ອົງການໄອຍະການປະຊາຊົນສູງສຸດ (ອອປສ) ໄດ້ຈັດກອງປະຊຸມວິທະຍາສາດ ກ່ຽວກັບວຽກງານຕິດຕາມກວດກາຄ້າຍຄຸມຂັງ-ດັດສ້າງ ແລະ ວຽກງານຕິດຕາມກວດກາການດຳເນີນຄະດີແພ່ງທົ່ວປະເທດຄັ້ງທີ I ຂຶ້ນໃນວັນທີ 8 ມິຖຸນາ ນີ້ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ບຸນທັນ ບຸນທະວິໄລ ຮອງຫົວໜ້າ ອອປສ, ມີບັນດາພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ໄດ້ສະຫຼຸບຕີລາຄາຜົນສຳເລັດ, ຂໍ້ຄົງຄ້າງ, ທິດທາງລວມວຽກງານຈຸດສຸມແຕ່ລະດ້ານໃນຊຸມປີຕໍ່ໜ້າຈາກທ່ານຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ ແລະ ຫົວໜ້າກົມຕິດຕາມກວດກາການດຳ ເນີນຄະດີແພ່ງ ອອປສ ເພື່ອຊອກໃຫ້ເຫັນບັນຫາຂໍ້ຄົງຄ້າງ ສາເຫດຕົ້ນຕໍ ແລະ ວິທີແກ້ໄຂໃຫ້ຖືກຕ້ອງກັບສະ ພາບຄວາມຕົວຈິງ ແລະ ກົດໝາຍ ແນໃສ່ໃຫ້ມີລັກສະນະວິທະຍາສາດ, ວິໄຈ, ໄຈ້ແຍກຄັກແນ່ ໂດຍສະເໜີໃຫ້ແຕ່ລະທ່ານຍົກບັນຫາຂຶ້ນມາປະກອບຄວາມເຫັນ, ແລກປ່ຽນ ເພື່ອຄວາມເປັນເອກະພາບຕາມກົດໝາຍ ສາມາດຈັດຕັ້ງປະຕິບັດໄດ້ ແລະ ສະເໜີກອງປະຊຸມຮັບຮອງ ເພື່ອນໍາໄປໝູນໃຊ້ເຂົ້າໃນວຽກງານຕົວຈິງຕາມໜ້າທີ່ຂອງແຕ່ລະກົມກອງ, ທ້ອງຖິ່ນໃຫ້ມີປະສິດທິພາບສູງ.
ໂອກາດນີ້, ທ່ານ ບຸນທັນ ບຸນທະວິໄລ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງອົງການໄອຍະການປະຊາຊົນໃນການຕິດຕາມກວດກາຄ້າຍຄຸມຂັງ-ດັດສ້າງ ແລະ ຕິດຕາມກວດກາການດຳເນີນຄະດີແພ່ງ ຊຶ່ງເປັນພາລະບົດບາດໜຶ່ງໃນການຕິດຕາມກວດກາການເຄົາລົບ ແລະ ປະຕິບັດກົດໝາຍຂອງອົງການໄອຍະການປະຊາຊົນ, ນອກນັ້ນຍັງໄດ້ຕິດຕາມກວດກາການນໍາໃຊ້ກົດໝາຍທີ່ບໍ່ຖືກຕ້ອງຕໍ່ຜູ້ຖືກຫາ, ນັກໂທດ, ຜູ້ທີ່ຖືກກັກຂັງເກີນ, ກັກຂັງບໍ່ມີຄຳສັ່ງ, ມາດຕະການປັບໃໝ ແລະ ການແກ້ໄຂຂໍ້ຂັດແຍ່ງທີ່ມີລະເມີດກົດໝາຍ. ທັງສອງວຽກນີ້ ເປັນວຽກທີ່ມີຄວາມສຳຄັນໃນອັນດັບແຖວໜ້ານອນຢູ່ໃນພາລະບົດບາດ, ສິດ ແລະ ໜ້າທີ່ຂອງອົງການໄອຍະການປະຊາຊົນ ຊຶ່ງນັບແຕ່ໄດ້ຮັບການສ້າງຕັ້ງໃນປີ 1990 ເປັນຕົ້ນມາ, ອົງການໄອຍະການປະຊາຊົນໄດ້ເອົາໃຈໃສ່ໃນການປະຕິບັດໜ້າທີ່ຂອງຕົນ ໃນການຕິດຕາມກວດກາ ການປະຕິບັດກົດໝາຍຂອງບັນດາຄ້າຍຄຸມ-ຂັງດັດສ້າງ ແລະ ບັນດາຄະນະສານແພ່ງ, ແຮງງານ, ການຄ້າ, ຄອບຄົວ ແລະ ເດັກ ນັບແຕ່ສູນກາງຮອດຂັ້ນທ້ອງຖິ່ນ.
