ໃນປີ 2021 ເສດຖະກິດຂອງຟີລິບປິນມີການຟື້ນຕົວຊ້າ ເນື່ອງຈາກໄດ້ຮັບຜົນກະທົບທີ່ຮຸນແຮງຈາກພະຍາດໂຄວິດ-19 ແລະ ເນື່ອງຈາກລັດຖະບານຟີລິບປິນໄດ້ຫຼຸດລະດັບຄວາມເຂັ້ມງວດຂອງຂໍ້ຈຳກັດການປ້ອງກັນການແຜ່ລະບາດຂອງພະຍາດໂຄວິດ-19 ໂດຍອະນຸຍາດໃຫ້ທຸລະກິດ ແລະ ແຮງງານບາງສ່ວນສາມາດກັບມາດຳເນີນງານໄດ້ ທັງນີ້, ໃນໄລຍະ 9 ເດືອນທຳອິດຂອງປີ 2021 ເສດຖະກິດຂອງຟີລິບປິນຂະຫຍາຍຕົວ 4,9% ຊຶ່ງເປັນການຟື້ນຕົວຈາກການຫຼຸດລົງ 10,1% ໃນໄລຍະເວລາດຽວກັນຂອງປີ 2020 ແລະ ທະນາຄານໂລກໄດ້ຄາດຄະເນວ່າ ເສດຖະກິດຂອງຟີລິບປິນໃນປີ 2021 ຈະຂະຫຍາຍຕົວ 5,3% ແລະ ຈະສາມາດຂະຫຍາຍຕົວສູງຂຶ້ນໃນອັດຕາສະເລ່ຍ 5,8% ໃນປີ 2023. ເຖິງຢ່າງໃດກໍຕາມ, ອັດຕາການຂະຫຍາຍຕົວຍັງຄົງຕ່ຳກວ່າໃນໄລຍະກ່ອນເກີດການແຜ່ລະບາດຂອງພະຍາດໂຄວິດ-19.
ສຳລັບປີນີ້, ລັດຖະບານຟີລິບປິນໄດ້ຕັ້ງເປົ້າໝາຍການຂະຫຍາຍຕົວຂອງໂຕເລກລວມຍອດຜະລິດຕະພັນພາຍໃນປະເທດ (GDP) ໄວ້ຢູ່ 7%-9% ແລະ ໃຫ້ຄວາມສຳຄັນກັບການຮີບເລັ່ງຟື້ນຟູປະເທດຈາກຜົນກະທົບຂອງພະຍາດໂຄວິດ-19 ຕະຫຼອດຈົນຮອດການກຽມຄວາມພ້ອມສຳລັບພະຍາດລະບາດ ແລະ ໄພພິບັດທາງທຳມະຊາດໃນອະນາຄົດ ໂດຍລັດຖະບານຟີລິບປິນໄດ້ມີການປັບປ່ຽນແນວຄວາມຄິດເພື່ອກະຕຸ້ນເສດຖະກິດຂອງປະເທດ ຜ່ານຂອບຄວາມຄິດການແຜ່ລະບາດໃຫຍ່ໄປສູ່ລະດັບພະຍາດປະຈຳທ້ອງຖິ່ນ (Pandemic to Endemic) ໂດຍໄດ້ກຳນົດນະໂຍບາຍຫຼັກ 10 ຂໍ້ຄື: ໜຶ່ງ, ການປັບຕົວຊີ້ວັດໃນການຮວບຮວມການລາຍງານຈຳນວນຜູ້ຕິດເຊື້ອພະຍາດໂຄວິດ-19 ໂດຍລະບຸຜູ້ທີ່ມີອາການຮຸນແຮງເທົ່ານັ້ນ ຄືກັບພະຍາດໄຂ້ຫວັດໃຫຍ່; ສອງ, ຮີບເລັ່ງຂະບວນການສັກວັກຊິນໃຫ້ທົ່ວເຖິງ; ສາມ, ສົ່ງເສີມລະບົບສາທາລະນະສຸກໃນທຸກດ້ານ; ສີ່, ການໃຊ້ລະບົບລະດັບການແຈ້ງເຕືອນແທນມາດຕະການກັກກັນຊຸມຊົນ ແລະ ການຂະຫຍາຍລະບົບຂົນສົ່ງສາທາລະນະ ເພື່ອກະຕຸ້ນການຟື້ນຟູເສດຖະກິດ; ຫ້າ, ການດຳເນີນການຮຽນຮູ້ແບບຕົວຕໍ່ຕົວທີ່ມີຄວາມຕໍ່ເນື່ອງ ແລະ ປອດໄພ; ຫົກ, ການຍົກເລີກຂໍ້ຈຳກັດ ແລະ ຂໍ້ກຳນົດຕ່າງໆສຳລັບການເດີນທາງ ໂດຍໃຊ້ພຽງບັດສັກວັກຊິນ ແລະ ລະຫັດຄິວອາ (QR) ສໍາລັບການຕິດຕາມສັນຍາ; ເຈັດ, ການຜ່ອນຄາຍຂໍ້ກຳນົດການແຍກປ່ຽວ ແລະ ການຈັດເຮັດເອກະສານຮັບຮອງການເດີນທາງລະຫວ່າງປະເທດທີ່ຍອມຮັບໃນລະດັບສາກົນ; ແປດ, ຮີບເລັ່ງອອກກົດ ໝາຍຕ່າງໆ ເພື່ອສົ່ງເສີມການປະຍຸກໃຊ້ເຕັກໂນໂລຊີດີຈີຕອນ; ເກົ້າ, ຮີບເລັ່ງສະເໜີພະຣາດຊະບັນຍັດ ເພື່ອເສີມສ້າງຄວາມແຂງແຮງໃຫ້ໜ່ວຍງານພາກລັດໃນການຮັບມືກັບພາວະສຸກເສີນດ້ານສາທາລະນະສຸກ ແລະ ສິບ, ຮວບຮວມບົດຮຽນຈາກວິກິດໃນປັດຈຸບັນ ເພື່ອຊ່ວຍບັນເທົາຜົນກະທົບຂອງພະຍາດລະບາດໃນອະນາຄົດ.
ນອກຈາກນັ້ນ, ລັດຖະບານຟີລິບປິນ ຍັງມຸ່ງເນັ້ນສົ່ງເສີມການເຕີບໂຕຂອງເສດຖະກິດດີຈີຕອນ ໂດຍການພັດທະນາໂຄງສ້າງພື້ນຖານຂອງອຸດສາຫະກຳ E-commerce ຜ່ານການດຳເນີນແຜນງານ E-commerce Roadmap Philippines 2022 ຊຶ່ງກຳນົດການສ້າງ 3 ເສົາຫຼັກຂອງອຸດສາຫະກຳຄື: ຄວາມໄວ, ຄວາມປອດໄພ ແລະ ໂຄງສ້າງ ໂດຍກະຊວງການຄ້າ ແລະ ອຸດສາຫະກຳຂອງຟີລິບປິນໄດ້ຕັ້ງເປົ້າໝາຍຂະຫຍາຍ E-commerce ໃນຟີລິບປິນ ຊຶ່ງໃນປີ 2021 ມີມູນຄ່າ 17 ພັນລ້ານໂດລາ ຫຼື ຄິດເປັນ 4,3% ຂອງ GDP ເພີ່ມຂຶ້ນເປັນ 24 ພັນລ້ານໃນປີ 2022 ຄິດເປັນ 5,5% ຂອງ GDP ພາຍໃນປີ 2022. ນອກຈາກນີ້, ລັດຖະບານຟີລິບປິນຍັງໄດ້ຕັ້ງເປົ້າໝາຍທີ່ຈະເພີ່ມຈຳນວນທຸລະກິດ E-commerce ຈາກເດີມທີ່ມີ 500.000 ລາຍ ໃນປີ 2020 ເພີ່ມເປັນ 750.000 ໃນປີ 2021 ແລະ 1.000.000 ທຸລະກິດໃນປີ 2022 ແລະ ຕັ້ງເປົ້າໝາຍເພີ່ມຂຶ້ນໃນປີຕໍ່ໆ ໄປ.
ຮຽບຮຽງໂດຍ: ວິໄລພອນ ເພັດໄພບູນ
