ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນຜ່ານມາ ຢູ່ ນິວຢອກ ສະຫະລັດອາເມຣິກາ, ສະພາບໍລິຫານງານອົງການ ສປຊ ເພື່ອການພັດທະນາ (UNDP) ໄດ້ຈັດການໂອ້ລົມສົນທະນາກັບບັນດາປະເທດສະມາຊິກ ສປຊ ເພື່ອແລກປ່ຽນກ່ຽວກັບບັນດາບົດຮຽນປະສົບການກ່ຽວກັບການພັດທະນາຜ່ານຜ່າວິກິດການ, ຫັນຄວາມຄາດຫວັງຂອງປະເທດໃຫ້ປະກົດຜົນເປັນຈິງ.
ເນື່ອງໃນໂອກາດນີ້, ທ່ານ ດັ້ງຮ່ວາງຢາງ ເອກອັກຄະລັດຖະທູດ ຫົວໜ້າຄະນະຜູ້ຕາງໜ້າ ຫວຽດນາມ ປະຈຳ ສປຊ ໄດ້ຖືກເຊື້ອເຊີນເປັນນັກປາຖະກະຖາໃນກອງປະຊຸມ ເພື່ອແບ່ງປັນບົດຮຽນປະສົບຜົນສຳເລັດຂອງ ຫວຽດນາມ. ທ່ານໃຫ້ຮູ້ວ່າ: ພະຍາດໂຄວິດ – 19 ໄດ້ເຮັດໃຫ້ຂະບວນວິວັດແຫ່ງການພັດທະນາເສດຖະກິດຊັກຊ້າລົງ, ເກີດມີສິ່ງທ້າທາຍ, ຄວາມຫຍຸ້ງຍາກຕ່າງໆ, ເຮັດໃຫ້ໜ້າທີ່ຟື້ນຟູ ແລະ ຮັກສາສະຖຽນລະພາບໃນການພັດທະນາເສດຖະກິດນັບມື້ນັບໜັກໜ່ວງຂຶ້ນກວ່າເກົ່າ. ໃນສະພາບການນັ້ນ, ລັດຖະບານ ຫວຽດນາມ ໄດ້ຜັນຂະຫຍາຍຫຼາຍມາດຕະການເພື່ອຮັບປະກັນສຸຂະພາບຂອງປະຊາຊົນ, ຄວບຄຸມພະຍາດໂຄວິດ-19 ຢ່າງມີປະສິດທິຜົນ, ບໍ່ເອົາສຸຂະພາບຂອງປະຊາຊົນເພື່ອແລກກັບການເຕີບໂຕດ້ານເສດຖະກິດ. ຫວຽດນາມ ໄດ້ຜັນຂະຫຍາຍສຳເລັດບັ້ນສັກວັກຊິນໃຫຍ່ທີ່ສຸດໃນປະຫວັດສາດ, ຮັບປະກັນວ່າປະຊາຊົນໝົດທຸກຄົນລ້ວນແຕ່ໄດ້ຮັບການສັກວັກຊິນຢ່າງຄົບຖ້ວນໃນເດືອນມີນາ ປີ 2022. ເພາະສະນັ້ນ, ຫວຽດນາມມີການຟື້ນຟູຢ່າງມີປະສິດທິຜົນພາຍຫຼັງໂຄວິດ – 19, ການເຕີບໂຕດ້ານເສດຖະກິດ ບັນລຸ 8,02% ໃນປີ 2022, ສູງທີ່ສຸດໃນໄລຍະເວລາ 10 ປີມານີ້, ເສດຖະກິດມະຫາພາກ ໄດ້ຮັບການຮັກສາເປັນປົກກະຕິ ແລະ ການຄຸ້ມຄອງໜີ້ສິນບັນລຸປະສິດທິຜົນ.
