ຂ່າວສານຫວຽດນາມລາຍງານວ່າ: ວັນທີ 6 ມິຖຸນາ ຜ່ານມາ, ທ່ານ ແອນຕັນ ຊິລູນອບ ລັດຖະມົນຕີການເງິນ ຣັດເຊຍ ໃຫ້ຮູ້ວ່າ: ຍອດຜະລິດຕະພັນພາຍໃນປະເທດ (GDP) ຈະເພີ່ມຂຶ້ນ 1% ໃນປີນີ້. ພ້ອມດຽວກັນນັ້ນ, ລາຍຮັບຕົວຈິງຂອງປະຊາຊົນຍັງຄາດວ່າຈະເພີ່ມຂຶ້ນເຊັ່ນກັນ.
ຂ່າວລະບຸວ່າ: ທ່ານ ແອນຕັນ ຊິລູນອບ ໃຫ້ຮູ້ວ່າ: ຣັດເຊຍ ໄດ້ປະຕິບັດພັນທະດ້ານງົບປະມານຢ່າງຄົບຖ້ວນ. ກ່ຽວກັບດ້ານເສດຖະກິດ, ຣັດເຊຍຄາດວ່າຈະເຕີບໂຕໃນລະດັບ 1% ໃນປີ 2023. ລາຍຮັບຕົວຈິງຂອງປະຊາຊົນໄດ້ເລີ່ມຕົ້ນເພີ່ມຂຶ້ນນັບຕັ້ງແຕ່ທ້າຍປີ 2022 ແລະ ທ່່າອ່ຽງນີ້ຄາດວ່າຈະຮັກສາໄວ້ໄດ້ໃນປີ 2023.
ລັດຖະມົນຕີການເງິນ ຣັດເຊຍ ຢືນຢັນວ່າ: ລັດຖະບານ ຣັດເຊຍ ຍາມໃດກໍຢຶດໝັ້ນວຽກງານຕົ້ນຕໍເພື່ອຮັບປະກັນປະຊາຊົນບໍ່ໃຫ້ໄດ້ຮັບຜົນກະທົບ. GDP ຂອງ ຣັດເຊຍ ເພີ່ມຂຶ້ນຍ້ອນຄວາມດຸ່ນດ່ຽງຂອງງົບປະມານທີ່ດີ, ການສະສົມຄັງສໍາຮອງໃນກອງທຶນການລົງທຶນແຫ່ງຊາດ, ບັນດາຍຸດທະສາດອຸດສາຫະກໍາທີ່ເຂັ້ມແຂງ ແລະ ມາດຕະການຊ່ວຍເຫຼືອປະຊາຊົນ.
ກ່ອນໜ້ານັ້ນ, ໃນບົດລາຍງານ “ສະພາບການພື້ນຖານເສດຖະກິດໃນປັດຈຸບັນ” ຂອງກະຊວງພັດທະນາເສດຖະກິດ ຣັດເຊຍ ໃນວັນທີ 31 ພຶດສະພາ ໃຫ້ຮູ້ວ່າ: ພື້ນຖານເສດຖະກິດ ຣັດເຊຍ ໃນເດືອນເມສາໄດ້ມີການເຕີບໂຕ 3,3% – ເປັນຄັ້ງທຳອິດໃນຮອບ 1 ປີ, ຫຼັງຈາກຫຼຸດລົງ 0,7% ໃນເດືອນມີນາ 2023.
