ປິດສາກລົງແລ້ວ ງານກິລາຄົນພິການອາຊຽນ ຄັ້ງທີ 12 ຫຼື ອາຊຽນ ພາຣາເກມ ທີ່ຣາຊະອານາຈັກກຳປູເຈຍ ຮັບກຽດເປັນເຈົ້າພາບ ລະຫວ່າງວັນທີ 3-9 ມິຖຸນາ 2023 ໂດຍທັບນັກກິລາຄົນພິການທີມຊາດອິນໂດເນເຊຍ ກວາດມາໄດ້ເຖິງ 153 ຫຼຽນຄຳ, 141 ຫຼຽນເງິນ ແລະ 93 ຫຼຽນທອງ ຄອງເຈົ້າຫຼຽນຄຳ ສ່ວນອັນດັບທີ 2 ແມ່ນໄທ ຍາດໄດ້ 123 ຫຼຽນຄຳ ແລະ ອັນດັບ 3 ແມ່ນ ຫວຽດນາມ ຍາດໄດ້ 66 ຫຼຽນຄຳ ສ່ວນເຈົ້າພາບ ຢູ່ອັນດັບທີ 8 ຍາດໄດ້ 9 ຫຼຽນຄຳ ແລະ ສປປ ລາວ ຢູ່ອັນດັບທ້າຍຕາຕະລາງສະຫຼຸບຫຼຽນ ຍາດໄດ້ 2 ຫຼຽນເງິນ ແລະ 10 ຫຼຽນທອງ ຈາກ 11 ຊາດ ເຂົ້າຮ່ວມ ພົບກັນໃໝ່ ໃນອາຊຽນ ພາຣາເກມ ຄັ້ງທີ 13 ທີ່ແຂວງນະຄອນຣາຊະສີມາ ຫຼື ໂຄຣາດ ຣາຊະອານາຈັກໄທ ຮັບກຽດເປັນເຈົ້າພາບ ໃນປີ 2026.
ພິທີປິດງານກິລາຄົນພິການອາຊຽນ ຄັ້ງທີ 12 ໄດ້ມີຂຶ້ນ ໃນຄໍ່າຄືນວັນທີ 9 ມິຖຸນາ 2023 ທີ່ສະໜາມກິລາແຫ່ງຊາດ ມໍລະດົກ ເຕໂຊ ນະຄອນຫຼວງ ພະນົມເປັນ ຣາຊະອານາຈັກກຳປູເຈຍ ໃນພິທີດັ່ງກ່າວ ກໍໄດ້ມີລາຍການການສະແດງຈາກນັກສະແດງຂອງປະເທດເຈົ້າພາບ ຊ່ອງແສງໃຫ້ເຫັນເຖິງຄວາມເປັນເອກກະລັກຂອງການເຕີບໃຫຍ່ຂະຫຍາຍຕົວຂອງຊາດກຳປູເຈຍ ພ້ອມທັງຮັບຊົມການສະແດງການກຽມເປັນເຈົ້າພາບຂອງ ຣາຊະອານາຈັກໄທ ຊຶ່ງມີການສະແດງໂຊເຕັ້ນແອໂຣບິກ ລະດັບໂລກ ແລະ ການສະແດງທີ່ສື່ເຖິງຄວາມໝາຍຄວາມສຳຄັນຂອງ ແຂວງນະຄອນຣາຊະສີມາ ອີກດ້ວຍ ກ່ອນຈະມີການມອບທຸງກິລາພາຣາເກມ ໃຫ້ ໄທ ນຳໄປກຽມເປັນເຈົ້າພາບໃນຄັ້ງຕໍ່ໄປ ຊຶ່ງກຳນົດຈະຈັດແຂ່ງຂັນໃນ ລະຫວ່າງວັນທີ 20-26 ມັງກອນ 2026 ໃຫ້ກຽດເຂົ້າຮ່ວມໂດຍພະນະທ່ານ ສົມເດັດ ຮຸນເຊນ ນາຍົກລັດຖະມົນຕີ ແຫ່ງຣາຊະອານາຈັກກຳປູເຈຍ ມີບັນດການນຳຂັ້ນສູງຂອງກຳປູເຈຍ ແລະ ບັນດາປະເທດໃນອາຊຽນ. ໃນນີ້ຕາງໜ້າຄະນະນຳລາວແມ່ນ ທ່ານ ປອ ນາງ ດາລາວອນ ກິດຕິພັນ ຫົວໜ້າຫ້ອງການ ກະຊວງສຶກສາທິການ ແລະ ກິລາ ທັງເປັນຮອງປະທານຄະນະກຳມະການພາລາແລມປິກແຫ່ງຊາດລາວ ຕະຫຼອດຮອດຊາວກຳປູເຈຍ ເຂົ້າຮ່ວມເຕັມບັນຈຸສະໜາມ 7 ໝື່ນກວ່າຄົນ.