ທ່ານ ບຸນທັນ ບຸນທະວິໄລ ໄດ້ເນັ້ນຕື່ມອີກວ່າ: ໃນຊຸມປີຕໍ່ໜ້ານີ້, ອົງການໄອຍະການປະຊາຊົນ ແລະ ອົງ ການໄອຍະການທະຫານທົ່ວປະເທດ ຕ້ອງເພີ່ມທະວີຄວາມຮັບຜິດຊອບຂອງຕົນໃນການຄົ້ນຄວ້າ, ເຊື່ອມຊຶມ, ກຳ ແໜ້ນວຽກງານຕິດຕາມກວດກາຄ້າຍຄຸມຂັງ-ດັດສ້າງ ແລະ ການຕິດຕາມກວດກາການດຳເນີນຄະດີແພ່ງເພີ່ມທະວີສູງຂຶ້ນ, ຍົກລະດັບພະນັກງານ, ປັບປຸງ, ປະຕິບັດກົນໄກປະສານງານໃຫ້ເຂັ້ມແຂງ, ສ້າງ ແລະ ປັບປຸງນິຕິກຳ ເປັນຕົ້ນຄຳສັ່ງ, ຄຳແນະນຳ, ປຶ້ມຄູ່ມື ກ່ຽວກັບການຕິດຕາມກວດກາຄ້າຍຄຸ້ມຂັງ-ດັດສ້າງ ແລະ ຕິດຕາມກວດກາການດຳເນີນຄະດີແພ່ງ ລວມເຖິງການຕິດຕາມກວດກາ ການປະຕິບັດຄຳຕັດສິນຂອງສານ. ຮຽກຮ້ອງໃຫ້ຫ້ອງການ, ບັນດາກົມ, ສະຖາບັນຄົ້ນຄວ້າ ແລະ ຝຶກອົບຮົມໄອຍະການ, ພາກ, ແຂວງ, ນະຄອນຫຼວງ, ເຂດ ແລະ ອົງການໄອຍະການແຕ່ລະຂັ້ນ, ສືບຕໍ່ຄົ້ນຄວ້າເຊື່ອມຊຶມຢ່າງເລິກເຊິ່ງກ່ຽວກັບວຽກງານຕິດຕາມກວດກາດັ່ງກ່າວ ແລະ ຈັດຕັ້ງຜັນຂະຫຍາຍຜົນຂອງກອງປະຊຸມໃນຄັ້ງນີ້ ໃຫ້ເປັນແຜນການລະອຽດຂອງກົມກອງ ແລະ ທ້ອງຖິ່ນຂອງຕົນຢ່າງມີປະສິດທິຜົນ, ປັບປຸງກົນໄກປະສານງານໃຫ້ກົມກຽວເພື່ອສະດວກ, ວ່ອງໄວ, ມີຄວາມໂປ່ງໃສ, ຍຸຕິທໍາ.
ຂ່າວ-ພາບ: ຍຸພິນທອງ+ວັນເພັງ
