ຕາມຂ່າວຈາກວິທະຍຸສາກົນ ແຫ່ງ ສປ ຈີນ ເມື່ອບໍ່ດົນມານີ້ກອງປະຊຸມສາກົນ “ການຄົ້ນຄວ້າ ກ່ຽວກັບບົດຮຽນການພັດທະນາສັງຄົມນິຍົມຈີນ-ຫວຽດນາມ ແລະ ຜົນສະທ້ອນຕໍ່ທົ່ວໂລກ” ໄດ້ຈັດຂຶ້ນຢູ່ນະຄອນຫລວງຮ່າໂນ້ຍ ຂອງ ສສ ຫວຽດນາມ, ໂດຍມີບັນດາຜູ້ຊ່ຽວຊານທີ່ເຂົ້າຮ່ວມເພື່ອຄົ້ນຄວ້າປຶກສາຫາລືດ້ານວິຊາການ ກ່ຽວກັບບົດຮຽນອັນສຳຄັນ ຂອງການປົກຄອງບໍລິຫານປະເທດດ້ານການເມືອງຂອງພັກກອມມູນິດຈີນ ແລະ ຄວາມໝາຍບົດຮຽນທີ່ຖອດຖອນໄດ້, ບົດຮຽນ ອັນສຳຄັນໃນການສ້າງສາສັງຄົມນິຍົມ ຂອງ ສສ ຫວຽດນາມ ແລະ ອື່ນໆອີກ. ໃນໂອກາດນີ້ ທ່ານ ເຜີງຊື້ຖວນ ທີ່ປຶກສາ ສະຖານທູດຈີນ ປະຈຳ ຫວຽດນາມ ກ່າວວ່າ:ສປ ຈີນ ແລະ ສສ ຫວຽດນາມ ລ້ວນແຕ່ນຳພາ ໂດຍພັັກກອມມູນິດ, ລ້ວນແຕ່ ເດີນຕາມເສັ້ນທາງສັງຄົມນິຍົມ. ມຸ່ງໜ້າໄປສູ່ອະນາຄົດ, ສອງພັກ ສອງລັດ ຕ້ອງຍຶດໝັ້ນຖືທິດທາງກ້າວເດີນໄປຂ້າງໜ້າ ຕາມສັງຄົມນິຍົມ, ຮ່ວມກັນຊຸກຍູ້ໃຫ້ສັງຄົມນິຍົມໄດ້ຮັບການພັດທະນາຢ່າງບໍ່ຢຸດຢັ້ງ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
