ນະຄອນຊົງຊິ່ງ (Chongqing) ເປັນນະຄອນທີ່ໃຫຍ່ທີ່ສຸດໃນ ສປ ຈີນ ມີເນື້ອທີ່ 82.300 ກິໂລຕາ ແມັດ ໃນມົນທົນເສສວນ ແລະ ມີຂະໜາດເສດຖະກິດທີ່ໃຫຍ່ເປັນອັນດັບ 5 ຮອງຈາກ ນະຄອນຊຽງໄຮ້, ປັກກິ່ງ, ເຊີນເຈີ້ນ ແລະ ກວາງໂຈ, ໂດຍເປັນ 1 ໃນ 4 ຂອງນະຄອນປົກຄອງໂດຍກົງຂອງລັດຖະບານກາງ. ຈຳນວນປະຊາກອນສຳລັບໄວອາຍຸຊອກວຽກເຮັດງານທຳນັບມື້ຫຼຸດໜ້ອຍຖອຍລົງ ແລະ ການກ້າວເຂົ້າສູ່ສັງຄົມຜູ້ອາຍຸສູງໄດ້ເຮັດໃຫ້ຕົ້ນທຶນແຮງງານໃນ ສປ ຈີນ ເພີ່ມຂຶ້ນ ແລະ ເປັນສາເຫດທີ່ບໍລິສັດຕ່າງປະເທດບາງແຫ່ງ ຫັນປ່ຽນໄປພາກການຜະລິດເພື່ອສົ່ງອອກຈາກ ສປ ຈີນ. ອີງຕາມການລາຍງານຈາກສຳນັກງານສະຖິຕິແຫ່ງ ຊາດ ສປ ຈີນ ລະບຸວ່າ ການເຂົ້າສູ່ສັງຄົມຜູ້ອາຍຸສູງ ຍັງມີທ່າອ່ຽງໃນໄລຍະຍາວ ຂອງການພັດທະນາສັງຄົມ ຂອງ ສປ ຈີນ. ສະຖານະການດັ່ງກ່າວຈະເປັນສິ່ງທ້າທາຍດ້ວຍການເບິ່ງແຍງຜູ້ອາຍຸສູງຂອງຄອບຄົວໃນ ສປ ຈີນ ລວມທັງເພີ່ມແຮງກົດດັນ ຂອງລະບົບການໃຫ້ບໍລິການດ້ານສາທາລະນະ ແລະ ການຈ້າງງານໃນຂະແໜງອຸດສາຫະກຳຕ່າງໆ. ເຖິງຢ່າງໃດກໍຕາມ ສະຖານະການດັ່ງກ່າວໄດ້ກາຍເປັນໂອກາດໃນການພັດທະນາທຸລະກິດບາງປະເພດ ເຊັ່ນ: ທຸລະກິດການເບິ່ງແຍງຜູ້ອາຍຸສູງ, ທຸລະກິດອາຫານເສີມ ເພື່ອສຸຂະພາບ ແລະ ທຸລະກິດດ້ານຊັບພະຍາກອນບຸກຄົນ, ອຸດສາຫະກຳບໍລິການດ້ານຊັບພະຍາກອນມະນຸດ, ໃນປີ 2021 ນະຄອນຊົງຊິ່ງ ມີວິສາຫະກິດບໍລິການດ້ານຊັບພະຍາກອນມະນຸດ ທັງໝົດ 2.846 ແຫ່ງ ຊຶ່ງມີລາຍຮັບຈາກການດຳເນີນທຸລະກິດ ທັງໝົດ 61.805 ລ້ານຢວນ, ມີແຮງງານໃຫ້ການບໍລິການທັງໝົດ 12.559 ລ້ານຄັ້ງ ເພີ່ມຂຶ້ນ 45,2 ສ່ວນຮ້ອຍ ເມື່ອທຽບໃສ່ປີ 2020, ການຈັດຫາງານທັງໝົດ 3.645 ລ້ານຄັ້ງ ຊຶ່ງເພີ່ມຂຶ້ນ 15,2 ສ່ວນຮ້ອຍ ເມື່ອທຽບໃສ່ປີ 2020.
