ຂ່າວຕ່າງປະເທດລາຍງານ ເມື່ອວັນທີ 6 ມິຖຸນາ ຜ່ານມາ, ນັກວິເຄາະຈາກ ບໍລິສັດ ແຄປິຕອນ ອີໂຄໂນມິກ (Capital Economics) ໄດ້ຄາດຄະເນວ່າ: ເສດຖະກິດຂອງຊາອູດິດ ອາຣັບບີ ມີທ່າອ່ຽງຫຼຸດລົງ 0,5% ໃນປີ 2023 ຫຼັງຈາກຊາອູດິດ ອາຣັບບີ ຕັດສິນໃຈປັບຫຼຸດກຳລັງການຜະລິດນໍ້າມັນໃນກອງປະຊຸມກຸ່ມປະເທດຜູ້ສົ່ງອອກນ້ຳມັນ (OPEC) ແລະ ປະເທດພັນທະມິດ (OPEC+) ເມື່ອອາທິດຜ່ານມາ.
ກ່ອນໜ້ານີ້, Capital Economics ໄດ້ຄາດຄະເນວ່າ ໂຕເລກລວມຍອດຜະລິດຕະພັນພາຍໃນປະເທດ (GDP) ຂອງຊາອູດິດ ອາຣັບບີ ຈະຂະຫຍາຍຕົວ 1% ໃນປີ 2023. ທັງນີ້, ຊາອູດິດ ອາຣັບບີ ໄດ້ປະກາດປັບຫຼຸດກຳລັງການຜະລິດນ້ຳມັນລົງອີກ 1 ລ້ານບາເຣນຕໍ່ວັນສູ່ລະດັບ 9 ລ້ານຕໍ່ວັນ ນັບຕັ້ງແຕ່ເດືອນກໍລະກົດເປັນຕົ້ນໄປ ໂດຍຫຼຸດລົງຈາກລະດັບ 10 ລ້ານບາເຣນຕໍ່ວັນ ໃນເດືອນພຶດສະພາ ແລະ ເປັນການປັບຫຼຸດການຜະລິດຄັ້ງໃຫຍ່ທີ່ສຸດໃນຮອບຫຼາຍປີ. ເຖິງຢ່າງໃດກໍຕາມ, ເຖິງແມ່ນວ່າຊາອູດິດ ອາຣັບບີ ຕັດສິນໃຈປັບຫຼຸດກຳລັງການຜະລິດນ້ຳມັນໃນຄັ້ງນີ້ ແຕ່ນັກວິເຄາະຂອງ Capital Economics ຍັງຄົງຄາດຄະເນວ່າ ຊາອູດິດ ອາຣັບບີ ຈະມີຍອດເກີນດູນງົບປະມານໃນປີນີ້ ໂດຍຄາດວ່າ ຈຸດຄຸ້ມທຶນຂອງລາຄານ້ຳມັນຊາອູດິດ ອາຣັບບີ ຈະຢູ່ທີ່ 80 ໂດລາຕໍ່ບາເຣນ. ສ່ວນລາຄານ້ຳມັນເວສ ເທັກຊັສ ອິນເທີມີດິເອດ (West Texas Intermediate : WTI) ປິດຕະຫຼາດທີ່ລະດັບ 72,15 ໂດລາຕໍ່ບາເຣນ ໃນຕົ້ນອາທິດຜ່ານມາ ແລະ ລາຄານ້ຳມັນເບຣນ (Brent) ປິດຕະຫຼາດທີ່ລະດັບ 76,71 ໂດລາຕໍ່ບາເຣນ ໃນການຊື້-ຂາຍໃນຕະຫຼາດນິວຢອກ.
ທ່ານ ເຈມ ສະວອນຕັນ ນັກວິເຄາະຂອງ Capital Economics ກ່າວວ່າ: ພວກເຮົາຍັງຄົງຄາດວ່າ ລາຄານ້ຳມັນ Brent ຈະຢູ່ທີ່ລະດັບ 90 ໂດລາຕໍ່ບາເຣນ ພາຍໃນທ້າຍປີນີ້ ແລະ ລາຄາອາດຈະປັບຕົວສູງຂຶ້ນກວ່າລະດັບດັ່ງກ່າວເລັກນ້ອຍ.
