ວັນທີ 10 ມິຖຸນາ 2023, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງນິງບິ່ງ, ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ພົບປະ ແລະ ເຮັດວຽກກັບ ສະຫາຍ ຟາມ ກວາງ ຫງອກ, ຮອງເລຂາພັກແຂວງ, ປະທານຄະນະກໍາມະການປະຊາຊົນ ແຂວງນິງບິ່ງ, (ເຈົ້າແຂວງ), ມີການນໍາແຂວງເຂົ້າຮ່ວມຢ່າງພ້ອມພຽງ, ໃນການຕ້ອນຮັບຄັ້ງນີ້ການນຳແຂວງກໍໄດ້ສະແດງຄວາມຍິນດີຕ້ອນຮັບ, ຕີລາຄາສູງ ທີ່ ສະຫາຍ ເອກອັກຄະລັດຖະທູດ ທີ່ໃກ້ຈະສຳເລັດໜ້າທີ່ການທູດຢູ່ ຫວຽດນາມ.
ໂອກາດນີ້, ສະຫາຍ ຟາມ ກວາງ ຫງອກ ກໍໄດ້ລາຍງານໂດຍຫຍໍ້ກ່ຽວກັບທີ່ຕັ້ງ, ທ່າແຮງ, ເງື່ອນໄຂທາງດ້ານທຳມະຊາດ ກໍຄືສະພາບການພັດທະນາ ເສດຖະກິດ -ສັງຄົມຂອງແຂວງໃນໄລຍະຜ່ານມາ ຊຶ່ງແຂວງເລັ່ງໃສ່ສາມຂະແໜງຕົ້ນຕໍໃນການພັດທະນາ ເປັນຕົ້ນແມ່ນ: ດ້ານອຸດສາຫະກໍາ, ການທ່ອງທ່ຽວ ແລະ ກະສິກໍາ. ພ້ອມທັງໄດ້ແຈ້ງໃຫ້ຊາບການພົວພັນຮ່ວມມືກັບ ສປປ ລາວ, ໂດຍສະເພາະ ແຂວງນິງບິ່ງໄດ້ເຊັນບົດບັນທຶກການແຮກສ່ຽວ ກັບແຂວງອຸດົມໄຊຂອງລາວ, ສອງຝ່າຍໄດ້ມີຄວາມພະຍາຍາມຮ່ວມໃນການຮັດແໜ້ນຄວາມສາມັກຄີ ຊຶ່ງແຕ່ລະປີມີການແຕ່ງຕັ້ງຄະນະຜູ້ແທນຂັ້ນຕ່າງໆຢ້ຽມຢາມກັນຢ່າງເປັນປົກກະຕິ, ໃຫ້ການສະໜັບ ສະໜູນ, ຊ່ວຍເຫຼືອເຊິ່ງກັນ ແລະ ກັນຕະຫຼອດມາ ໂດຍສະເພາະແຂວງນິງບີ່ງທີ່ໃຫ້ການຊ່ວຍເຫຼືອໃນການກໍ່ສ້າງພື້ນຖານໂຄງລ່າງ ແລະ ການຊ່ວຍກໍ່ສ້າງຊັບພະ ຍາກອນມະນຸດໃຫ້ແກ່ແຂວງອຸດົມໄຊ. ນອກນີ້, ແຂວງຍັງມີຄວາມພະຍາຍາມໃນການສືບຕໍ່ເສີມຂະຫຍາຍການພົວພັນຮ່ວມມືກັບທ້ອງ ຖິ່ນອື່ນຂອງລາວໂດຍສະເພາະແຂວງຫຼວງພະບາງ ທີ່ມີລັກສະນະຄືກັບແຂວງນິງບີ່ງ ເພາະສອງແຂວງລ້ວນແຕ່ເປັນນະຄອນຫຼວງເກົ່າຂອງປະເທດ ພ້ອມທັງມີທ່າແຮງການທ່ອງທ່ຽວເຊັ່ນດຽວກັນ. ສະຫາຍເຈົ້າແຂວງຍັງໃຫ້ສະແດງຄວາມເຊື່ອໝັ້ນວ່າ ໃນຕໍ່ໜ້າເຖິງວ່າສະຫາຍເອກອັກຄະລັດຖະທູດຈະສິ້ນສຸດການດຳລົງຕຳແໜ່ງເປັນທູດລາວ ປະຈໍາ ຫວຽດ ນາມ ແລ້ວກໍຕາມຫວັງວ່າສະຫາຍຈະສືບຕໍ່ເປັນຂົວຕໍ່ທີ່ສຳຄັນໃນການປະສານງານລະຫວ່າງສອງປະເທດເວົ້າລວມ, ເວົ້າສະເພາະແມ່ນແຂວງນິງບິ່ງ ແລະ ແຂວງອຸດົມໄຊ.
ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ເປັນກັນເອງໃນຖານສະຫາຍອ້າຍນ້ອງພ້ອມທັງສະແດງຄວາມຊົມເຊີຍໝາກຜົນການພັດທະນາເສດຖະ ກິດ-ສັງຄົມ ໃນໄລຍະຜ່ານມາ, ຊຶ່ງບັນດາຜົນສຳເລັດດັ່ງກ່າວ ກໍໄດ້ສະແດງ ໃຫ້ເຫັນເຖິງການວາງແນວທາງທີ່ຖືກຕ້ອງ, ຄວາມສາມາດ ໃນການຊີ້ນຳ-ນຳພາຂອງອົງຄະນະພັກ, ອຳນາດການ ປົກຄອງ ແລະ ການເປັນຈິດໜຶ່ງໃຈດຽວຂອງປະຊາຊົນແຂວງນິງບິ່ງ. ພ້ອມທັງຕີລາຄາສູງການພົວພັນຮ່ວມມື ລະຫວ່າງ ສອງປະເທດໂດຍສະເພາະແມ່ນປີ 2022 ເປັນປີສາມັກຄີມິດຕະພາບລາວ-ຫວຽດນາມ, ການນຳແຂວງນິງບິ່ງກໍໄດ້ໄປເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ, ນອກຈາກນັ້ນ ແຂວງນິງບິ່ງຍັງໄດ້ໃຫ້ການຊ່ວຍເຫຼືອທາງດ້ານພື້ນຖານໂຄງລ່າງໃຫ້ແກ່ແຂວງອຸດົມໄຊ, ພ້ອມດຽວກັນນັ້ນສະຫາຍໄດ້ຕາງໜ້າໃຫ້ແກ່ການນຳ ແລະ ປະຊາຊົນແຂວງອຸດົມໄຊ ສະແດງຄວາມຂອບໃຈມາຍັງການນຳພ້ອມດ້ວຍອຳນາດການປົກຄອງ ແລະ ປະຊາຊົນ ແຂວງນິງບິ່ງທີ່ໄດ້ໃຫ້ການຊ່ວຍເຫຼືອປະກອບສ່ວນສ້າງພື້ນຖານໂຄງລ່າງໃຫ້ແກ່ແຂວງອຸດດົມໄຊ, ໂດຍສະເພາະແມ່ນການສ້າງບຸກຄະລາກອນ, ການໃຫ້ທຶນການສຶກສາແຂວງອຸດົມໄຊ, ຂອບໃຈມາຍັງມະຫາວິທະ ຍາໄລຮວາລືທີ່ໄດ້ເອົາໃຈໃສ່ໃນການສິດສອນ, ຄຸ້ມຄອງນັກສຶກສາລາວເປັນຢ່າງດີ, ສະຫາຍຍັງເຊື່ອໝັ້ນວ່າໃນອະນາຄົດ ແຂວງນິງບິ່ງຈະສືບຕໍ່ຮ່ວມມືກັບບັນດາແຂວງຂອງລາວຕື່ມເຊັ່ນ: ແຂວງຫຼວງພະບາງ ເພື່ອນຳເອົາຜົນປະໂຫຍດທີ່ແທ້ຈິງມາສູ່ປະຊາຊົນສອງຝ່າຍ. ພ້ອມທັງຢືນຢັນວ່າ ໃນອະນາຄົດເຖິງວ່າຈະສຳເລັດໜ້າທີ່ການທູດຢູ່ ສສ ຫວຽດນາມ ແລ້ວກໍຕາມ, ແຕ່ຍັງຈະສືບຕໍ່ເປັນຂົວຕໍ່ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ-ສອງລັດ ແລະ ປະຊາຊົນ ສອງຊາດ ລາວ-ຫວຽດນາມເວົ້າລວມ, ເວົ້າສະເພາະແມ່ນບັນດາທ້ອງຖິ່ນຂອງລາວກັບແຂວງນິງບິ່ງໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.
ຂ່າວ,ພາບ: ສະຖານທູດລາວທີ່ຮ່າໂນ້ຍ