ທຸລະກິດດັ່ງກ່າວໄດ້ກາຍເປັນສ່ວນໜຶ່ງໃນການສ້າງສະຖຽນລະພາບໃນການຈ້າງງານຂອງ ນະຄອນຊົງຊິ່ງ ຊຶ່ງເຫັນໄດ້ຈາກໄຕມາດທີ 2 ຂອງປີ 2022 ສຳນັກງານຊັບພະນາກອນມະນຸດ ແລະ ປະກັນສັງຄົມ ຂອງ ນະຄອນຊົງຊິ່ງ ເປີດເຜີຍວ່າ ສະຖານະການຂອງການຈ້າງງານໃນ ນະຄອນຂອງຕົນ ແມ່ນມີຄວາມໝັ້ນຄົງ ໂດຍສະເພາະໃນໄລຍະ 6 ເດືອນຕົ້ນປີ 2022 ມີຕໍາແໜ່ງງານໃໝ່ເພີ່ມຂຶ້ນ 401.000 ຕຳແໜ່ງ, ສ່ວນອັດຕາການວ່າງງານສະເລ່ຍຢູ່ທີ່ 5,4 ສ່ວນຮ້ອຍ ຂອງທຸລະກິດດັ່ງກ່າວ ຊຶ່ງເປັນປະໂຫຍດຢ່າງໃຫຍ່ຫຼວງຕໍ່ລະບົບອຸດສາຫະກຳຂອງ ນະຄອນຊົງຊິ່ງ ຊຶ່ງເຮັດໃຫ້ວິສາຫະກິດສາມາດຈ້າງແຮງງານໄດ້ຢ່າງສະດວກ ແລະ ແຮງງານທີ່ມີທັກສະເໝາະສົມຕາມຕຳແໜ່ງຂອງງານ ຊຶ່ງສອດຄອງກັບນະໂຍບາຍການພັດທະນາແຮງງານ ແລະ ການບັນລຸອັດຕາການວ່າງງານບໍ່ໃຫ້ເກີນ 5,5 ສ່ວນຮ້ອຍ ພາຍໃຕ້ແຜນພັດທະນາເສດຖະກິດ-ສັງຄົມແຫ່ງຊາດໄລຍະ 5 ປີ (2021-2025).
ສຳນັກງານຊັບພະຍາກອນມະນຸດ ແລະ ປະກັນສັງຄົມ ຂອງ ນະຄອນຊົງຊິ່ງ ໄດ້ແຈ້ງໃຫ້ຊາບເຖິງ ແຜນການດຳເນີນງານການສົ່ງເສີມການພັດທະນາອຸດສາຫະກຳບໍລິການດ້ານຊັບພະຍາກອນມະນຸດ ໃໝ່ໃນປີ 2022 ໂດຍປະສານສົມທົບກັບໜ່ວຍງານອື່ນໆ ທັງໝົດ 12 ພາກສ່ວນ ເພື່ອກໍານົດແນວຄິດ, ຫຼັກການພື້ນຖານ, ເປົ້າໝາຍການພັດທະນາ ແລະ ແຜນລະອຽດໃຫ້ແທດເໝາະໃນການພັດທະນາອຸດສາຫະກຳບໍລິການດ້ານຊັບພະຍາກອນມະນຸດໃນ ນະຄອນຊົງຊິ່ງ ແຫ່ງນີ້. ແຜນການດຳເນີນການດັງກ່າວ ໄດ້ກຳນົດເປົ້າໝາຍຂອງ ການພັດທະນາໄວ້ ຄື: ພາຍໃນປີ 2023 ນະຄອນຊົງຊິ່ງ ຈະຕ້ອງມີລາຍຮັບຈາກອຸດສາຫະກໍາບໍລິການດ້ານຊັບພະຍາກອນມະນຸດເຖິງ 1 ແສນລ້ານຢວນ, ພ້ອມນີ້ ແຕ່ປີ 2023 ຫາ 2025 ນະຄອນຊົງຊິ່ງ ຈະມີລາຍຮັບຈາກອຸດສາຫະກຳດັ່ງກ່າວປະມານ 1,5 ແສນລ້ານຢວນ ແລະ ມີວິສາຫະກິດ 3.500, ແຫ່ງ ໃນຈໍານວນນີ້ຕ້ອງເປັນວິສາຫະກິດທີ່ມີລາຍຮັບຫຼາຍກວ່າ 100 ລ້ານຢວນ, ຊຶ່ງຈະຊ່ວຍກະຕຸ້ນວິສາຫະກິດບໍລິການດ້ານຊັບຍາກອນມະນຸດເຂົ້າສູ່ຕະຫຼາດຫຼັກຊັບຢ່າງໜ້ອຍ 1-2 ແຫ່ງ ແລະ ທັງສາມາດຊ່ວຍຜັກດັນວິສາຫະກິດນໍາໜ້າເປັນແບບຢ່າງໄດ້ໃນລະດັບໂລກ ລວມທັງສ້າງຕັ້ງຕະຫຼາດແຮງງານລະດັບຊາດ ໄດ້ 1-2 ແຫ່ງ ແລະ ລະດັບເມືອງຕິດ 1 ໃນ 5 ແຫ່ງ ຂອງ ສປ ຈີນ.
ແຜນການຈັດຕັ້ງປະຕິບັດງານດັ່ງກ່າວໄດ້ກຳນົດ 6 ກິດຈະກຳຫຼັກທີ່ເປັນປັດໄຈ ພາໃຫ້ນະຄອນຊົງຊິ່ງ ປະສົບຜົນສຳເລັດໃນອຸດສາຫະກຳບໍລິການດ້ານຊັບພະຍາກອນມະນຸດ ມີຄື: ໜຶ່ງ ການສະໜັບສະໜູນວິສາຫະກິດບໍລິການດ້ານຊັບພະຍາກອນມະນຸດຄຸນນະພາບທີ່ດີ. ສອງ ການຍົກລະດັບວິສາຫະກິດບໍລິການດ້ານຊັບພະຍາກອນມະນຸດຂະໜາດກາງ ແລະ ຂະໜາດນ້ອຍ. ສາມ ການພັດທະນານະວັດຕະກໍາໃໝ່ໃນສາຂາທຸລະກິດ ໂດຍຫຼຸດອັດຕາພາສີ ໃຫ້ນິຕິບຸກຄົນແກ່ວິສາຫະກິດບໍລິການ. ສີ່ ການສ້າງຊ່ອງທາງສາຂາທຸລະກິດ. ຫ້າ ການສຶກສາອົບຮົມບຸກຄະລາກອນ, ແລະ ຫົກ ການສ້າງກົນໄກຕະຫຼາດໃຫ້ມີປະຕິທິພາບສູງ.
