ຂ່າວຕ່າງປະເທດລາຍງານ ເມື່ອວັນທີ 8 ມິຖຸນາ ຜ່ານມາ, ສຳນັກງານອຸຕຸນິຍົມວິທະຍາແຫ່ງຊາດຂອງບັງກລາເທດ ໄດ້ເປີດເຜີຍບົດລາຍງານໂດຍລະບຸວ່າ: ພື້ນທີ່ສ່ວນຫຼາຍຂອງບັງກລາເທດ ຢູ່ພາຍໃຕ້ ອິດທິພົນຂອງຄື່ນຄວາມຮ້ອນສົ່ງຜົນໃຫ້ອຸນຫະພູມເພີ່ມຂຶ້ນເປັນສະຖິຕິສູງທີ່ສຸດໃນຮອບ 65 ປີ ຈົນຕ້ອງໄດ້ພັກໂຮງຮຽນ ແລະ ຕັດກະແສໄຟຟ້າໃນບາງໄລຍະ.
ບົດລາຍງານຍັງລະບຸຕື່ມວ່າ: ອຸນຫະພູມໃນພື້ນທີ່ສ່ວນຫຼາຍຂອງປະເທດຢູ່ໃນລະດັບສູງກວ່າ 40 ອົງສາ ຕັ້ງແຕ່ຕົ້ນເດືອນນີ້ເປັນຕົ້ນມາ ໂດຍໃນວັນທີ 3 ມິຖຸນາ ຜ່ານມາ ເຈົ້າໜ້າທີ່ສາມາດວັດແທກອຸນຫະພູມເຂດທິນາດປຸຣະ ທາງພາກເໜືອຂອງປະເທດໄດ້ 41,3 ອົງສາ ເປັນສະຖິຕິອຸນຫະພູມສູງທີ່ສຸດນັບຕັ້ງແຕ່ປີ 1958. ຂະນະທີ່ກະຊວງສຶກສາທິການຂອງບັງກລາເທດ ສັ່ງພັກໂຮງຮຽນຫຼາຍພັນແຫ່ງ ໂດຍຈັດໃຫ້ມີການຮຽນການສອນແບບອອນລາຍແທນ ເພື່ອສຸຂະພາບຂອງນັກຮຽນ. ນອກຈາກນີ້, ລັດວິສາຫະກິດດ້ານການຜະລິດກະແສໄຟຟ້າຈຳເປັນຕ້ອງຢຸດຕິການຈ່າຍພະລັງງານໃນບາງໄລຍະ ໂດຍສະເລ່ຍປະມານມື້ລະ 6-10 ຊົ່ວໂມງ ເພື່ອຮັກສາສະຖຽນລະພາບຂອງລະບົບການຜະລິດ ເນື່ອງຈາກຄວາມຕ້ອງການໃຊ້ກະແສໄຟຟ້າສູງກວ່າປົກກະຕິຫຼາຍ.
ທັງນີ້, ຜົນການສຶກສາທີ່ເຜີຍແຜ່ເມື່ອບໍ່ດົນມານີ້ລະບຸວ່າ: ສະພາບອາກາດຮ້ອນຫຼາຍ ໃນຫຼາຍປະເທດທະວີບອາຊີຕະຫຼອດໄລຍະເວລາຫຼາຍເດືອນຜ່ານມາ ບໍ່ວ່າຈະເປັນບັງກລາເທດ, ອິນເດຍ, ຫວຽດນາມ, ລາວ ແລະ ໄທ ຊຶ່ງເປັນຜົນມາຈາກຄວາມຮຸນແຮງທີ່ເພີ່ມຂຶ້ນຂອງພາວະໂລກຮ້ອນ.
