ຄະນະນໍາ ແລະ ທິມງານກະຊວງ ຖວທ ໄດ້ມອບອຸປະກອນໂທລະໂຄ່ງໃຫ້ແກ່ແຂວງສະຫວັນນະເຂດ ຈຳນວນ 70 ຊຸດ ໂດຍໄດ້ຈັດພິທີມອບ – ຮັບ ຂື້ນໃນວັນທີ 9 ມິຖຸນາ 2023 ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສະຫັວນນະເຂດ. ກ່າວມອບໂດຍ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ແລະ ກ່າວຮັບໂດຍ ທ່ານ ໂພສີສ້ອຍ ກຸທິລາດ ຫົວໝ້າພະແນກ ຖວທ ແຂວງສະຫັວນນະເຂດ ໂດຍການເຂົ້າຮ່ວມເປັນສັກຂີພິຍານ ຂອງທ່ານ ໂພສີ ແກ້ວມະນີວົງ ຄະນະປະຈຳພັກກະຊວງ ຮອງລັດຖະມົນຕີກະຊວງ ຖວທ ກັບ ທ່ານ ນາງ ຫຼິງທອງ ແສງຕາວັນ ຄະນະປະຈຳພັກແຂວງ ຮອງເຈົ້າແຂວງແຂວງສະຫວັນນະເຂດ ທັງເປັນຜູ້ຊີ້ນໍາຂົງເຂດວຽກງານວັດທະນະທຳ-ສັງຄົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ການມອບ- ຮັບໂທລະໂຄ່ງໃນຄັ້ງນີ້ ກໍ່ເພື່ອເປັນການປະກອບສ່ວນເຂົ້າໃນວຽກງານໂຄສະນາຂະບວນການເຄື່ອນໄຫວຕ່າງໆ ພາຍໃນເມືອງ, ບ້ານເປົ້າໝາຍ ທັງເປັນການສະໜອງຂໍ້ມູນຂ່າວສານຕ່າງໆ ໃຫ້ພໍ່ແມ່ປະຊາຊົນໄດ້ຮັບຟັງ ແລະ ຮູ້ສາລະດີໆ ເປັນປະໂຫຍດແກ່ການດຳລົງຊີວິດປະຈໍາວັນ.
ພ້ອມນັ້ນກໍຈະໄດ້ຮັບຮູ້ເຊື່ອມຊຶມຕໍ່ແນວທາງແຜນນະໂຍບາຍປ່ຽນແປງໃໝ່ຂອງພັກ-ລັດ ເພື່ອນໍາພາປະເທດຂອງພວກເຮົາຫຼຸດພົ້ນອອກຈາກຄວາມດ້ອຍພັດທະນາ.
ຈາກນັ້ນກໍໄດ້ມີການຈັດຝຶກອົບຮົມໃຫ້ແກ່ພະນັກງານວິຊາການແຂວງ, ເມືອງ ແລະ ກຸ່ມເປົ້າໝາຍ ກ່ຽວກັບການປະກອບເຄື່ອງ ແລະ ຕິດຕັ້ງລະບົບໂທລະໂຄ່ງ ພ້ອມທັງໄດ້ແນະນໍາການນໍາໃຊ້ລະບົບໂທລະໂຄ່ງໃຫ້ຖືກຕ້ອງຕາມມາດຖານທາງດ້ານເຕັກນິກ.
