ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ທ່ານ ຄໍາສອນ ກອນເຍີ ຜູ້ປະຈໍາການເຈົ້າແຂວງເຊກອງ ຕ້ອນຮັບ ທ່ານ ນາງ ອີນາ ມາຈູລໍນີແຕ ເອກອັກຄະລັດຖະທູດສະຫະພາບເອີຣົບ ປະຈໍາ ສປປ ລາວ ແລະ ທ່ານ ນາງ ຊີເບວ ເອກອັກຄະລັດຖະທູດ ແຫ່ງລາຊະອານາຈັກແບນຊິກ ປະຈໍາປະເທດໄທ ພ້ອມດ້ວຍຂະແໜງການທີ່ກ່ຽວຂ້ອງ ໄດ້ເຂົ້າຢ້ຽມພົບປະ
ໃນວັນທີ 8 ມິຖຸນາ 2023 ທີ່ຫ້ອງວ່າການແຂວງເຊກອງ ໃນໂອກາດທີ່ເດີນທາງມາຢ້ຽມຢາມພື້ນທີ່ໂຄງການສ້າງຄວາມກ້າວໜ້າໃຫ້ແກ່ລະບົບປົກປ້ອງສັງຄົມ ແລະ ສິດທິດ້ານແຮງງານໃນຂະແໜງກະສິກໍາອາຫານ ທີ່ໄດ້ຮັບການສະໜັບສະໜູນໂດຍລັດຖະບານແບນຊິກ ແລະ ໂຄງການສ້າງຄວາມກ້າວໜ້າໃຫ້ແກ່ລະບົບປົກປ້ອງສັງຄົມ ແລະ ສິດທິດ້ານແຮງງານ ສໍາລັບຊາວກະສິກອນໃນສວນກາເຟ ແລະ ຊາ ຢູ່ ສປປ ລາວ (SOLAR) ທີ່ສະໜັບສະໜູນໂດຍສະຫະພາບເອີຣົບ.
ໃນໂອກາດນີ້, ທ່ານ ນາງ ອີນາ ມາຈູລໍນີແຕ ແລະ ທ່ານ ນາງ ຊີເບວ ໄດ້ຜັດປ່ຽນກັນລາຍງານກ່ຽວກັບການຈັດຕັ້ງປະຕິບັດບັນດາໂຄງການຢູ່ ສປປ ລາວ ກໍຄືແຂວງເຊກອງ, ຊຶ່ງສະຫະພາບເອີຣົບ ໄດ້ມີການລົງທຶນຫລາຍໂຄງການທີ່ປະຕິບັດຢູ່ ສປປ ລາວ ແລະ ໜຶ່ງໃນນັ້ນ ກໍມີໂຄງການສ້າງຄວາມກ້າວໜ້າໃຫ້ແກ່ລະບົບປົກປ້ອງສັງຄົມ ແລະ ສິດທິດ້ານແຮງງານ ສໍາລັບຊາວກະສິກອນໃນສວນກາເຟ ແລະ ຊາ ຢູ່ ສປປ ລາວ ທີ່ຈັດຕັ້ງປະຕິບັດຢູ່ແຂວງເຊກອງ. ນອກຈາກນີ້, ຍັງມີໂຄງການກ່ຽວຂ້ອງກັບໂພຊະນາການ, ການສຶກສາສໍາລັບການຊ່ວຍເຫລືອຂອງຣາຊະອານາຈັກແບນຊິກ ໂດຍແມ່ນທຶນສົມທົບກັບສະຫະພາບເອີຣົບ ຄືໂຄງການອ໊ອກຟາມ (OXFAM) ທີ່ຈັດຕັ້ງປະຕິບັດຢູ່ 17 ແຂວງຂອງ ສປປ ລາວ ໂດຍໄດ້ເນັ້ນໃສ່ການຄຸ້ມຄອງທາງສັງຄົມ ໃຫ້ກັບແຮງງານນອກລະບົບ ໂດຍສະເພາະແມ່ນ ແຮງງານເພດຍິງ.
ໃນໂອກາດນີ້, ທ່ານ ຄໍາສອນ ກອນເຍີ ກໍໄດ້ກ່າວສະແດງຄວາມຕ້ອນຮັບ ພ້ອມທັງລາຍງານສະພາບທີ່ຕັ້ງ, ຈຸດພິເສດ, ທ່າແຮງ ແລະ ການພັດທະນາພື້ນຖານໂຄງລ່າງ, ເສດຖະກິດ-ສັງຄົມຂອງແຂວງ ໃຫ້ທ່ານທູດສະຫະພາບເອີຣົບ ແລະ ທ່ານທູດຣາຊະອານາຈັກແບນຊິກຮັບຊາບ. ພ້ອມນີ້, ຍັງໄດ້ຕີລາຄາສູງ ແລະ ສະແດງຄວາມຂອບໃຈມາຍັງທ່ານທູດທັງສອງ ທີ່ໄດ້ໃຫ້ການປະກອບສ່ວນຊ່ວຍເຫລືອດ້ານທຶນຮອນ ແກ່ແຂວງເຊກອງໃນໄລຍະຜ່ານມາ ແລະ ສະເໜີຄວາມຕ້ອງການທຶນ ເພື່ອເລັ່ງໃສ່ການແກ້ໄຂຄວາມທຸກຍາກ ເປັນຕົ້ນ ແມ່ນດ້ານວຽກງານການສຶກສາ ຢູ່ສອງເມືອງພູດອຍ ຄື: ເມືອງກະລຶມ ແລະ ເມືອງດາກຈຶງ ໃຫ້ຊ່ວຍສົມທົບທຶນໃນການກໍ່ສ້າງໂຮງຮຽນ ທີ່ຍັງບໍ່ທັນພຽງພໍ, ວຽກງານສາທາລະນະສຸກ, ວຽກງານການປົກປ້ອງສິດທິຂອງແຮງງານ ທີ່ເຮັດວຽກນໍາບໍລິສັດ, ໂຮງຈັກໂຮງງານຕ່າງໆ ໃຫ້ມີຄວາມຍຸຕິທໍາ.
ຂ່າວ-ພາບ: ພຸດທະສອນ
