ການແຂ່ງຂັນເທັນນິດ ແກຣນສະແລມທີ 2 ຂອງປີ ລາຍການ ເຟຣນ ໂອເພັນ 2023 ຊີງເງິນລາງວັນລວມ 49.600.000 ເອີໂຣ ທີ່ໂຣລັອງ ກາຣອດ ນະຄອນຫຼວງປາຣີດ ປະເທດຝຣັ່ງ ຊຶ່ງເປັນການແຂ່ງຂັນໃນຮອບຊີງຊະນະເລີດ ທັງປະເພດຊາຍດ່ຽວ ແລະ ຍິງດ່ຽວ ຊຶ່ງປະເພດຊາຍດ່ຽວ ຮອບຊີງຊະນະເລີດ ໄດ້ມີຂຶ້ນໃນວັນທີ 11 ມິຖຸນາ ຜ່ານມາ, ໂນວັກ ຢໍໂຄວິດ ມື 3 ຂອງໂລກ ຈາກແຊກບີ ແລະ ເປັນແຊ໋ມເກົ່າ 2 ສະໄໝ ພົບກັບ ແຄດເປີ ຣຸດ ມືອັນດັບ 4 ຂອງໂລກ ຈາກນອກແວ ສຳລັບສະຖິຕິການພົບກັນມາຂອງທັງຄູ່ 4 ຄັ້ງ ເປັນ ໂນວັກ ຢໍໂຄວິດ ເປັນຝ່າຍເອົາຊະນະໄປໄດ້ທັງໝົດ. ຜົນການແຂ່ງຂັນໃນນັດນີ້ປະກົດວ່າ ໂນວັກ ຢໍໂຄວິດ ອາໄສຄວາມສີມືທີ່ເໜືອກວ່າ ແລະ ເບຣກເກມເສີບຂອງ ແຄດເປີ ຣຸດ ໃນເກມທີ່ 11 ແລ້ວກັບມາອອນເສີບໃນເກມຕໍ່ມາປິດແມ໊ດໄປຢ່າງສຸດເກັ່ງ ສາມາດເອົາຊະນະໄປໄດ້ 3-0 ເຊັດ 7-1, 6-3 ແລະ 7-5 ຄະແນນ.
ຈາກໄຊຊະນະໃນເກມນີ້ ເຮັດໃຫ້ ໂນວັກ ຢໍໂຄວິດ ຄວ້າແຊ໋ມໄປຄອງເປັນສະໄໝທີ 3 ຕໍ່ຈາກປີ 2016 ແລະ 2021 ແລະ ເປັນນັກເທັນນິດຊາຍ ທີ່ຄວ້າແຊ໋ມແກຣນສະແລມຫຼາຍທີ່ສຸດຕະຫຼອດການເປັນທີ່ຮຽບຮ້ອຍ ແຊງໜ້າ ຣາຟາເອວ ນາດາວ ຈາກແອັດສະປາຍ ທີ່ເຮັດໄວ້ 22 ລາຍການ ພ້ອມຮັບເງິນລາງວັນ 2.300.000 ເອີໂຣ. ສ່ວນ ແຄດເປີ ຣຸດ ຮັບເງິນລາງວັນ 1.150.000 ເອີໂຣ. ນອກຈາກນີ້, ຈາກການຄວ້າແຊ໋ມດັ່ງກ່າວ ຍັງຈະເຮັດໃຫ້ ຢໍໂຄວິດ ກັບຂຶ້ນໄປຄອງມື 1 ຂອງໂລກ ອີກຄັ້ງໃນການຈັດອັນດັບນັກເທັນນິດຊາຍໃນວັນທີ 12 ມິຖຸນາ 2023.
ຂະນະທີ່ປະເພດຍິງດ່ຽວ ຮອບຊີງຊະນະເລີດ ໄດ້ມີຂຶ້ນເມື່ອວັນທີ 10 ມິຖຸນາ ຜ່ານມາ, ອີກາ ຊິອອນເທັກ ມື 1 ຂອງໂລກ ຈາກໂປໂລຍ ພົບກັບ ຄາໂຣລິນາ ມູໂຊວາ ມືອັນດັບ 43 ຂອງໂລກ ຈາກສາທາລະນະລັດເຊັກ. ຜົນການແຂ່ງຂັນປະກົດວ່າ ຊິອອນເທັກ ສາມາດເອົາຊະນະໄປໄດ້ 2-1 ເຊັດ ຄວ້າແຊ໋ມເທັນນິດ ເຟຣນ ໂອເພັນ ໄປຄອງເປັນສະໄໝທີ 3 ແລະ ເປັນແຊ໋ມແກຣນສະແລມລາຍການທີ 4 ຂອງເຈົ້າຕົວ ແລະ ເປັນນັກເທັນນິດຍິງດ່ຽວຄົນທີ 4 ທີ່ອາຍຸນ້ອຍທີ່ສຸດໃນອາຍຸ 22 ປີ ທີ່ສາມາດຄວ້າແຊ໋ມແກຣນສະແລມໄດ້ເຖິງ 4 ລາຍການ.
ຮຽບຮຽງໂດຍ: ພອນເພັດ ບຸນຄ້ຳ
