ຂ່າວຕ່າງປະເທດລາຍງານ ໃນວັນທີ 8 ມິຖຸນາ ຜ່ານມາ, ລັດຖະບານເອຢິບໄດ້ປະກາດວ່າ: ໜ່ວຍງານລັດເກືອບທຸກແຫ່ງ ໂດຍສະເພາະກະຊວງທັງໝົດຈະຍ້າຍສະຖານທີ່ໄປຢູ່ເມືອງຫຼວງແຫ່ງໃໝ່ ຊຶ່ງຢູ່ຫ່າງໄກຈາກນະຄອນຫຼວງໄຄໂຣ ໄປທາງພາກຕາເວັນອອກປະມານ 50 ກິໂລແມັດ ພາຍໃນທ້າຍເດືອນມິຖຸນານີ້.
ທ່ານ ມອສຕາຟາ ແມດບູລີ ນາຍົກລັດຖະມົນຕີເອຢິບກ່າວວ່າ: ກະຊວງທຸກແຫ່ງຕະຫຼອດຈົນຮອດສະຖາບັນ ແລະ ໜ່ວຍງານທີ່ກຳນົດ ພ້ອມດ້ວຍເຈົ້າໜ້າທີ່ຈະເລີ່ມປະຕິບັດງານຢູ່ສຳນັກງານໃຫຍ່ແຫ່ງໃໝ່ ຊຶ່ງຕັ້ງຢູ່ພາຍໃນເຂດເມືອງຫຼວງແຫ່ງໃໝ່ (NAC) ຕັ້ງແຕ່ເດືອນກໍລະກົດເປັນຕົ້ນໄປ. ເມື່ອເບິ່ງກັບໄປໃນເດືອນມີນາຜ່ານມາ, ທ່ານ ອັບເດນ ຟັດຕາ ອັນ-ຊີຊີ ປະທານາທິບໍດີເອຢິບ ກ່າວວ່າ: ການປ່ຽນຜ່ານຂອງລັດຖະບານສູ່ເມືອງຫຼວງແຫ່ງໃໝ່ ຈະສະທ້ອນໃຫ້ເຫັນເຖິງການພັດທະນາທີ່ແທ້ຈິງຂອງໂຄງສ້າງການບໍລິຫານຂອງລັດ ຜ່ານການປັບປຸງຕຶກອາຄານໃຫ້ທັນສະໄໝ ແລະ ການຝຶກອົບຮົມພະນັກງານກ່ຽວກັບວິທີການເຮັດວຽກໃນພື້ນຖານວິທະຍາສາດແບບສະໄໝໃໝ່. ຂະນະດຽວກັນ, ທ່ານ ອັນ-ຊີຊີ ກ່າວວ່າ: ເມືອງຫຼວງແຫ່ງໃໝ່ ຊຶ່ງສາມາດຮອງຮັບເຈົ້າໜ້າທີ່ຂອງລັດໄດ້ຫຼາຍກວ່າ 50.000 ຄົນ ແລະ ມີການຄາດຄະເນວ່າ ຈະສາມາດຊ່ວຍສ້າງວຽກເຮັດງານທຳເພີ່ມອີກ 2 ລ້ານອັດຕາ.
ທັງນີ້, ເມືອງຫຼວງແຫ່ງໃໝ່ຂອງເອຢິບໄດ້ຮັບການອອກແບບເພື່ອເປັນສະຖານທີ່ຕັ້ງຂອງສະຖາບັນສຳຄັນຕ່າງໆຂອງລັດຖະບານ ຊຶ່ງຍ້າຍອອກຈາກນະຄອນຫຼວງໄຄໂຣ ທີ່ມີຄວາມແອອັດ ແລະ ມີປະຊາກອນໜາແໜ້ນ ໂດຍຈຳນວນປະຊາກອນໃນນະຄອນຫຼວງໄຄໂຣໃນປັດຈຸບັນມີອັດຕາສ່ວນເຖິງ 1/5 ຂອງຈຳນວນປະຊາກອນປະມານ 100 ລ້ານຄົນທົ່ວປະເທດ.