ງານກິລາອາຊຽນ ພາຣາເກມ ຄັ້ງນີ້ ມີຄະນະນຳ, ຄູຝຶກ ແລະ ນັກກິລາເຂົ້າຮ່ວມ 2.692 ຄົນ ຈາກ 11 ຊາດໃນອາຊຽນ ສະເພາະ ສປປ ລາວ ສົ່ງເຂົ້າຮ່ວມ 89 ຄົນ, ຍິງ 36 ຄົນ ຮ່ວມແຂ່ງຂັນໃນ 7 ປະເພດກິລາ ຈາກທັງໝົດ 14 ປະເພດກິລາທີ່ເຈົ້າພາບບັນຈຸແຂ່ງຂັນ ຄື: ບານເຕະຄົນພິການຕາ (5 ຄົນ), ໂກນບານ, ບັອດເຊຍ, ບານບ້ວງລໍ້ເລື່ອນທີມຍິງ, ລອຍນໍ້າ, ຍົກນໍ້າໜັກ ແລະ ແລ່ນ-ລານ ຜົນງານຂອງທັບນັກກິລາຄົນພິການລາວ ສາມາດຍາດໄດ້ 2 ຫຼຽນເງິນ ແລະ 10 ຫຼຽນທອງ ຢູ່ອັນດັບສຸດທາຍຂອງຕາຕະລາງສະຫຼຸບຫຼຽນລາງວັນ ຈາກ 11 ຊາດ ເຂົ້າຮ່ວມ ຂະນະທີ່ ທັບນັກກິລາຄົນພິການທີມຊາດອິນໂດເນເຊຍ ກວາດມາໄດ້ 152 ຫຼຽນຄຳ, 139 ຫຼຽນເງິນ ແລະ 87 ຫຼຽນທອງ ຄອງເຈົ້າຫຼຽນຄຳ ສ່ວນອັນດັບທີ 2 ແມ່ນໄທ ຍາດໄດ້ 123 ຫຼຽນຄຳ, 107 ຫຼຽນເງິນ ແລະ 92 ຫຼຽນທອງ ສ່ວນ ອັນດັບ 3 ແມ່ນ ຫວຽດນາມ ຍາດໄດ້ 66 ຫຼຽນຄຳ, 56 ຫຼຽນເງິນ, 78 ຫຼຽນທອງ ແລະ ເຈົ້າພາບ ຍາດໄດ້ 9 ຫຼຽນຄຳ, 18 ຫຼຽນເງິນ ແລະ 43 ຫຼຽນທອງ ຢູ່ອັນດັບທີ 8.
ສຳລັບຜົນງານ 2 ຫຼຽນເງິນ ຂອງທັບນັກກິລາຄົນພິການລາວ ໄດ້ຈາກກິລາ ຍົກນໍ້າໜັກ ຈາກນາງ ລັດສະໝີ ສີປະເສີດ ຮຸ່ນນໍ້າໜັກ 45 ກິໂລກຣາມ ແລະ ກິລາ ໂກນບານ ປະກອບມີ ນາງ ສຸກດາວີ ໄຊສົມພູ, ນາງ ຈັນສະໝອນ ໄຊສົມພູ, ນາງ ສອນມະລີ ໄຊສົມພູ, ນາງ ລັດສະໝີ ວົງສາເກດທິບ, ນາງ ເຄືອ ອິນທິວົງ ແລະ ນາງ ຫຼ້າ ດາລາວົງ ແລະ 10 ຫຼຽນທອງ ໄດ້ຈາກກິລາ ຍົກນໍ້າໜັກ ຮຸ່ນ 45 ກິໂລກຣາມ 1 ຫຼຽນ, ແລ່ນ-ລານ 6 ຫຼຽນ, ບານເຕະຄົນພິການຕາ 1 ຫຼຽນ ແລະ ບານບ້ວງລໍ້ເລື່ອນຍິງ 2 ຫຼຽນທອງ.
ຂ່າວໂດຍ: ສົງການ ພັນແພງດີ
