ກະຊວງການເງິນ ຈັດພິທີປະກາດການຈັດຕັ້ງຂັ້ນກົມ ແລະ ຂັ້ນພະແນກ, ພ້ອມທັງປະຕິບັດນະໂຍ ບາຍຕໍ່ພະນັກງານ-ລັດຖະກອນຮັບອຸດໜູນບໍານານ ໃນວັນທີ 8 ມິຖຸນາ 2023 ໂດຍການເປັນປະທານຂອງທ່ານ ບຸນປອນ ວັນນະຈິດ ຮອງລັດຖະມົນ ຕີກະຊວງການເງິນ, ມີ ທ່ານ ກົງຄຳ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ, ທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງການເງິນ; ຕາງໜ້າບັນດາຫົວໜ້າກົມອ້ອມຂ້າງ ກະຊວງ, ຄະນະພະແນກ-ຮອງພະແນກ, ພ້ອມດ້ວຍພະນັກງານຫລັກແຫລ່ງຂອງກະຊວງ ເຂົ້າຮ່ວມ.
ໃນພິທິ, ທ່ານ ຫອມຮັກ ສຸນາວັນ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ, ໄດ້ຜ່ານຂໍ້ສະບັບເລກທີ 1110/ກງ, ລົງວັນທີ 12 ເມສາ 2023, ລັດຖະມົນຕີກະຊວງການເງິນຕົກລົງອະນຸມັດໃຫ້: ທ່ານ ອັກຄະວອນ ຫລວງສຸວັນນະວົງ ພັກການຮັບອຸດໜູນບຳນານນັບແຕ່ງວດ III (7,8,9) ປີ 2023 ເປັນຕົ້ນໄປ; ຜ່ານດໍາລັດວ່າດ້ວຍການແຕ່ງຕັ້ງຫົວໜ້າກົມເຕັກໂນໂລຊີຂໍ້ມູນຂ່າວສານການເງິນ ກະຊວງການເງິນ ສະບັບເລກທີ 209/ນຍ, ວັນທີ 17 ພຶດສະພາ 2023 ນາຍົກລັດຖະມົນຕີແຕ່ງຕັ້ງ: ທ່ານ ວິໄລທອງ ສຸດທະວິໄລ ເປັນຫົວໜ້າກົມເຕັກໂນໂລຊີຂໍ້ມູນຂ່າວສານການເງິນ. ພ້ອມນັ້ນ, ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຮອງຫົວໜ້າ ກົມພາສີ, ແຕ່ງຕັ້ງຮອງຫົວໜ້າຄັງເງິນແຫ່ງຊາດ, ແຕ່ງຕັ້ງຮອງຜູ້ອໍານວຍການບໍລິສັດ ອາລິອັນສ໌ ປະກັນໄພລາວ; ຍົກຍ້າຍ ແລະ ແຕ່ງຕັ້ງ ຮອງຜູ້ອຳນວຍການບໍລິສັດ ລັດວິສາຫະກິດ ຫວຍພັດທະນາ; ຍົກຍ້າຍ ແລະ ແຕ່ງຕັ້ງ ຫົວໜ້າພະແນກຄຸ້ມຄອງເຄືອຄ່າຍ ແລະ ຄວາມປອດໄພ ກົມເຕັກໂນໂລຊີຂໍ້ມູນຂ່າວສານການເງິນ ກະຊວງການເງິນ ໄປຮັບໜ້າທີ່ໃໝ່ຢູ່ບໍລິສັດ ໂອຊີເຄ ລາວ ທາວເວີໂກ ຈຳກັດ. ພ້ອມນີ້, ກໍໄດ້ຜ່ານຂໍ້ຕົກລົງຍົກຍ້າຍ-ແຕ່ງຕັ້ງ: ຫົວໜ້າ-ຮອງຫົວໜ້າພະແນກຈັດຕັ້ງ, ບໍລິຫານ ແລະ ການເງິນ; ຫົວໜ້າ-ຮອງຫົວໜ້າພະແນກກວດກາພາຍໃນ; ຫົວໜ້າ-ຮອງຫົວໜ້າ ພະແນກນິຕິກຳ; ຫົວໜ້າ-ຮອງຫົວໜ້າພະແນກຄຸ້ມຄອງຂໍ້ມູນຂ່າວສານສ່ວຍອາກອນ; ຫົວໜ້າ-ຮອງຫົວໜ້າພະແນກແຜນການ ແລະ ການຮ່ວມມືອາ ກອນສາກົນ; ຫົວໜ້າ-ຮອງຫົວໜ້າພະແນກຝຶກ ອົບຮົມ ແລະ ພັດທະນາບຸກຄະລາກອນ; ຫົວໜ້າ-ຮອງຫົວໜ້າພະແນກຄຸ້ມຄອງລາຍຮັບສ່ວຍສາອາກອນ; ຫົວໜ້າ-ຮອງຫົວໜ້າພະແນກຄຸ້ມຄອງອາກອນມູນຄ່າເພີ່ມ; ຫົວໜ້າ-ຮອງຫົວໜ້າ ພະແນກຄຸ້ມຄອງລາຍຮັບບໍ່ແມ່ນພາສີ ແລະ ສ່ວຍສາອາກອນ; ຫົວໜ້າ-ຮອງຫົວໜ້າພະແນກບໍລິຫານ ຄວາມສ່ຽງ ແລະ ກວດກາ.
ໃນພິທີ, ຍັງໄດ້ຜ່ານຂໍ້ຕົກລົງວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່ຢູ່ກົມ ເຕັກໂນໂລ ຊີຂໍ້ມູນຂ່າວສານການເງິນ, ຍົກຍ້າຍ ແລະ ແຕ່ງຕັ້ງຫົວໜ້າພະແນກ ຄຸ້ມຄອງຊຸດຄຳສັ່ງ ແລະ ຖານຂໍ້ມູນ ເປັນຫົວໜ້າພະແນກພັດທະນາລະບົບ ແລະ ຝຶກອົບຮົມ ແລະຮອງພະແນກຈຳນວນໜຶ່ງ; ຍົກຍ້າຍ ແລະ ແຕ່ງຕັ້ງ ຮອງຫົວໜ້າພະແນກພັດທະນາລະບົບ ແລະ ຝຶກອົບຮົມ ເປັນຮັກສາການຫົວໜ້າພະແນກຄຸ້ມຄອງເຄື່ອງຄ່າຍ ແລະ ຄວາມປອດໄພ, ພ້ອມດ້ວຍຮອງພະແນກ ຈໍານວນໜຶ່ງ; ແຕ່ງຕັ້ງຫົວໜ້າ-ຮອງຫົວໜ້າພະແນກກວດສອບ ແລະ ບໍາລຸງຮັກສາລະບົບ.
ໂອກາດນີ້, ທ່ານ ບຸນປອນ ວັນນະຈິດ ສະ ແດງຄວາມຊົມເຊີຍຕໍ່ບັນດາທ່ານທີ່ໄດ້ຮັບການແຕ່ງຕັ້ງຮັບໜ້າ ທີໃໝ່ໃນຄັ້ງນີ້ ແລະ ເນັ້ນໃຫ້ສືບຕໍ່ການຈັດປະຕິບັດວຽກງານ, ສູ້ຊົນສືບຕໍ່ປັບປຸງວຽກງານໃຫ້ດີຂຶ້ນຕື່ມ, ສືບຕໍ່ແກ້ ໄຂບັນດາວຽກທີ່ຍັງຄົງຄ້າງ ເພື່ອໃຫ້ການດຳເນີນວຽກງານຂອງຕົນເອງຮັບຜິດຊອບ ໃນໄລຍະຜ່ານມາມີຜົນສຳເລັດ, ບັນດາສະຫາຍທີ່ໄດ້ຮັບການແຕ່ງຕັ້ງໃນຄັ້ງນີ້, ຈົ່ງຕັ້ງໃຈ, ບຸກບືນ ແລະ ຝຶກຝົນຫລໍ່ຫລອມຕົນເອງ, ສືບຕໍ່ຮຽນຮູ້ ແລະ ເອົາໃຈໃສ່ໃຫ້ຄວາມຮ່ວມມື ໃນການຈັດຕັ້ງປະຕິບັດວຽກງານງານຮ່ວມກັນໃຫ້ກົມກ່ຽວ ເພື່ອພ້ອມກັນກ້າວ ໜ້າປັບປຸງໃຫ້ວຽກງານມີລັກສະນະຫັນປ່ຽນ ແລະ ໃຫ້ດີຂຶ້ນເລື້ອຍໆໃນຕໍ່ໜ້າ.
ຂ່າວ-ພາບ: ກະຊວງການເງິນ
