ວິທະຍຸກະຈາຍສຽງຫວຽດນາມລາຍງານວ່າ: ໃນລະຫວ່າງວັນທີ 13-16 ມິຖຸນາ ນີ້ ຢູ່ ດານັງ, ຫວຽດນາມ ໄດ້ເປັນເຈົ້າພາບຈັດກອງປະຊຸມຄັ້ງທີ 42 ຂອງຄະນະກຳມະການ ອາຊຽນ ກ່ຽວກັບການຄຸ້ມຄອງໄພພິບັດທຳມະຊາດ. ດ້ວຍບົດບາດເປັນປະທານຄະນະກຳມະການອາຊຽນ ຄຸ້ມຄອງໄພພິບັດທຳມະຊາດປີ 2023, ຫວຽດນາມ ໄດ້ເສີມຂະຫຍາຍຈິດໃຈເປັນເຈົ້າການ, ຕັ້ງໜ້າ ແລະ ມີຄວາມຮັບຜິດຊອບໃນການຮ່ວມມື ເວົ້າລວມ, ການຮ່ວມມືຄຸ້ມຄອງໄພທຳມະຊາດ ເວົ້າສະເພາະ.
ທ່ານ ຟ້າມດຶກລ້ວນ ຫົວໜ້າກົມຄຸ້ມຄອງ ແລະ ປ້ອງກັນຕ້ານໄພທຳມະຊາດ ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໃຫ້ຮູ້ວ່າ: ຫວຽດນາມ ປາຖະໜາວ່າການຮ່ວມມືດັ່ງກ່າວນີ້ຈະນັບມື້ນັບໄດ້ຮັບການສົມທົບກັນຢ່າງແໜ້ນແຟ້ນກວ່າເກົ່າ, ເພື່ອແບ່ງປັນບົດຮຽນ, ຂໍ້ມູນຂ່າວສານ, ແຫຼ່ງກຳລັງ ກໍຄືການຊ່ວຍເຫຼືອຊຶ່ງກັນ ແລະ ກັນ ເມື່ອເກີດໄພພິບັດທຳມະຊາດທີ່ໜັກໜ່ວງ. ພິເສດ, ລະດົມແຫຼ່ງກຳລັງໃຫ້ແກ່ ອາຊຽນ ເວົ້າລວມ, ຫວຽດນາມ ເວົ້າສະເພາະ, ໃນການຄຸ້ມຄອງຄວາມສ່ຽງຈາກໄພທຳມະຊາດ, ບຳລຸງສ້າງ, ຝຶກອົບຮົມ ແລະ ຍົກສູງຄວາມຮັບຮູ້ໃຫ້ແກ່ປະຊາຊົນ.
ອາຊຽນ ແມ່ນພາກພື້ນທີ່ມີຄວາມສ່ຽງສູງ ຕໍ່ບັນດາໄພພິບັດທຳມະຊາດ, ຄື: ພາຍຸ, ນ້ຳຖ້ວມ, ໄພແຫ້ງແລ້ງ, ແຜ່ນດິນໄຫວ… ບັນດາຄວາມພະຍາຍາມຮ່ວມມືໃນອາຊຽນ ກ່ຽວກັບບັນຫາດັ່ງກ່າວໄດ້ປະກອບສ່ວນເພີ່ມທະວີຄວາມສາມາດຕ້ານທານ ແລະ ຫຼຸດຜ່ອນຄວາມສ່ຽງຈາກໄພທຳມະຊາດໃຫ້ແກ່ບັນດາປະເທດສະມາຊິກ.
