ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໄດ້ສ້າງໂອກາດ ແລະ ຜົນປະໂຫຍດຢ່າງໃຫຍ່ຫຼວງໃຫ້ແກ່ປະເທດຕ່າງໆໃນໂລກ. ທັງສ້າງສາຍພົວພັນຄູ່ຮ່ວມມື ທີ່ໃກ້ຊິດກວ່າເກົ່າ, ຢຶດໝັ້ນການເດີນຕາມເສັ້ນທາງທີ່ສາມັກຄີ ແລະ ຮ່ວມກັນ, ເຊື່ອມຈອດກັນ ແລະ ພັດທະນາຮ່ວມກັນ, ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ຫົວໜ້າບັນນາທິການໃຫຍ່ ໜັງສືພິມປະຊາຊົນ ໄດ້ກ່າວວ່າ: ຜົນສໍາເລັດຂໍ້ລິເລີ່ມ ໜຶ່ງແລວທາງໜຶ່ງເສັ້ນທາງ ໃນໄລຍະ 10 ປີ ຜ່ານມາ ຊຶ່ງແມ່ນຍຸດທະສາດການພັດທະນາພື້ນຖານໂຄງລ່າງທົ່ວໂລກທີ່ລັດຖະບານຈີນ ໄດ້ນຳມາລົງທຶນໃນເກືອບ 70 ປະເທດ ໃນປີ 2013 ຊຶ່ງແມ່ນນະໂຍບາຍການຕ່າງປະເທດຂອງ ສປ ຈີນ ໃນໄລຍະ 10 ປີຜ່ານມາ,
ສປປ ລາວ ແມ່ນປະເທດທີ່ບໍ່ມີທາງອອກສູ່ທະເລພຽງປະເທດດຽວໃນອາຊີຕາເວັນອອກສຽງໃຕ້, ການທີ່ “ປະເທດລາວກຳນົດຍຸດທະສາດການຫັນປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດ” ແມ່ນຍຸດທະສາດການພັດທະນາຂອງລັດຖະບານ ສປປ ລາວ, ທັງແມ່ນຄວາມໃຝ່ຝັນອັນແຮງກ້າໃນການພັດທະນາຂອງປະຊາຊົນລາວ. ເພື່ອຕອບສະໜອງກັບຄວາມຮຽກຮ້ອງຕ້ອງການຂອງປະເທດ ລາວ-ຈີນ ໄດ້ຮ່ວມກັນຊຸກຍູ້ການຮ່ວມມືກັນສ້າງພື້ນຖານໂຄງລ່າງ ໃນນັ້ນເສັ້ນທາງລົດໄຟລາວ-ຈີນ ແລະ ທາງດ່ວນວຽງຈັນ-ວັງວຽງ ໄດ້ສ້າງສຳເລັດ ແລະ ເປີດແລ່ນລົດໄດ້ໃນທ້າຍປີ 2020 ແລະ ທ້າຍປີ 2021 ຊຶ່ງທາງສອງເສັ້ນນີ້ເຮັດໃຫ້ປະເທດລາວ ສາມາດເຊື່ອມໂຍງເຂົ້າກັບຕາໜ່າງເຊື່ອມໂຍງເຊື່ອມຈອດກັນໃນພາກພື້ນດ້ວຍທ່ວງທ່າອັນໃໝ່.
ຫັນປະເທດທີ່ບໍ່ມີທາງອອກສູ່ທະເລ ເປັນປະເທດທີ່ເຊື່ອມໂຍງເຊື່ອມຈອດ ກັບຕ່ອງໂສ້ອຸດສາຫະກຳຂອງພາກພື້ນກໍຄືຂອງໂລກ, ຍັງໄດ້ຊຸກຍູ້ການພັດທະນາເສດຖະກິດຂອງພາກພື້ນອີກດ້ວຍ ທັງໄດ້ສ້າງໂອກາດ ສ້າງວຽກເຮັດງານທຳໃຫ້ກັບປະຊາຊົນລາວຢ່າງຫຼວງຫຼາຍ ໂດຍຜ່ານການກໍ່ສ້າງພື້ນຖານໂຄງລ່າງ ແລະ ໂຄງການລົງທຶນຂະໜາດໃຫຍ່, ການສ້າງ “ໜຶ່ງແລວໜຶ່ງເສັ້ນທາງ” ມີການແບ່ງປັນຜົນປະໂຫຍດຮ່ວມກັນນັ້ນສາມາດແກ້ໄຂບັນຫາ ທັງເປັນການເພີ່ມພະລັງແຮງຂອງພາກພື້ນອາຊີ-ປາຊີຟິກໃນການເຊື່ອມຈອດກັນກັບໂລກ, ທັງຊ່ວຍເພີ່ມຄວາມໝັ້ນໃຈໃຫ້ກັບການຟື້ນຟູເສດຖະກິດຂອງໂລກໄດ້ຢ່າງຕໍ່ເນື່ອງກໍຄືການປະກອບສ່ວນອັນໃຫຍ່ຫຼວງກວ່າເກົ່າໃນການສ້າງປະຊາຄົມຮ່ວມຊາຕາກຳລາວ-ຈີນ. ທັງໝົດນີ້ກໍເພື່ອຮັບປະກັນຜົນປະໂຫຍດຂອງຊາດ ກໍຄື ການພົວພັນລະຫວ່າງສອງຊາດ ລາວ-ຈີນ ໃຫ້ປະສົບຜົນສຳເລັດໃນທຸກໆດ້ານຢ່າງຈົບງາມ.
