ວິທະຍຸກະຈາຍສຽງຫວຽດນາມລາຍງານວ່າ: ຕາມບົດລາຍງານຂອງ Amazon Global Selling (ເປັນໜຶ່ງໃນໜ່ວຍທຸລະກິດຂອງ ອາເມຊອນ ທີ່ຊ່ວຍທຸລະກິດຈາກທຸກມູມຂອງໂລກຂະຫຍາຍທຸລະກິດ ດ້ວຍການເຂົ້າເຖິງລູກຄ້າຂອງ ອາເມຊອນ ທົ່ວໂລກ ແລະ ການສ້າງຍີ່ຫໍ້ສິນຄ້າລະດັບສາກົນ) ໃຫ້ຮູ້ວ່າ: ໃນປີ 2022, ຈຳນວນວິສາຫະກິດ ຫວຽດນາມ ເຂົ້າຮ່ວມການຂາຍໃນຊ່ອງທາງອອນລາຍຂອງ ອາເມຊອນ ເພີ່ມຂຶ້ນ 80% ເມື່ອທຽບກັບໄລຍະດຽວກັນ; ມີຜະລິດຕະພັນເກືອບ 10 ລ້ານຢ່າງທີ່ມີເຄື່ອງໝາຍການຄ້າ ຫວຽດນາມ ຂາຍຢູ່ໃນຊ່ອງທາງ ອອນລາຍຂອງ ອາເມຊອນ.
ທ່ານນາງ ລ້າຍຫວຽດແອັງ ຮອງຫົວໜ້າກົມການຄ້າເອເລັກໂຕຣນິກ ແລະ ເສດຖະກິດດີຈີຕອນ, ກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ: ກົມການຄ້າເອເລັກໂຕຣນິກ ແລະ ເສດຖະກິດດີຈີຕອນ ໄດ້ມີຫຼາຍໂຄງການສົມທົບກັບບັນດາພື້ນຖານການຄ້າເອເລັກໂຕຣນິກຂ້າມຊາຍແດນ ເພື່ອແນໃສ່ຊຸກຍູ້ວິສາຫະກິດ ຫວຽດນາມ ຍົກສູງກຳລັງຄວາມສາມາດໝູນໃຊ້ການຄ້າເອເລັກໂຕຣນິກຂ້າມຊາຍແດນ, ປະກອບທັກສະຂາຍເຄື່ອງທີ່ບັນລຸປະສິດທິຜົນ ໃນພື້ນຖານການຄ້າເອເລັກໂຕຣນິກທົ່ວໂລກ ແລະ ນຳຜະລິດຕະພັນຂອງຕົນສຳຜັດກັບບັນດາຕະຫຼາດທີ່ມີຄວາມສາມາດບົ່ມຊ້ອນ.
