ໃນວັນທີ 12 ມິຖຸນາ 2023 ນີ້, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບ ຂອງ ສະຫາຍ ອົສກາ ມານູແອນ ຊິນເວຣາ ມາຕິເນັດ ລັດຖະມົນຕີກະຊວງຍຸຕິທຳ, ສະມາຊິກພັກກອມມູນິດກູບາ, ສະມາຊິກຄະນະລັດຖະມົນຕີ, ສະມາຊິກສະພາປະຊາຊົນ ແຫ່ງຊາດ ກູບາ ໃນໂອ ກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໂອກາດນີ້, ສະຫາຍ ສອນໄຊ ສີພັນດອນ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ສປປ ລາວ ຢ່າງເປັນທາງການຂອງ ສະຫາຍ ອົສກາ ມານູແອນ ຊິນເວຣາ ມາຕິເນັດ ພ້ອມຄະນະໃນຄັ້ງນີ້, ເປັນປະກອບສ່ວນເຂົ້າໃນການສືບຕໍ່ຮັດແໜ້ນຄວາມສາມັກຄີ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຖານສະຫາຍອ້າຍນ້ອງ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໂດຍສະເພາະສອງກະຊວງຍຸຕິທຳລາວ-ກູບາ ໃຫ້ນັບມື້ແໜ້ນ ແຟ້ນ ແລະ ຂະຫຍາຍຕົວຍິ່ງໆຂຶ້ນ. ພ້ອມນີ້, ຍັງສະເໝີໃຫ້ສອງກະຊວງຍຸຕິທຳ ລາວ-ກູບາ ເອົາໃຈໃສ່ໃນການຜັນຂະຫຍາຍ ບົດບັນທຶກຄວາມເຂົ້າໃຈທີ່ໄດ້ລົງນາມກັນແລ້ວນັ້ນ ໃຫ້ເກີດດອກອອກຜົນເປັນຮູບປະທຳ ເປັນຕົ້ນ ການແລກປ່ຽນປະສົບການລະຫວ່າງ ຜູ້ຊ່ຽວຊານຂອງສອງກະຊວງ ໃນຂົງເຂດການສ້າງກົດໝາຍ, ການໃຫ້ຄຳປຶກສາທາງດ້ານກົດໝາຍ ແລະ ການປະຕິບັດທາງດ້ານກົດໝາຍ ແລະ ອື່ນໆ.
ສະຫາຍ ອົສກາ ມານູແອນ ຊິນເວຣາ ມາຕິເນັດ ໄດ້ສະແດງຄວາມຂອບໃຈຕໍ່ ສະຫາຍ ສອນໄຊ ສີພັນດອນ ທີ່ໄດ້ໃຫ້ການຕ້ອນຮັບໃນຄັ້ງນີ້ ເຊິ່ງການຢ້ຽມຢາມໃນຄັ້ງນີ້ ເປັນມິດໝາຍອັນດີ ເຮັດໃຫ້ການພົວພັນຮ່ວມມືຂອງ ສອງກະຊວງຍຸຕິທຳ ກູບາ-ລາວ ແໜ້ນແຟ້ນຍິ່ງຂຶ້ນ. ພ້ອມທັງໄດ້ແຈ້ງຈຸດປະສົງ ໃນເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຕື່ມອີກ.
ຂ່າວ: ກິດຕາ
ພາບ: ອ່າຍຄຳ
