ວິທະຍຸກະຈາຍສຽງຫວຽດນາມລາຍງານວ່າ: ວັນທີ 11 ມິຖຸນາ ຜ່ານມານີ້ ຢູ່ ຮ່າໂນ້ຍ, ໄດ້ຈັດພິທີສະເຫຼີມສະຫຼອງ 75 ປີ ວັນປະທານ ໂຮ່ຈິມິນ ອອກຄຳຮຽກຮ້ອງແຂ່ງຂັນຮັກຊາດ (11 ມິຖຸນາ 1948 – 11 ມິຖຸນາ 2023). ເຂົ້າຮ່ວມ ແລະ ກ່າວຄຳເຫັນໃນພິທີ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ເນັ້ນໜັກວ່າ: ກ່ອນນີ້ 75 ປີ, ວັນທີ 11 ມິຖຸນາ 1948, ປະທານ ໂຮ່ຈິມິນ ໄດ້ອອກຄຳຮຽກຮ້ອງແຂ່ງຂັນຮັກຊາດ, ເລີ່ມປຸກລະດົມຂະບວນການແຂ່ງຂັນຮັກຊາດໃນທົ່ວພັກ, ທົ່ວປວງຊົນ ແລະ ທົ່ວກອງທັບ. ປະທານ ໂຮ່ຈິມິນ ຊີ້ແຈ້ງວ່າ: “ແຂ່ງຂັນແມ່ນຮັກຊາດ, ຮັກຊາດຕ້ອງແຂ່ງຂັນ, ບັນດາຜູ້ແຂ່ງຂັນແມ່ນຜູ້ຮັກຊາດ”. ນັບແຕ່ນັ້ນມາຮອດປັດຈຸບັນ, ຂະບວນການແຂ່ງຂັນຮັກຊາດໄດ້ກາຍເປັນຂະບວນການຢ່າງກວ້າງຂວາງ ຢູ່ທົ່ວທຸກຂົງເຂດຂອງປະເທດຊາດ. ນີ້ແມ່ນກຳລັງໜູນສຳຄັນ ເພື່ອໃຫ້ການປະຕິວັດ ຫວຽດນາມ ຈາກໄຊຊະນະນີ້ໄປສູ່ໄຊຊະນະອື່ນ.
ທ່ານ ຟ້າມມິງຈິງ ຍັງເນັ້ນໜັກວ່າ: ຜູ້ແທນ 700 ຄົນທີ່ເຂົ້າຮ່ວມກອງປະຊຸມ ແມ່ນບັນດາແບບຢ່າງດີເດັ່ນ, ຕາງໜ້າໃຫ້ນັບລ້ານໝູ່ຄະນະ, ສ່ວນບຸກຄົນດີເດັ່ນໃນທຸກຂົງເຂດ. ໃນສະພາບປະເທດຊາດພວມຢືນຢູ່ຕໍ່ໜ້າບັນດາໂອກາດ, ຄວາມສະດວກ, ຄວາມຫຍຸ້ງຍາກ ແລະ ສິ່ງທ້າທາຍສະຫຼັບກັນ, ສະເໜີໃຫ້ທຸກຂັ້ນ, ທຸກຂະແໜງການ ເພີ່ມທະວີການໂຄສະນາກ່ຽວກັບບັນດາຂະບວນການແຂ່ງຂັນຮັກຊາດ, ບັນດາແບບຢ່າງດີເດັ່ນ, ຮູບແບບໃໝ່, ປະດິດຄິດສ້າງ ເພື່ອປະກອບສ່ວນຢ່າງແທດຈິງສ້າງພື້ນຖານຄຸນສົມບັດທີ່ດີງາມ, ເຮັດໃຫ້ສັງຄົມນັບມື້ນັບມີຄວາມຜາສຸກ.
