອນການກະກຽມ ເພື່ອດໍາເນີນການກໍ່ສ້າງໂຮງງານ, ເຊິ່ງເປັນນັກລົງທຶນທີ່ມາ ຈາກ 8 ປະເທດ ຄື: ສປ ຈີນ, ໄທ, ຍີ່ປຸ່ນ, ມາເລເຊຍ, ສິງກະໂປ, ລາວ, ສະຫະລັດອາເມລິກາ ແລະ ສະວິດ ເຊິ່ງ ລວມມີບໍລິສັດທີ່ສໍາຄັນຄື: ສໍານັກງານໃຫຍ່ຂອງບໍລິສັດທາງລົດໄຟ ລາວ-ຈີນ, ກຸ່ມບໍລິສັດຄວາມຫວັງໃໝ່ ເປັນໂຮງ ງານຜະລິດຫົວອາຫານທີ່ໃຫຍ່ ແລະ ມີຄຸນະພາບ, ກຸ່ມບໍລິສັດໂຮຢາ ເປັນບໍລິສັດທີ່ໃຫຍ່ ແລະ ມີຊື່ສຽງ ຂອງ ປະເທດຍີ່ປຸ່ນ ເຊິ່ງຈະນໍາໃຊ້ແຮງງານ ປະມານ 5.000 ຄົນ, ບໍລິສັດ ເປ້ເຕີເຄື່ອງນຸ່ງຫົ່ມ (ລາວ) ຈຳກັດ ເຊິ່ງເປັນ ໂຮງງານຜະລິດເຄື່ອງນົ່ງຫົ່ມທີ່ນໍາໃຊ້ເຕັກໂນໂລຊີສູງ, ມີການຮ່ວມມືກັບຍີ່ຫໍ້ດັງໆລະດັບສາກົນຫລາຍຍີ້ຫໍ້, ຕ້ອງການ ນໍາໃຊ້ແຮງງານລາວ 1.000 ກວ່າຄົນ ແລະ ບໍລິສັດ ອື່ນໆ. ພາຍຫລັງ ບັນດາບໍລິສັດດັ່ງກ່າວ, ໄດ້ລົງມືທໍາການຜະ ລິດ ຈະສາມາດສ້າງມູນຄ່າຜະລິດຕະພັນທັງໝົດ 1,8 ຕື້ໂດລາສະຫະລັດ, ສາມາດສ້າງວຽກເຮັດງານທໍາໄດ້ຫລາຍ ກວ່າ 10.000 ກວ່າຄົນ.
ສຳລັບ ຂອບເຂດການລົງທຶນຂອງວິສາຫະກິດ ໄດ້ກວມເອົາການຜະລິດ ຜະລິດຕະພັນເອເລັກໂຕຣນິກ, ຜະລິດຕະພັນອຸປະກອນໄຟຟ້າ, ຜະລິດຕະພັນຢາ, ພະລັງສະອາດ, ການປຸງແຕ່ງຜະລິດຕະພັນກະສິກໍາ, ການແປຮູບ ເຄື່ອງນຸ່ງຫົ່ມ, ເຄື່ອງໂລຫະ, ການຂົນສົ່ງ ແລະ ສາງສິນຄ້າ ລວມທັງໝົດ 8 ຂະແໜງການ.
ຂ່າວ: ທະນູທອງ
ພາບ: ເກດສະໜາ
