ຂປລ. ພິທີມອບ-ຮັບ ໂຄງການ ປັບປຸງບູລະນະສຸສານທີ່ລະນຶກເຖິງວິລະກຳຈີນ ຢູ່ເມືອງໄຊ ແລະ ເມືອງນາໝໍ້ ແຂວງອຸດົມໄຊ ຈັດຂຶ້ນໃນວັນທີ 6 ມິຖຸນາ ຜ່ານມາ ໂດຍມີ ທ່ານ ລີປາວ ຢ່າງ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທ່ານ ສຽນ ຝາງ (Qian Feng) ຮອງລັດຖະມົນຕີ ກະຊວງກິດຈະການນັກຮົບເກົ່າ ສປ ຈີນ, ທ່ານ ຈ່ຽງ ຈ້າຍ ຕົງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈໍາ ສປປ ລາວ, ທ່ານ ສົມຈິດ ປັນຍາສັກ ຮອງເຈົ້າແຂວງ ອຸດົມໄຊ, ມີພາກສ່ວນກ່ຽວຂ້ອງເຂົ້າຮວ່ມ.
ສຸສານລະນຶກເຖິງວິລະກຳຈີນ ທີ່ເມືອງໄຊ ຫ່າງຈາກຕົວເມືອງ 5 ກິໂລແມັດ, ກວມເນື້ອທີ່ 5.829 ຕາແມັດ ໃນສະພາບເດີມ, ມີອະນຸສາວະລີແຫ່ງໜຶ່ງ ແລະ ໄດ້ຝັງສົບຂອງນັກຮົບວິລະຊົນ 129 ສະຫາຍ ທີ່ເສຍສະຫຼະໃນການປະຕິບັດໜ້າທີ່ຊ່ວຍປະເທດລາວ ກໍ່ສ້າງເສັ້ນທາງໃນຊຸມປີ 60 ຫາ 70 ຂອງສະຕະວັດທີ 20, ສຸສານດັ່ງກ່າວໄດ້ກວມເນື້ອທີ່ 10.238,7 ຕາແມັດ ໃນປັດຈຸບັນ, ພາຍຫຼັງໄດ້ມີການບູລະນະສ້ອມແປງຄືນໃໝ່ນັ້ນ ປະກອບມີ: ເຂດຫຼຸມຝັງສົບຂອງນັກຮົບວິລະຊົນ, ຫ້ອງທີ່ລະນຶກ, ອະນຸສາວະລີ, ສະໜາມທີ່ລະນຶກ ແລະ ຫ້ອງວາງສະແດງ.
ທ່ານ ສົມຈິດ ປັນຍາສັກ ໄດ້ໃຫ້ຮູ້ວ່າ: ໂຄງການປັບປຸງບູລະນະສຸສານທີ່ລະນຶກເຖິງວິລະກຳຈີນ ຢູ່ເມືອງໄຊ ແລະ ເມືອງນາໝໍ້ ແຂວງອຸດົມໄຊ ໄດ້ເລີ່ມດຳເນີນການກໍ່ສ້າງນັບແຕ່ປີ 2018 ເປັນຕົ້ນມາ ພາຍໃຕ້ການຮ່ວມມືຂອງສອງພັກ ແລະ ສອງລັດຖະບານ ລາວ ແລະ ຈີນ ທີ່ຍາມໃດກໍໄດ້ໃຫ້ຄວາມ ໝາຍ ແລະ ຄວາມສໍາຄັນຕໍ່ມູນເຊື້ອສາຍພົວພັນຮ່ວມມືອັນສະໜິດແໜ້ນ ໃນຕະຫຼອດໄລຍະຜ່ານມາ ໂດຍສະເພາະ ການຮ່ວມມືປັບປຸງບູລະນະສຸສານລະນຶກເຖິງວິລະກຳຈີນ 2 ແຫ່ງຢູ່ແຂວງອຸດົມໄຊ ເພື່ອເປັນການສະແດງຄວາມກະຕັນຍູຮູ້ບຸນຄຸນ ເຖິງບັນດານັກວິສະວະກອນຈີນ ທີ່ໄດ້ເສຍຊີວິດໃນສະໄໝການຕໍ່ສູ້ ແລະ ປົດປ່ອຍ ປະເທດຊາດຂອງ ສປປ ລາວ.
ທ່ານ ລີປາວ ຢ່າງ ໄດ້ກ່າວວ່າ: ເຖິງວ່າໂຄງການຮ່ວມມືປັບປຸງບູລະນະ ສຸສານທີ່ລະນຶກເຖິງວິລະກຳຈີນຢູ່ລາວ ໂດຍສະເພາະ ຢູ່ສຸສານທີ່ລະນຶກເຖິງວິລະກຳຈີນ ຢູ່ເມືອໄຊ ແລະ ເມືອງນາໝໍ້ ແຂວງອຸດົມໄຊ ໄດ້ຮັບການປັບປຸງບູລະນະສຳເລັດລົງ, ແຕ່ພວກເຮົາ ຍັງຈະໄດ້ພ້ອມກັນສືບຕໍ່ຮ່ວມມືດ້ານວຽກງານຄຸ້ມຄອງ ແລະ ປົກປັກຮັກສາສິ່ງກໍ່ສ້າງດັ່ງກ່າວ ໃຫ້ມີຄວາມສວຍງາມ ເພື່ອໃຫ້ເປັນບ່ອນສຶກສາຄົ້ນຄວ້າທາງປະຫວັດສາດຂອງຄົນຮຸ່ນໜຸ່ມ, ທັງເປັນບ່ອນກາບໄຫວ້ສັກກະລະບູຊາ ແລະ ເປັນສະຖານທີ່ທ່ອງທ່ຽວທາງປະຫວັດສາດ ໃຫ້ແກ່ປະຊາຊົນຈີນ ແລະ ປະຊາຊົນລາວ ໄດ້ລະນຶກເຖິງຜົນງານ ແລະ ຄຸນງາມຄວາມດີຂອງບັນດາສະຫາຍຈີນ ທີ່ໄດ້ເສຍຊີວິດ ແລະ ໄດ້ບັນຈຸອັດຖິໄວ້ຢູ່ໃນສຸສານຈີນ ສອງແຫ່ງດັ່ງກ່າວ ນີ້ຕະຫຼອດກາລະນາ.