ສີມືແຮງງານ ແລະ ທັກສະເປັນປັດໄຈທີ່ສຳຄັນທີ່ສຸດ ສຳລັບການພັດທະນາເສດຖະກິດ-ສັງຄົມ ຂອງທຸກປະເທດໃນໂລກ ໂດຍສະເພາະໃນຂະບວນການຜະລິດຕ່າງໆ ເຊັ່ນ: ດ້ານອຸດສາຫະກຳ, ກະສິກຳ, ການຜະລິດ ແລະ ການບໍລິການອື່ນໆ. ສະຖານະການຂາດແຄນກຳລັງຄົນ ຫຼື ແຮງງານ ທີ່ບາງປະເທດໄດ້ປະເຊີນໜ້າ ແມ່ນເນື່ອງມາຈາກການປ່ຽນແປງທາງດ້ານໂຄງສ້າງທີ່ສຳຄັນ ຊຶ່ງເຮັດໃຫ້ສົງຄົມຜູ້ອາຍຸສູງເກີດມີການຜະລິດຫຼຸດລົງ ແລະ ຄຸນນະພາບແຮງງານທີ່ຕໍ່າລົງ ໂດຍສະເພາະໄລຍະການແຜ່ລະບາດ ຂອງພະຍາດໂຄວິດ-19 ຊຶ່ງໄດ້ສົ່ງຜົນກະທົບຕໍ່ບັນດາປະເທດ ເຮັດໃຫ້ຂາດແຄນກຳລັງຄົນທີ່ມີສີມື ເຊັ່ນ: ປະລິມານ, ຄຸນນະພາບ ແລະ ພູມສາດທີ່ຈໍາເປັນ ຈະຕ້ອງໄດ້ມີການຟື້ນຟູການຮ່ວມມື ແລະ ການມີສ່ວນຮ່ວມຈາກທຸກພາກສ່ວນ ໃນການກະກຽມຄວາມພ້ອມ ເພື່ອຮັບມື ແລະ ແກ້ໄຂບັນຫາຮ່ວມກັນໃນທຸກຊ່ອງທາງ ຫຼື ທຸກສະຖານະການ ໃນການສ້າງສະພາບແວດລ້ອມທີ່ເອື້ອອຳນວຍຕໍ່ການພັດທະນາ ແລະ ເສີມສ້າງສັກກະຍະພາບຂອງ ຊັບພະຍາກອນມະນຸດ ເພື່ອຊ່ວຍຜະລິດກຳລັງຄົນໃຫ້ມີສີມື, ທັກສະ ແລະ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງຕະຫຼາດແຮງງານທີ່ສຸດ. ທັງເປັນການ, ສ້າງຂີດຄວາມສາມາດໃນການແຂ່ງຂັນຂອງ ສປ ຈີນ ໃຫ້ສູງຂຶ້ນ ແລະ ຮອງຮັບການປ່ຽນແປງທີ່ອາດຈະຂຶ້ນໃນຕໍ່ໜ້າ.
ດ້ວຍເຫດນີ້, ລັດຖະບານລາວ ແລະ ລັດຖະບານ ສປ ຈີນຕ່າງກໍເຫັນຄວາມສໍາຄັນໃນການກໍານົດແຜນຍຸດທະສາດ ແລະ ມາດຕະການຕ່າງໆ ໃນການພັດທະນາສືມືແຮງງານ, ກຳລັງຄົນ ແລະ ສົ່ງເສີມການຈ້າງງານ. ແຜນການ ແລະ ມາດຕະການໃນການສົ່ງເສີມວິສາຫະກິດບໍລິການດ້ານຊັບພະຍາກອນມະນຸດຂອງລັດຖະບານ ຈະເປັນຕົວຊີ້ວັດໜຶ່ງໃນການປັບປຸງຊ່ອງທາງການຊອກຫາວຽກເຮັດງານທຳບໍ່ວ່າຈະເປັນພາກລັດ ຫຼື ເອກະຊົນ. ການພັດທະນາກຳລັງຄົນ ໂດຍສຸມໃສ່ການສົ່ງເສີມການຈ້າງງານ, ການພັດທະນາທັກສະສີມືແຮງງານ ເພື່ອຫຼຸດຈໍານວນຜູ້ວ່າງງານໃນສັງຄົມ, ຫຼຸດຊ່ອງວ່າງໃນຕະຫຼາດແຮງງານ ແລະ ຈັດສັນຊັບພະຍາກອນມະນຸດໃຫ້ເກີດປະໂຫຍດສູງສຸດ.
ຮຽບຮຽງໂດຍ: ໜ່ວຍງານຄົ້ນຄວ້າຮ່ວມ ລາວ-ຈີນ, ສະຖາບັນການຕ່າງປະເທດ
